ՍԱԴՈՅԱՆԸ ՆՇԱՆԱԿԵՑ ԱՐՏԱՀԵՐԹ ԸՆՏՐՈՒԹՅՈՒՆՆԵՐ ԱԺԴ նախագահ Արշակ Սադոյանը երեկ մամուլի ասուլիս էր հրավիրել, որպեսզի հայտնի, որ ինքն այլեւս միայն վերջնագրերով է խոսելու, քանի դեռ չեն ընդունվել իր կուսակցության կողմից առաջադրված 11 պահանջները: Նշենք մի քանիսը. «1. ՀՀ քաղաքացիների՝ սեփական նախաձեռնությամբ (ստորագրություններ հավաքելու միջոցով) պետական նշանակության կարեւորագույն հարցերը հանրաքվեի միջոցով լուծելու իրավունքը: 2. ՀՀ նախագահին պաշտոնանկ անելու հիմքերի ընդունումը՝ Սահմանադրությունը եւ օրենքները միտումնավոր խախտելու համար (պետք է սահմանափակվի նախագահի ինքնիրավչությունը, անձեռնմխելիություն ունեցող անձին չի կարելի թույլ տալ ոչ ծանր հանցագործությունների համար անպատիժ մնալ մինչեւ իր լիազորությունների ժամկետի ավարտը): 3. ՀՀ նախագահի՝ պետական եւ զինվորական բարձրագույն պաշտոններում միանձնյա նշանակումներ եւ ազատումներ կատարելու իրավունքի վերացումը (անձնիշխանության սահմանափակում): 5. Պետության ներքին եւ արտաքին քաղաքականության հիմնական ուղղությունների եւ հայեցակարգերի, ինչպես նաեւ կառավարության կառուցվածքի, գործունեության սկզբունքների եւ կարգի սահմանումը բացառապես օրենքով (եւ ոչ թե նախագահի հրամանով): 6. Անկախ սահմանադրական փոփոխություններից, նույն անձի՝ ՀՀ նախագահի պաշտոնում երկու անգամից ավելի ընտրվելու արգելումը: 7. Քվեարկության մասնակիցների ձայների կեսից ավելին ստացած թեկնածուի՝ ՀՀ նախագահ ընտրված համարվելը (անթույլատրելի է «բոլորի դեմ ձայները հաշվի չառնելը): 10. ՀՌԱՀ կազմավորման նոր կարգի անհապաղ ուժի մեջ մտնելը: 11. Սահմանադրական փոփոխությունների ընդունումից հետո 2006-ի ապրիլի երրորդ կիրակի օրը ՀՀ նախագահի եւ 2006-ի սեպտեմբերի վերջին կիրակի օրը՝ ՀՀ ԱԺ արտահերթ ընտրություններ»: Մ. Ե.Հ. Գ. Արշակ Սադոյանը երեկ հայտարարեց, որ օգոստոսի 26-ին ժողովրդին հրավիրելու է հանրահավաքի, որի ժամանակ ինքը ներկայացնելու է սահմանադրական փոփոխությունների իր պահանջները։ Սադոյանը վստահ է, որ այս անգամ ժողովուրդը տուն չի գնա եւ իշխանությունները վերջիվերջո կհեռանան։ Ըստ նրա՝ դա կլինի ամենաուշը նոյեմբերին։
