ՔԱՆԴԵԼԸ ՆՈՐՈԳԵԼՈՒՑ ՁԵՌՆՏՈ՞Ւ Է Մայրաքաղաքի բնակիչներն այնքան են ահաբեկված քաղաքապետարանի ու թաղապետարանի պաշտոնյաներից, որ նրանց ցանկացած առաջարկի մեջ միայն վատն են տեսնում: Հերթական ահազանգը Աջափնյակ համայնքի 8ա շենքի բնակիչներից է, որին արդեն տեղյակ են Երեւանի քաղաքապետարանում եւ նախագահականում: Հունիսի 13-ին նրանց այցելել են թաղապետարանի աշխատակիցներ եւ տեղեկացրել, որ շենքը վթարային է, 4-6-րդ մուտքերը ենթակա են քանդման, իսկ բնակիչներին նախատեսված է վերաբնակեցնել Նոր Նորքի 6-րդ զանգվածում, նախկին Ռադիոխանութի դիմաց կառուցվող շենքում: «Հարցրինք՝ իսկ ո՞ւր է համապատասխան որոշումը, պարզվեց՝ չունեն: Մենք, իհարկե, նույն պահին էլ հրաժարվեցինք այդ առաջարկից, իսկ հետո մերոնցից գնացել, փնտրել ու չէին գտել մասիվի այդ շենքը»,- ասացին խմբագրություն բողոքը ներկայացրած բնակիչները: Թաղապետարանի աշխատակիցները ոչինչ չեն ասել նաեւ տեղափոխման ժամկետների մասին: Սակայն բնակիչները շտապել են իրենց բացասական պատասխանի մասին տեղյակ պահել Երեւանի քաղաքապետարանին: Այստեղից նույնպես եկել են որոշման ու ժամկետների մասին անտեղյակ աշխատակիցներ եւ առաջարկել նույն պայմանները. տեղափոխվել կամ ստանալ փոխհատուցում՝ յուրաքանչյուր բնակարանի դիմաց միջինը 27-30 հազար դոլարի չափով: Բնակիչներին մնում էր խնդրանքով դիմել երկրի նախագահին՝ շենքն ընդգրկել ամրացվող շենքերի ցուցակում, «քանի որ համաձայն չենք շենքից դուրս գալու ոչ մի պայմանի հետ»: Այն, որ շենքը վթարային է՝ կասկածից վեր է, կան համապատասխան փաստաթղթեր եւ բնակիչներն իրենք էլ տեղյակ են այդ մասին: Երկու տարի առաջ Սեյսմիկ պաշտպանության ազգային ծառայությունն մուտք առ մուտք ուսումնասիրել է շենքի վթարայնության աստիճանը եւ տվել համապատասխան եզրակացություն: Շենքի հետագա անվտանգ շահագործումն ապահովելու համար ծառայությունն առաջարկել է 4-րդ մուտքի բնակիչների տեղահանմամբ կատարել այդ հատվածի վնասվածքների վերականգնում՝ պատերի ուժեղացում երկկողմանի երկաթբետոնե շապիկով եւ այլն, նույն՝ ամրացման եւ ուժեղացման աշխատանքներ կատարել նաեւ մյուս մուտքերում: Ծառայության եզրակացության մեջ շենքի քանդման մասին որեւէ խոսք չկա: Հենց այս եզրակացությունն է բնակիչներին վստահություն ներշնչել, որ նրանք համաձայնեն գազիֆիկացնել իրենց բնակարանները: Ինչն արդեն արել են: Մի «հենման կետ» էլ կա՝ Երեւանի քաղաքապետը մի քանի ամիս առաջ հեռուստատեսությամբ հայտնել է, որ Աջափնյակի 3-րդ կարգի վթարային շենքերը պետք է ամրացվեն: Ու կրկին քանդման մասին ոչ մի խոսք: Հետեւաբար ինչո՞ւ են վթարային մի մուտքի պատճառով մյուս երկուսը քանդում: Այն էլ՝ նոր բնակարան առաջարկելու պայմանով, եթե, իհարկե, հավատանք առաջարկի վերջնական կատարմանը: Ի դեպ, փոխհատուցման չափն էլ գրեթե մոտ է շուկայականին եւ սա էլ քաղաքապետարանին ոչ բնորոշ առաջարկ է: Բնակիչներն ավելի շուտ հակված են այն մտքին, որ ինչ-որ օլիգարխի հետաքրքրել է իրենց շենքն ու ցանկացած գնով ուզում է դատարկել տարածքը: Նույնիսկ անուններ ասացին, որոնք չենք հրապարակում՝ ճշմարտությանը մոտ չհամարելով: Ի դեպ, Արզումանյան փողոցի 3-րդ կարգի վթարայնության մյուս շենքերում սկսվել են եւ այժմ էլ շարունակվում են հիմքերի ամրացման աշխատանքներ: «Ո՞րն է տարբերությունը, ինչո՞ւ հենց մեր նույն կարգի վթարային շենքը պիտի քանդվի՝ ոչ մեկը չի բացատրում: Իսկ մենք երկար տարիներ է, ինչ ապրում ենք այստեղ, աշխատանքի, դպրոց-մանկապարտեզի խնդիր ենք լուծել: Այդքան հե՞շտ է բնակության վայր փոխելը»,- բնակիչները իրենց այս դժգոհության համար պատասխան են սպասում քաղաքապետարանից: Մենք՝ նույնպես: ՌՈՒԶԱՆ ԱՐՇԱԿՅԱՆ
