Հյուսիսային
Իռլանդիայի Բալիմենա քաղաքի «Շոուգրաունդ» մարզադաշտում Հայաստանի մինչեւ 19 տարեկանների
հավաքականը Եվրոպայի առաջնության եզրափակիչում հանդիպեց Անգլիայի իր հասակակիցների
հետ: Հանդիպումն ավարտվեց ոչ-ոքի՝ 1:1 հաշվով: Ինչպես ՀՖՖ-ի մամուլի քարտուղարությանը
Բելֆաստից տեղեկացրել է ՀՖՖ-ի գործադիր տնօրենի տեղակալ Արմեն Մելիքբեկյանը, «Հայաստանի
եւ Անգլիայի միջեւ կայացած հանդիպումն ապացուցեց, որ մեր հավաքականի պարտությունը
Նորվեգիային՝ ուղղակի պատահականություն էր: Խաղալով առաջին մրցակցից մի քանի
անգամ ուժեղ Անգլիայի հավաքականի հետ, մեր թիմն իրեն ուղղակի հրաշալի դրսեւորեց եւ
արժանի էր հաղթանակի: Ի տարբերության նախորդ հանդիպման, մեր հավաքականն առաջին իսկ
րոպեներից զիջեց տարածքային առավելությունը մրցակցին եւ ապավինեց հակագրոհների մարտավարությանը:
Այս խաղաոճը մշակել էին գլխավոր մարզիչ Սամվել Պետրոսյանը եւ մարզչական կազմը: Հանդիպման
ընթացքը ցույց տվեց, որ այդ մարտավարությունը ճիշտ էր ընտրված եւ ոչ մեկ անգամ կարող
էր մեր թիմին հաջողություն բերել: Առաջին 30 րոպեների ընթացքում անգլիացիներն
ընդամենը ապարդյուն գրոհներ էին կազմակերպում: Երկու անգամ նրանք խաղից դուրս իրավիճակից
գրավեցին մեր դարպասը, սակայն, ի պատիվ հունգարացի մրցավարի, երկու դեպքում էլ խաղից
դուրս իրավիճակներ արձանագրվեցին: Մեր հավաքականն իր գոլային հնարավորությունները
հիմնականում ստեղծեց առաջին խաղակեսի երկրորդ մասում: Փայլուն պահ կորցրեց Էդգար
Մանուչարյանը, որը ստանալով գնդակը, ընթացքային լավ արագություն հավաքեց, շրջանցեց
մրցակցին, բայց հարմար դիրքից շեղ հարվածեց: Դրանից հետո կոպիտ սխալ թույլ
տվեց մրցավարը՝ չնկատելով Անգլիայի տուգանային հրապարակում պաշտպանի ձեռքով ակնհայտ
խաղը: Առաջին խաղակեսում անգլիացիները նույնպես մեկ-երկու գոլային հնարավորություն
ունեին, բայց չափազանց վստահ խաղաց մեր դարպասապահ Էդել Ապուլա Էդիմա Բետեն: Մի դրվագում
էլ Բլեկստոկի գլխով կատարած հարվածը դարպասային գծից գլխով դուրս մղեց Միխել Սիմոնյանը:
Երկրորդ խաղակեսն անսպասելի սկիզբ ունեցավ մեր հավաքականի համար: Արդեն երրորդ
րոպեին ձեռքով խաղի համար մրցավարը մեր դարպասին նշանակեց 11 մետրանոց հարված, սակայն
Գրանտ Լեդբիտերի ուժեղ հարվածը Էդել Ապուլա Էդիմա Բետեն ոտքերով դուրս մղեց: Բետեն
եւս մեկ անգամ հաղթող դուրս եկավ Լեդբիտերի հետ պայքարում՝ հետ մղելով վերջինիս մոտ
20 մետրից կատարած ուժեղ հարվածը: Մեր տղաներն իրենց հերթին շարունակում էին
վտանգավոր հակագրոհներ կազմակերպել, սակայն կրկին երկու հիանալի պահ կորցրեց Էդգար
Մանուչարյանը: Առաջին դեպքում՝ գեղեցիկ հնարքով շրջանցելով մրցակցին, Մանուչարյանը
հայտնվեց հարմարավետ դիրքում, սակայն կրկին շեղ հարվածեց, իսկ երկրորդ դրվագում նրա
հարվածից հետո գնդակը որսաց դարպասապահը: Հանդիպման 72-րդ րոպեին անգլիացիները
խփեցին իրենց առաջին գնդակը: Բետեն, ընդառաջ գնալով տուգանային հրապարակ կատարած
բարձրից փոխանցմանը, լքեց դարպասը, բայց մինչեւ գնդակը նրան հասնելը՝ այն դիպավ Ալեքսանդր
Պետրոսյանին եւ հայտնվեց ցանցում: Գոլից հետո մեր թիմը նոր ուժերով սկսեց
գործել՝ հասկանալով, որ կորցնելու ոչինչ չկա: 87-րդ րոպեին, անկյունայինի խաղարկման
ժամանակ, մեր թիմի մի քանի ֆուտբոլիստներ ներխուժեցին դարպասային հրապարակ՝ իրենց
հետեւից տանելով մրցակցի խաղացողներին: Տուգանային հրապարակի գծի մոտ միայնակ մնաց
Կարլ Լոմբեն: Հետեւեց փոխանցում, եւ Լոմբեն դիպուկ եւ ուժեղ հարվածով հավասարեցրեց
հաշիվը: Վերջին րոպեներին մեր թիմը կարող էր նաեւ հաղթանակի հասնել: Ալեքսանդր Պետրոսյանը
գնդակն ստանալով Ժորա Հովհաննիսյանից, մրցակցի հետ ուժային պայքարում հաղթող դուրս
եկավ եւ մեն մենակ հայտնվեց դարպասապահի առջեւ, սակայն հարվածեց ուղիղ նրա վրա: Ոչ-ոքին,
իհարկե, մեզ հաջորդ փուլ անցնելու հնարավորություններ է տալիս: Եթե մենք խոշոր հաշվով
հաղթենք ֆրանսիացիներին, Նորվեգիա-Անգլիա հանդիպման յուրաքանչյուր արդյունքի դեպքում
Հայաստանը կարող է հայտնվել կիսաեզրափակիչում: Ֆրանսիայի նկատմամբ ցանկացած
հաշվով հաղթանակի դեպքում, բայց պայմանով, որ Նորվեգիա-Անգլիա մրցախաղը չավարտվի
ոչ-ոքի, մեր հավաքականը նույնպես կարող է դուրս գալ կիսաեզրափակիչ փուլ: Եթե
մենք հաղթենք երկու գնդակի տարբերությամբ եւ մյուս հանդիպումն ավարտվի ոչ- ոքի՝ ապա
այս պարագայում հաշվի կառնվեն լրացուցիչ ցուցանիշները: ԱՇՈՏ
ՀԱԿՈԲՅԱՆ
