ՄԵԿՆԱՐԿԸ, ԿԱՐԾԵՍ, ՎԱՏ ՉԷ Սերբիա եւ Չեռնոգորիայում մեկնարկեց շախմատի Եվրոպայի պատանիների եւ աղջիկների առաջնությունը՝ 10, 12, 14, 16, 18 տարեկանների միջեւ: Ինչպես արդեն տեղեկացրել ենք, Հայաստանը մասնակցում է բոլոր տարիքային խմբերի մրցաշարերին: Մեկնարկային տուրն առանձնապես հաջող ստացվեց մեր 12 տարեկան չորս տղաների համար: Սամվել Տեր-Սահակյանը, Հայկ Թամազյանը, Ռոբերտ Աղասարյանը եւ Հայկ Վարդանյանը հաղթանակ տոնեցին մրցակիցների նկատմամբ ու 79 մասնակիցների ցուցակում հայտնվեցին առաջատարների խմբում: Մյուս տարիքային խմբերում հայաստանցի տղաներն իրենց անվան դիմաց գրանցեցին այսպիսի արդյունքներ: 10 տարեկաններ. Արա Դիլոյան՝ 0, Ռաֆայել Գաբրիելյան՝ 1, Հովհաննես Գաբուզյան՝ 0,5, Կարեն Գրիգորյան՝ 1: 14 տարեկաններ. Ռոբերտ Հովհաննիսյան՝ 1, Դավիթ Գեւորգյան՝ 0: Այս տարիքային խմբում Բելառուսի դրոշի ներքո հանդես եկող Դավիթ Խաչիկյանը բաժանել է միավորը: 16 տարեկաններ. Զավեն Անդրիասյան՝ 1: 18 տարեկաններ. Արման Փաշիկյան՝ 1, Տիգրան Մամիկոնյան՝ 0, Վարդան Մովսիսյան՝ 0,5, Յուրի Համբարձումյան՝ 0: Ինչ վերաբերում է աղջիկներին, նրանք համեմատաբար թույլ մեկնարկեցին: 10 տարեկանների խմբի մեր երկու ներկայացուցիչները՝ Սուսաննա Գաբոյանը եւ Աստղիկ Խալիկյանը, զիջեցին մրցակիցներին: Լուսինե Թորոսյանը, որ Հայաստանի միակ ներկայացուցիչն է 12 տարեկանների խմբում, հաղթանակ տոնեց: Առաջնությունն անհաջող մեկնարկվեց նաեւ մեր 14 տարեկաններ Լուսինե Կարապետյանի ու Դիանա Մնացականյանի համար, որոնք նույնպես պարտություն կրեցին: 16 տարեկան Նունե Դարբինյանը առավելության հասավ մրցակցի նկատմամբ, իսկ Աննա Հայրապետյանը անձնատուր եղավ: Իսկ ահա Անի Դարբինյանը (18 տարեկանների խումբ) իր առավելությունը հաստատեց: Երեկ Եվրոպայի առաջնությունում երկրորդ տուրի օրն էր: ԱՇՈՏ ՀԱԿՈԲՅԱՆ
