ԻՍՊԱՆԱՑԻ ՈՍՏԻԿԱՆԸ ԶԱՐՄԱՑԱԾ Է Հայաստանի փողոցներում արագ երթեւեկողներին ու լուսացույցն արհամարհող հետիոտնին նա համարում է խենթեր: Իսպանացի ոստիկան, կրտսեր լեյտենանտ՝ բոսուելո դե ալարկոն, Սերխիո Դիուն առաջին անգամ է Հայաստանում: Մեր երկրի մասին լսել էր ընկերուհուց՝ Անահիտ Խաչատրյանից: Սերխիոն նկարներով տեսել ու այնքան էր հավանել Արարատը, որ Մադրիդում համանուն ռեստորան է գտել ու դարձել դրա մշտական այցելուն: Սերխիոն գտնում է, որ հայերն ու իսպանացիները ընդհանուր շատ բան ունեն, սակայն հայերն ավելի հանգիստ են: «Երբ իսպանացիները որեւէ տեղ հավաքվում են, այնքան բարձր են խոսում՝ համարյա գոռգոռում են: Հայերը կարծես այդպիսին չեն, նույնիսկ խմած ժամանակ նրանք համեմատաբար հանգիստ են»,- ասում է իսպանացի երիտասարդը: Իբրեւ ոստիկանի ու կարգուկանոնի պահապանի, նրան անչափ զարմացրել է փողոցային երթեւեկությունը Հայաստանում: «Ամեն անգամ փողոցն անցնելիս, Սերխիոն նայելով լուսացույցին չհետեւող հետիոտնին ու մեծ արագությամբ շարժվող մեքենաներին՝ բացականչում է՝ «քրեյզի փիփըլ»,- ժպտալով պատմեց Անահիտը: Իսպանացի ոստիկանը հավաստիացրեց, որ Մադրիդում նման բանի երբեք ականատես չես լինի, իսկ հայերին խորհուրդ տվեց զգույշ լինել՝ ինչպես փողոցն անցնելիս, այնպես էլ մեքենա վարելիս: «Հայաստանում ոստիկանները հաճախ են կանգնեցնում մեքենաները, Իսպանիայում այդպես չէ: Այնտեղ ոստիկանները մեքենայով շրջում են, պատասխանում քաղաքացիների զանգերին ու հետեւում կարգուկանոնին, բայց երբեք հենց այնպես մեքենա չեն կանգնեցնում»,- պնդում է Սերխիոն: Նա ավելի դժգոհ էր մոսկովյան ոստիկաններից. «Ամեն քայլափոխի նրանք մեքենա են կանգնեցնում, ստուգում փաստաթղթերը: Իմանալով, որ ես էլ ոստիկան եմ, բաց էին թողնում: Բայց ափսոս, որ մարդամոտ չեն, ի տարբերություն հայաստանյան ոստիկանների՝ նրանք այդպես էլ չհամաձայնեցին գոնե մեկ անգամ լուսանկարվել ինձ հետ»,- ասաց երիտասարդը: Հետաքրքրվեցինք՝ ինչո՞ւ է Սերխիոն ընտրել ոստիկանի մասնագիտությունը: Նա ասաց, որ հպարտ է իր մասնագիտությամբ եւ սերը դրա հանդեպ մորից է գալիս. «Դա հրաշալի աշխատանք է, ես մանկուց տեսել եմ, թե ինչպես է ոստիկան մայրս օգտակար լինում մարդկանց, ուստի որոշեցի ընտրել նույն մասնագիտությունը: Իսպանիայում, չգիտես ինչու, վախենում են ոստիկաններից, բայց չէ՞ որ նրանք էլ սովորական մարդիկ են: Իսպանիայի ոստիկանների երիտասարդ սերունդը այժմ մեծ ջանք է թափում մարդկանց պատկերացումներում եղած «սարսափազդու ոստիկանի» կերպարը փոխելու ու նրանց հանդեպ «պատմական» վախի փոխարեն հարգանք ձեւավորելու համար»,- ավելացրեց Սերխիոն: Նրա խոսքերով՝ «Իսպանիայում կաշառք վերցնող ոստիկանները հեռացվում են համակարգից եւ խստորեն պատժվում»: Իր կարճատեւ այցի ընթացքում իսպանացի երիտասարդը հասցրել է նաեւ նկատել, որ հայ տղամարդիկ իշխող են իրենց կանանց նկատմամբ: Նա խոստովանեց, որ նույն խնդիրը Իսպանիայում էլ էր առկա 10-12 տարի առաջ: Նրա մայրը՝ Մարիա Հերեդերոն, որն աշխատում է Իսպանիայի ազգային ոստիկանությունում, հիմնել է կանանց պաշտպանության հարցերով զբաղվող կենտրոն: Իսպանիայի բոլոր ծայրերից անգամ կարող են կապվել այդ ծառայության հետ: Վերջինս ամուսիններից տուժած կանանց ապաստան է տրամադրում՝ մինչեւ նրանց ընտանեկան խնդիրների հաղթահարումը: «10-12 տարի առաջ իսպանուհիները վախենում էին դիմել ոստիկանություն ու բողոքել իրենց ամուսիններից, այժմ նրանք դա անում են առանց երկար-բարակ մտածելու, եթե, իհարկե, կարիքը կա: Երեւի կգա ժամանակ, որ ամաչկոտ հայուհիներն էլ կձերբազատվեն այդ բարդույթից»,- կարծում է ոստիկանը: Ի դեպ, ըստ Սերխիոյի, Իսպանիայում այնքան էլ հեշտ չէ ոստիկան դառնալը, այդ աշխատանքը բոլորի համար չէ: Պարտադիր է ֆիզիկական պատրաստվածությունը, հոգեբանական ու տրամաբանական հատուկ թեստերի «փորձությանը» դիմանալը, անհրաժեշտ գիտելիքները եւ այլն: ԳՈՀԱՐ ՀԱԿՈԲՅԱՆ
