ՄԻՆԻ
«ՏԷՑ-Ի ԿՐՈՒԳ» Լավատեղյակ աղբյուրներից հայտնի դարձավ, որ ՀՀ
ոստիկանապետ Հայկ Հարությունյանի հրամանով օրերս զբաղեցրած պաշտոնը մեկ աստիճանով
իջեցվել, ապա՝ աշխատանքից ազատվել է ոստիկանության Երեւան քաղաքի Էրեբունի եւ Նուբարաշեն
համայնքների բաժնի անչափահասների գործերով բաժանմունքի պետ, ոստիկանության մայոր
Վահագն Գրիգորյանը՝ մականունը «Բոքս» (դեպ, վերջինիս հայրը՝ Միքայել Գրիգորյանը,
վերջերս էր նշանակվել Մալաթիա-Սեբաստիա համայնքի դատավոր): Վ. Գրիգորյանը ս. թ. հուլիսի
6-ին հայտարարություն էր տվել Էրեբունի եւ Նուբարաշեն համայնքների դատախազություն
եւ հայտնել, որ ՀՀ ԱԺ պատգամավոր Գեւորգ Հակոբյանի՝ «Կոմբիկերի Վլադ», եղբոր որդին՝
Գարիկ Հակոբյանն իրեն ծեծի է ենթարկել՝ պատճառելով մարմնական վնասվածք: Հայտարարության
հիման վրա Վ. Գրիգորյանին դատաբժշկական փորձաքննության ուղեգիր էր տրվել, միաժամանակ
համայնքի դատախազությունը քննություն էր սկսել՝ պարզելու հայտարարության իսկությունը:
Զուգահեռաբար ՀՀ ոստիկանապետի հրամանով ոստիկանության ներքին անվտանգության վարչությունում
եւ ոստիկանության շտաբում անցկացվել է ծառայական հետաքննություն, որի արդյունքում
պարզվել է, որ Վ. Գրիգորյանը, լինելով ոգելից խմիչքի ազդեցության տակ եւ առանց ոստիկանի
համազգեստի, վիճաբանել էր ԱԺ պատգամավորի եղբոր 15-ամյա տղայի հետ եւ ապտակել նրան:
Վերջինս էլ կանչել էր իր հորեղբոր որդուն՝ Գարիկ Հակոբյանին, որն, ի դեպ, ժամանակին,
որպես ականատես վկա անցել էր «ՏԷՑ-ի կրուգի» գործով: Խաղաղ Դոնի փողոցում սկսված
վիճաբանությունը շարունակվել էր Նուբարաշենի հանրապետական հոգեբուժական հիվանդանոցի
հարեւանությամբ գտնվող «պալիգոններում»: Մեր տվյալներով, «ռազբորկային» մասնակցել
էին նաեւ թվով 7 արտասահմանյան մակնիշի ավտոմեքենաներով եկած մարդիկ: Ոստիկանության
ծառայական հետաքննությունը պարզել էր նաեւ, որ Վ. Գրիգորյանը վիճաբանության ժամանակ
օգտագործել է իր մոտ եղած եւ իրեն ամրակցված «Մակարով» տեսակի հաշվեցուցակային զենքը
եւ օդ էր կրակել: Դեպքի վայրում եղած 7 ավտոմեքենաներից 3-ը տարվել են ոստիկանության
Էրեբունու բաժին: Ն. Մ.
