Մեխակները

Մեխակները ո՞ւմ նվիրի Հարցազրույց Բաղդասար Հարությունյանի (Բղդո) հետ – Կարծես միանգամից հայտնվեցիք ասպարեզում: Ո՞ւր էիք մինչեւ հիմա: – Անկախությունից հետո ասպարեզ եկա, իսկ մինչ այդ Աշխարհի ժողովուրդների երգ ու պարի խմբի մեներգիչն էի (գեղարվեստական ղեկավար՝ Վարուժան Թաշչյան), այնուհետեւ «Թալիսման» էստրադային խմբում էի աշխատում: Ներկայումս նախկին «Ռալի» ռոք խմբի երաժիշտների հետ եմ: – Իսկ ինչո՞ւ Բղդո եւ ոչ ամբողջական անուն-ազգանունը: – Ես Բաղդասար Հարությունյանն եմ, Բղդոն անվանս կրճատ ձեւն է: Հաճախ կարծում են, թե ազգությամբ եզդի եմ, բայց ես հայ եմ: – Պաշտոնյաները շատ են սիրում ձեր երգերը, հատկապես «Մեխակները»… – Գիտեմ, լսել եմ… – Որքան ես տեղյակ եմ, նախագահը ջազից բացի ձեր երգերն էլ է լսում, եւ տարբեր առիթներով հրավիրվում եք հատկապես «Մեխակները» երգելու: – Ու մեխակներ են բաժանվում իմ երգի տակ: Գիտեմ, բոլորի կողմից սիրված երգ է, հնչում է համարյա բոլորի մեքենաների մեջ, երեւի նրանից է, որ ստացվել է: – Ասում են՝ «Նոր ժամանակներ» կուսակցության ղեկավար Արամ Կարապետյանն էլ է ձեր «Մեխակների» երկրպագուն: – Հնարավոր է: Ի դեպ, նա մեր հարեւանն է..Իմ տվյալներով՝ այդ երգը պաշտոնյաներից ու քաղաքական գործիչներից շատերն են սիրում: – Ո՞վ է գրում ձեր երգերի տեքստերն ու երաժշտությունը: – Հիմնականում՝ ես: – Միշտ սիրո մասին եք երգում… – Իսկ ուրիշ ինչի՞ մասին երգենք: – Օրինակ՝ հայրենասիրության: – Մարդիկ կան դրսում են ապրում, բայց ավելի հայրենասեր են, քան Հայաստանում ապրող շատերս: – Դուք մի ժամանակ երգում էիք «Կեսարի պալատում», ինչո՞ւ էլ այնտեղ չեք: – Գուցե դա մյուսների համար ուղղակի ռեստորան է, բայց ինձ համար տուն էր, խումբս հիմա էլ այնտեղ է աշխատում: Ուղղակի չէի հասցնում ռեստորանում աշխատանքը համատեղել համերգային գործունեության հետ: Հիմա նոր ալբոմի վրա ենք աշխատում, նորից սիրո մասին եմ երգելու: Մի քիչ ֆոլքի վիճակի երգեր էլ կան ընդգրկված, որոնք կատակային տարրեր են պարունակում: – Ձեր երգերը ո՞ր ժանրի մեջ են տեղավորվում: – Դրանք հաստատ ռաբիս չեն: Ռաբիս բառը վերջին շրջանում սխալ է կիրառվում: Գուցե լեզվաբանները մի հարմար համարժեք մտածեն: Եթե մեկի կոշիկը լավ չի նայվում, ասում են՝ վա՜յ ինչ ռաբիզ տղա ա, մի անճաշակ պահվածք, ասում են՝ ինչ ռաբիս մարդ ա: Հիմա ինչքան վատ բան կա, ռաբիս անունն են կպցրել: Ինչ վերաբերում է իմ երգերին, ես լրիվ քաղաքային ֆոլքի մեջ եմ: – Տեղից վեր կացողը երգում է, եթերը լցված է անճաշակ տեսահոլովակներով… – Նման երգերը թիթեռի կյանք ունեն, թեկուզ ամենաթանկ տեսահոլովակը չի կարող փրկել անճաշակ երգը: – Վերջերս համերգային գործակալություններից մեկը հեռուստատեսությամբ ցուցադրում էր համերգի գովազդային տեսահոլովակը, որտեղ հնչում էր նաեւ ձեր երգը, սակայն դուք համերգին ելույթ չունեցաք: – Այո, նման բան քանիցս եղել է: Տոմսեր վաճառելու համար հաճախ են շահարկում իմ անունը: Զրուցեց ԳՈՀԱՐ ՀԱԿՈԲՅԱՆԸ