«ՀԱՆՐԱՊԵՏՈՒԹՅՈՒՆԸ» ՊԱՌԱԿՏՎԵՑ Բայց սա դեռ վերջը չէ Վաղուց արդեն գաղտնիք չէր, որ «Հանրապետություն» կուսակցության քաղխորհրդի ներսում գոյություն ունեցող տարակարծությունները մի օր անխուսափելիորեն հանգելու էին կուսակցության պառակտման: Օրերս «Հանրապետության» քաղխորհրդի 7 անդամներ դիմումներ ներկայացրին կուսակցությունից դուրս գալու մասին: Այդ առնչությամբ որոշ պարզաբանումներ խնդրեցինք «Հանրապետության» նախկին նախագահ եւ կուսակցությունն արդեն լքած Ալբերտ Բազեյանից: – Այնուամենայնիվ, ո՞րն էր «Հանրապետության» հիմնադրման ակունքներում կանգնած այդ 7 հոգու՝ կուսակցությունը լքելու պատճառաբանությունը: – Հավանաբար հաջորդ շաբաթ մենք հանդես կգանք մամլո ասուլիսով կամ հայտարարությամբ եւ լիարժեք պարզաբանումներ կտանք բոլոր առաջադրվող հարցադրումներին: – Իսկ կուսակցության այլ կառույցներում Դուք համակիրներ ունե՞ք, ովքեր պատրաստ են միանալ Ձեզ եւ դուրս գալ «Հանրապետության» շարքերից եւ նոր կուսակցություն ստեղծել: – Իհարկե կան: Նրանք էլ, ամենայն հավանականությամբ, դուրս կգան կուսակցությունից: Չեմ ուզում ժամանակից առաջ ընկնել, բայց կարող եմ ենթադրել, որ դրանց թվում կարող է լինել կուսակցության Էջմիածնի տարածքային կազմակերպությունը: Գյումրիում մենք կվերականգնենք ինքնալուծարված կազմակերպությունը: Մյուս կողմից՝ մենք ակտիվ կամ ագրեսիվ աշխատանք չենք տանելու «Հանրապետություն» անդամներին մեր կողմը քաշելու համար: – Թերթերից մեկին ասել էիք, որ առաջիկա ձեր հայտարարության բովանդակությունը կախված կլինի «Հանրապետություն» կուսակցության առաջնորդների արձագանքից: Դա ի՞նչ է նշանակում: – «Հանրապետություն» կուսակցության ներսից բազմաթիվ անգամ խեղաթյուրված տեղեկատվության արտահոսք է եղել, որին մամուլն արձագանքել է որպես իրողություն կամ գոյություն ունեցող փաստ: Կուսակցության անդամներից մեկի կողմից, որը հիմա մեզ հետ չէ, ակնարկել էր, որ եթե մենք դուրս գանք կուսակցությունից, ապա՝ մեր քայլը կարող է պայմանավորվել իշխանական ինչ-ինչ ուժերի աջակցության հետ: Եթե նման փորձեր լինեն, մենք ըստ այդմ՝ կտանք համապատասխան գնահատականներ: Եթե նրանք («Հանրապետություն»-ը- Ն.Մ.) իրենց պարկեշտ պահեն, մենք էլ համեստ հայտարարությամբ հանդես կգանք, որովհետեւ մենք «Հանրապետությանը» կամ նրա հեղինակությանը վնասելու որեւէ խնդիր չունենք: Մենք միասին ճանապարհ ենք անցել, շարունակելու ենք ճանապարհ անցնել որպես ընդդիմադիր գործիչներ՝ անկախ այն հանգամանքից նոր կուսակցություն կձեւավորե՞նք, թե՞ ոչ: – Իսկ ափսոսանքի զգացում չկա՞ նաեւ ձեր ջանքերով հիմնադրված կուսակցության պառակտման համար: – Իհարկե՝ կա: Մենք մեզ էլ ենք համարում պատասխանատու այն բանի համար, որ չկարողացանք գալ ընդհանուր հայտարարի, գնալ որոշակի փոխզիջումների: Շարունակվեց տեսակետների բախումը, իրականությանն առնչվող գնահատականների տարբերությունը, կուսակցության մարտավարության հետ կապված որոշակի տարակարծությունները: Մենք գտնում էինք, որ եթե ուզում ենք խնդիր լուծել, ապա պետք է ռեալ կազմակերպչական աշխատանքներ տանել այդ ուղղությամբ, այլ ոչ թե հանդես գալ վերամբարձ ու վերացական հայտարարություններով, իշխանափոխության ժամկետներ նշել, կուսակցական կառույցները բարձիթողի մատնելով՝ հույս ունենալ, որ ինչ-որ արտաքին ուժերի աջակցությամբ ՀՀ-ում ինչ-որ բան հնարավոր է փոխել: Ես սխալ եմ համարում այդ մոտեցումը: – Տարածված կարծիք կա, որ մասնա վորապես Դուք եւ Վաղարշակ Հարությունյանը «Հանրապետության» որեւէ ակտիվ գործողությունների արգելակողներն էիք: – Մենք երբեք արգելակող չենք եղել: Չի եղել մի դեպք, որ իրենք փորձեն ինչ-որ ակտիվ քայլեր ձեռնարկել եւ մենք դրան դեմ լինենք: Ուղղակի միշտ կրկնվել են վերացական եւ վերամբարձ հայտարարություններ, իսկ մենք փորձել ենք նախազգուշացնել, որ եթե չկա նման հայտարարություններն իրականություն դարձնելու հնարավորություններ՝ հայտարարություններ անելը սխալ է: Օրինակ՝ ձմռանը տեսնում էինք, որ գարնանը մենք ոչինչ չէինք կարողանալու կազմակերպել: Համագումարից առաջ նախազգուշացնում էինք, որ ո՛չ գարնանը, ո՛չ ամռանը իրական հնարավորություններ չենք տեսնում մեր այս գործելակերպով որեւէ բան կազմակերպելու համար: Ի՞նչ արգելակելու մասին է խոսքը: Անընդհատ խոսվել է «Արդարություն» դաշինքից դուրս գալու, այլ դաշինքի ձեւաչափ ձեւավորելու մասին, ու ես էլ, իբր, արգելակող եմ եղել: Ես արդեն 6 ամիս Դաշինքի նիստերին չեմ մասնակցում, կուսակցությունն ազատ էր իր գործողությունների մեջ, թող ինքը որոշեր դա անել: Հիմա մենք չենք խանգարի՝ թող ակտիվ գործողություններ անեն: Մենք՝ որպես ժողովուրդ, կմասնակցենք դրանց: Պատրաստեց՝ ՆԱԻՐԱ ՄԱՄԻԿՈՆՅԱՆԸ
