ՆԱԽԱՐԱՐՈՒԹՅՈՒՆԸ ՊԱՐԶԱԲԱՆՈՒՄ Է «Առավոտի» 04.08 համարում լույս տեսած «Ինստիտուտ՝ 2 սենյականոցի գնով» հոդվածում տեղ են գտել բազմաթիվ անճշտություններ: Հոդվածագիրը աղմկահարույց է անվանում այն հանգամանքը, որ «Հայսեյսմշինը» հաշվապահական հաշվեկշռում գնահատված է 11 մլն դրամ եւ դա դիտարկում են մասնավորեցման համատեքստում: Մինչդեռ ինստիտուտն ընդգրկված չէ սեփականաշնորհվող օբյեկտների ցանկում եւ մասնավորեցման ենթակա չէ: 11 մլն դրամը ընդամենը ինստիտուտի հաշվեկշռային արժեքն է: Ինչ վերաբերում է «Հայսեյսմշինի» վերակազմավորմանը ԲԲԸ-ի, ապա դա «Բաժնետիրական ընկերությունների մասին» ՀՀ օրենքի պահանջն է՝ եթե ՓԲԸ-ի բաժնետերերի թիվն անցնում է 49-ից, ապա ընկերությունը 1 տարվա ընթացքում պետք է վերակազմավորվի կամ լուծարվի: «Հայսեյսմշինի» բաժնետերերի թիվը կազմում է 147: Ընկերությունը ՓԲ-ի կարգավիճակով պահպանելու նպատակով նախարարությունը կոլեկտիվին առաջարկել է կոնսոլիդացվել, սակայն նրանք դրան չեն համաձայնել: Հրապարակման հեղինակը հաշվետու ժողովների չկայանալը պայմանավորում է կանոնադրության բացակայությամբ, իսկ գործող կարգով տարեկան հաշվետու ժողովները գումարվում են ոչ թե տնօրենի հայեցողությամբ, այլ «Բաժնետիրական ընկերությունների մասին» օրենքի 66 հոդվածի պահանջի համաձայն: Քաղաքաշինության նախարարության մամուլի ծառայությունԴժգոհություններն արտահայտել են ոչ թե «հոդվածագիրը» կամ «հրապարակման հեղինակը», այլ ինստիտուտի աշխատակիցները՝ «Առավոտին» ուղղված իրենց նամակում: Հոդվածում, մասնագիտական կանոնների համաձայն, զետեղված էր նաեւ հակառակ կարծիքը՝ տնօրենի պարզաբանումը:
