ԸՕ-Ն ՏԵՍ՝ ՍԱՀՄԱՆԱԴՐՈՒԹՅՈՒՆԸ ԽՂՃԱ Կենտրոնական ընտրական հանձնաժողովում «Արդարության» ներկայացուցիչ Ֆելիքս Խաչատրյանն «Առավոտին» տվյալներ ներկայացրեց օգոստոսի 23-ի դրությամբ ԿԸՀ եւ ընտրատարածքային ընտրական հանձնաժողովների ղեկավարության կազմի վերաբերյալ: ՀՀ նախագահի ներկայացուցիչները ղեկավարում են 10 ընտրական հանձնաժողովներ, 9-ում՝ հանձնաժողովի նախագահի տեղակալ են, 10-ում՝ քարտուղար: ՀՀԿ անդամները 8 ընտրատարածքային հանձնաժողովներում են ընտրվել նախագահ, 9-ում տեղակալ, նույնքան էլ՝ քարտուղար: 9-ական հանձնաժողովներում դաշնակցականները ներկայացուցիչներ ունեն ղեկավար եռյակում: ՕԵԿ-ը 10-ական հանձնաժողովներում նախագահ եւ տեղակալ ունի, մեկում՝ քարտուղար: ՄԱԿ-ի ներկայացուցիչը միայն մի հանձնաժողով է գլխավորում, սակայն ունի 2-ական տեղակալ եւ քարտուղար: «Ժողպատգամավոր» խմբին ավելի շատ է բաժին հասել՝ հանձնաժողովի 4 նախագահ եւ 3-ական տեղակալ ու քարտուղար: Մինչդեռ ո՛չ «Արդարության», ո՛չ «Ազգային միաբանության» ներկայացուցիչներն այդպես էլ ղեկավար եռյակներում չեն հայտնվել, թեեւ «Ընտրական օրենսգրքի» համաձայն՝ ընտրական հանձնաժողով կազմող այս ուժերն էլ են պատասխանատվություն կրում օրինականության համար: Ֆելիքս Խաչատրյանն ասաց. «Սրանք ընտրովի պաշտոններ են: Եվ ինձ զարմացնում է ԿԸՀ քարտուղար Համլետ Աբրահամյանի հեռուստաելույթը, որտեղ նա հայտարարեց, թե քաղաքական պատասխանատվություն են ստանձնել, ուստի վերցրել են ընտրովի պաշտոնները: Ուրեմն՝ զավթել են, թե չէ՝ ինչպե՞ս կարելի է «վերցնել» ընտրովի պաշտոնը: Դե, թող Եվրոպան հիմա տեսնի, թե իր ասած բարելավված «Ընտրական օրենսգիրքը» ո՜նց է կիրառվում: Վաղն էլ կասեն, թե բարելավվել է նաեւ Սահմանադրությունը: Թող այս օրինակով տեսնեն, թե ինչպես կկիրառվի «լավ» Սահմանադրությունը»: Ընտրական հանձնաժողովների խնդրին երեկ անդրադարձավ նաեւ «Հանրապետություն» կուսակցության ղեկավար Արամ Սարգսյանը, որն իր ասելիքը ներկայացրեց հարցադրման տեսքով. «Ընտրական այս հանձնաժողովներով ինչպե՞ս ենք հանրաքվե անցկացնելու: Եթե մարդ ուզում է արդար ընտրություններ՝ ասում է, վերցրեք, ցանկացած հանձնաժողով, եւ գնացեք ընտրության. այդպես էր Վրաստանում, Ուկրաինայում»: Ա. Ի.
