Երեւանի թիվ 1 արվեստի դպրոցում օրերս կայացավ ուշագրավ մշակութային միջոցառում, որի նպատակն էր պատանիներին մոտեցնել վերջին տարիներին մոռացումի մատնված դասականների գործերին, հիշեցնել երաժշտարվեստի բնագավառում իրական մեծությունների մասին:
Հանդիսավոր մթնոլորտում տարբեր հասակի դպրոցականներին մատուցվեցին մեկական ձայներիզներ՝ ավստրո-գերմանական երաժշտական դասականների գործերի ձայնագրություններով, ինչպես նաեւ տրվեցին վկայականներ, որոնք հավաստում էին, որ այս երեխաները մասնակցել են արտասահմանյան երկրների երաժշտական գրականության դասընթացներին: Քանի որ միջոցառումը կազմակերպել էր «Ռենեսանս կամերային նվագախումբ հիմնադրամը», մի քանի հարցով դիմեցինք հիմնադրամի գործադիր տնօրեն Արամ Սարգսյանցին.
– Պարոն Սարգսյանց, ինչո՞վ էր պայմանավորված նման միջոցառում անցկացնելու ձեր նախաձեռնությունը:
– Վերջին տարիներին «երաժշտական գրականություն» առարկան մայրաքաղաքի երաժշտական դպրոցներում անց է կացվում բավականին թռուցիկ։ Այդ պատճառով էլ «Ռենեսանս կամերային նվագախումբ հիմնադրամը» հարկ համարեց անդրադառնալ այս նոր ծրագրի իրականացմանը: Ահա եւ՝ հունիսհուլիս ամիսներին անցկացվեցին սույն սեմինարային դասընթացները, որում ընդգրկվեցին Քանաքեռ-Զեյթուն համայնքի երաժշտական դպրոցների սաները:
– Իսկ ո՞վ էր հովանավորում այս ծրագրի իրականացումը:
– Մեր հիմնական հովանավորը ՀՀ-ում Գերմանիայի դեսպանությունն էր: Բացի այդ, երաժշտական գրականության եռշաբաթյա դասավանդումների նախօրեին «Սամարկ» ՍՊԸի օժանդակությամբ երեխաներին, իբրեւ ուսուցողական օգնություն, բաշխվեցին «Գերմանիայի եւ Ավստրիայի 1719րդ դարերի երաժշտական դասականների կյանքն ու գործունեությունը» գրքույկները:
– Ի՞նչ սկզբունքով եք ընտրել, թե որ կոմպոզիտորներին ներկայացնեք դասընթացների ընթացքում:
– Ըստ մեր կնքած պայմանագրի՝ պետք է կարողանայինք ինը հանդիպումների շրջանակում երեխաներին մատուցել հնարավորին չափ խորը, բայց եւ՝ ըմբռնելի դասեր: Ուստի որոշեցինք ընդգրկել ամենահայտնի կոմպոզիտորներին: Կարծում եմ, որ բոլորս էլ մանկուց լսել ենք Բախի, Հայդնի, Մոցարտի, Բեթհովենի ստեղծագործությունները: Եվ հենց այս կոմպոզիտորների կյանքին, ստեղծագործական ուղուն վերաբերող սեմինարները, ըստ իս, մեր երաժիշտ-աշակերտներին «խորասուզեցին» դեպի դասական երաժշտության հենքը: Առհասարակ, արեւմտաեվրոպական երաժշտությունը պետք է մեկընդմիշտ մնա բոլորիս գիտակցումի մեջ՝ իբրեւ առաջադեմ քաղաքակրթություն, գեղեցիկի եւ սիրո զգացմունքների արտացոլում:
ՆԱՆԱ ՄԱՐԳԱՐՅԱՆ
