ԳՅՈՒԼԸ ԱՐՁԱԳԱՆՔԵԼ Է Ժամանակակից Թուրքիայի ամենահռչակավոր արձակագիր Օրհան Փամուկի նկատմամբ դեկտեմբերի 16-ին կայանալիք դատավարության առնչությամբ երկրում աճող քննադատությանը: «Թուրքիայում դատարանները անկախ են: Որեւէ մեկը չպետք է կասկածի, որ մարդիկ Թուրքիայում ազատ են գրելու այն, ինչ մտածում են»,- ըստ News-ի, հայտարարել է Գյուլը: Պատճառը Փամուկի՝ շվեյցարական «Տագես Անցայգեր»-ին անցած փետրվարին տված հարցազրույցն է, որում արձակագիրը նշել էր. «Այս հողերի վրա սպանվել է մեկ միլիոն հայ եւ որեւէ մեկը բացի ինձանից չի համարձակվում խոսել այդ մասին»: Հարցազրույցի այս հատվածը թուրքական դատախազությունը որակել է որպես «թուրքական ինքնության հրապարակային նսեմացում»: Ըստ Թուրքիայի օրենքների, նման մեղադրանքով Փամուկը կարող է դատապարտվել վեց ամսից մինչեւ երեք տարվա ազատազրկման: Դեկտեմբերի 16-ին նշանակված դատական նիստն արդեն առաջացրել է եվրոպական հանրության եւ Եվրամիության պաշտոնյաների խիստ արձագանքը, որոնց գնահատմամբ, դա «հետընթաց քայլ է մարդու իրավունքների բնագավառում Թուրքիայի կողմից իրականացվող բարեփոխումների գործընթացում»: «Առայժմ որեւէ որոշում չի կայացվել: Կուզենայի հայտարարել ի լուր աշխարհի, որ Թուրքիայում գոյություն ունի խոսքի ազատություն: Մարդիկ հանգիստ հայտնում են իրենց կարծիքը, քանի դեռ նրանք չեն քարոզում բռնություն»,- հայտարարել է Թուրքիայի արտգործնախարարը՝ ավելացնելով, թե նման դրական մթնոլորտ է ձեւավորվել Եվրամիությանը անդամակցության համար իրականացվող բարեփոխումների հաշվին: Օրհան Փամուկի դատավարությանն են անդրադարձել նաեւ արեւմուտքի առաջատար թերթերը: Մասնավորապես, Los Angeles Times-ը այս կապակցությանբ գրում է, որ Փամուկի նկատմամբ դատավարությունը վկայում է «Թուրքիայի կառավարության ներսում պահպանողականների՝ Եվրամիության անդամակցումը ձախողելու մտածված փորձի մասին»: Իսկ բրիտանական Financial Times-ի փոխանցմամբ, Թուրքիան «ոչ միայն պետք է մաքրի պատմության հետ ունեցած իր հաշիվները»: «Եվրամիության սկզբունքներում խոսքի ազատությունից ավելի հիմնարար սկզբունք հազիվ թե լինի»,- գրել է թերթը: «Ազատություն» ռ/կ
