ՀՖՖ ՄԱՄՈՒԼԻ ՔԱՐՏՈՒՂԱՐՈՒԹՅՈՒՆԸ ՏԵՂԵԿԱՑՆՈՒՄ Է Հայաստանի ազգային հավաքականի գլխավոր մարզիչ Հենկ Վիսմանը ՀՖՖ մամուլի քարտուղարությանն է տրամադրել Հայաստանի ազգային հավաքականի՝ սեպտեմբերի 3-ին, ժամը 22:00-ին, Վազգեն Սարգսյանի անվան «Հանրապետական» մարզադաշտում կայանալիք Աշխարհի գավաթի որակավորման փուլի Հայաստան-Հոլանդիա հանդիպման նախապատրաստության ժամանակացույցը: Հայաստանի ազգային հավաքականի ֆուտբոլիստները հավաքի են հրավիրվել օգոստոսի 30-ին, «Անի» հյուրանոցում: Առաջին նախապատրաստական մարզումը հավաքականը կանցկացնի օգոստոսի 30-ին, ժամը 19:00-ին: Օգոստոսի 31-ին հավաքականը մարզումներ կանցկացնի ժամը 10:00-ին եւ 19:00-ին:Սեպտեմբերի 1-ին եւ սեպտեմբերի 2-ին հավաքականը մարզումները կանցկացնի ժամը 10:00-ին: Բոլոր մարզումները Հայաստանի ազգային հավաքականը կանցկացնի «Փյունիկ» ակումբի մարզաբազայում: Սեպտեմբերի 2-ին, ժամը 11:45-ին, «Փյունիկ» ակումբի մարզաբազայում տեղի կունենա Հայաստանի ազգային հավաքականի գլխավոր մարզիչ Հենկ Վիսմանի բրիֆինգը, որի ընթացքում հավաքականի գլխավոր մարզիչը կներկայացնի նախապատրաստության ընթացքը եւ կպատասխանի մեկ, երկու հարցի: Հայաստանի ազգային հավաքականի սեպտեմբերի 2-ի մարզումը փակ է լինելու հասարակայնության եւ զանգվածային լրատվամիջոցների բոլոր ներկայացուցիչների համար: Հոլանդիայի ազգային հավաքականի գլխավոր մարզիչ Մարկո Վան Բաստենը Նիդեռլանդների ֆուտբոլի ասոցիացիայի մամուլի դեպարտամենտի միջոցով ՀՖՖ մամուլի քարտուղարությանն է ներկայացրել Հոլանդիայի ազգային հավաքականի նախապատրաստության ժամանակացույցը: Հոլանդիայի ազգային հավաքականը նույնպես հավաքի է հրավիրվել օգոստոսի 30-ին, «Գրանդ հոթել Հուիս Տեր Դույնում»: Օգոստոսի 30-ին Հոլանդիայի ազգային հավաքականն անցկացնելու է առաջին մարզումը: Մեկ մարզում հավաքականն անցկացնելու է նաեւ օգոստոսի 31-ին: Սեպտեմբերի 1-ին, առավոտյան մարզումից հետո, տեղական ժամանակով ժամը 15:00-ին, «Գրանդ հոթել Հուիս Տեր Դույնում» մամուլի ասուլիս է տալու Հոլանդիայի ազգային հավաքականի գլխավոր մարզիչ Մարկո Վան Բաստենը: Հոլանդիայի ազգային հավաքականը, պաշտոնական պատվիրակությունը, հյուրերը եւ հավաքականի հովանավորները Երեւան կժամանեն սեպտեմբերի 2-ին՝ հատուկ չվերթով: Հոլանդիայի մինչեւ 21 տարեկանների հավաքականը հատուկ չվերթով Երեւան կժամանի սեպտեմբերի 1-ին: Հոլանդիայի ազգային հավաքականը Երեւանում կհանգրվանի «Գոլդեն փելաս» հյուրանոցում, իսկ երիտասարդական հավաքականը՝ «Մարիոթ Արմենիա» հյուրանոցում: Հոլանդիայի երիտասարդական հավաքականը Երեւանում կմարզվի «Հրազդան» մարզադաշտում, սեպտեմբերի 2-ին, ժամը 17:00-ից 18:30-ը: Հոլանդիայի ազգային հավաքականը կմարզվի Վազգեն Սարգսյանի անվան «Հանրապետական» մարզադաշտում, սեպտեմբերի 2-ին, ժամը 22:00-ից մինչեւ 23:30-ը: Հոլանդիայի ազգային եւ երիտասարդական հավաքականների մարզումները բաց են հասարակայնության եւ զանգվածային լրատվամիջոցների ներկայացուցիչների համար: Սեպտեմբերի 2-ին, ժամը 23:30-ին, Վազգեն Սարգսյանի անվան «Հանրապետական» մարզադաշտի մամուլի ասուլիսների սրահում տեղի կունենա Հոլանդիայի ազգային հավաքականի գլխավոր մարզիչ Մարկո Վան Բաստենի մամուլի ասուլիսը: Զանգվածային լրատվամիջոցների ներկայացուցիչների մուտքը միայն ՀՖՖ-ի հավատարմագրերով: Հոլանդիայի ազգային հավաքականի գլխավոր մարզիչ Մարկո Վան Բաստենը Նիդեռլանդների ֆուտբոլի ասոցիացիայի մամուլի դեպարտամենտի միջոցով ՀՖՖ մամուլի քարտուղարությանն է տրամադրել Հայաստան-Հոլանդիա եւ Հոլանդիա-Անդորրա հանդիպումների նախապատրաստության համար հավաքի հրավիրված ֆուտբոլիստների նախնական ցուցակը: Հայաստանի ազգային հավաքականի գլխավոր մարզիչ Հենկ Վիսմանը Հայաստան-Հոլանդիա եւ Չեխիա-Հայաստան հանդիպումների նախապատրաստության համար օգոստոսի 30-ից հավաքի հրավիրված ֆուտբոլիստների ցուցակը կհրապարակի օգոստոսի 26-ին: Վազգեն Սարգսյանի անվան «Հանրապետական» մարզադաշտի տնօրինությունը սկսել է սեպտեմբերի 3-ին, ժամը 22:00-ին կայանալիք Հայաստան-Հոլանդիա հանդիպման տոմսերի վաճառքը: Տոմսերը վաճառվում են մարզադաշտի տոմսարկղերում: Մարզադաշտի արեւմտյան տրիբունայի տոմսերի արժեքն է 6000 դրամ, արեւելյան տրիբունայի տոմսերի արժեքը՝ 5000 դրամ, հյուսիսային եւ հարավային տրիբունաների՝ 3000 դրամ: Հաշվի առնելով, որ մեծ թվով մարզասերներ են հետաքրքրված Հայաստան-Հոլանդիա հանդիպումով, այդ թվում եւ Հոլանդիայից Հայաստան ժամանող մեծ թվով մարզասերներ, մարզադաշտի տնօրինությունը տեղեկացնում է, որ մուտքը մարզադաշտ բաց է լինելու խաղից երկու ժամ առաջ, ժամը 20:00-ից եւ խնդրում է ֆուտբոլասերներին տոմսերը գնել նախապես եւ շուտ ժամանել մարզադաշտ՝ ավելորդ կուտակումներ չստեղծելու ու անհարկի դժվարություններ չառաջացնելու համար:
