Դատարանն
աջակցեց կավատին 2005թ. մայիսի 25-ին Կոտայքի մարզի առաջին
ատյանի դատարանը, դատավոր Գագիկ Հեբոյանի նախագահությամբ, կայացրեց մի որոշում, որը
ցույց է տալիս, թե ինչպես են Հայաստանում օժանդակում տարիներ շարունակ հայ կանանց
Արաբական Միացյալ էմիրություններում վաճառող կավատներին: Նրանց համար նախ մեղմ պատիժներ
են սահմանում, ապա՝ հնարավորինս շուտ ազատ արձակում՝ «գործը» շարունակելու հնարավորություն
տալով: Այդ օրը դատական նիստում քննվում էր «Աբովյան» քրեակատարողական հիմնարկի
ադմինիստրացիայի միջնորդությունը դատապարտյալ, հայտնի կավատ Մարիետա Մուսայելյանին
պատժի կրումից պայմանական վաղաժամկետ ազատելու հարցը: Դատական նիստի ժամանակ
դատավոր Գ. Հեբոյանը «պարզել» է. «Դատապարտյալ Մարիետա Մուսայելյանը 10.02.2005թ.
(Մ. Մուսայելյանը իրականում դատապարտվել է 03.11.2004-ին) Երեւանի Կենտրոն եւ Նորք-Մարաշ
համայնքների առաջին ատյանի դատարանի կողմից ՀՀ քրօրի 262 հոդվածի 1-ին, 325 հոդվածի
2-րդ մասերով, ՀՀ քրօրի 66 հոդվածի կիրառմամբ դատապարտվել է ազատազրկման՝ 1 տարի
6 ամիս ժամանակով: Պատժի սկիզբը՝ 05.11.2004թ.-ից, պատժի չկրած մասը՝ 10 ամիս 10
օր: Քննարկելով միջնորդությունը, լսելով ՔԿՀ ադմինիստրացիայի ներկայացուցչին,
դատապարտյալին, հաշվի առնելով կատարված հանցագործության բնույթը եւ հասարակական վտանգավորության
աստիճանը, դատապարտյալի անձը՝ այն, որ պատժի կրման ընթացքում չնայած թույլ է տվել
կարգապահական խախտում, որի համար հիմնարկի պետի կողմից բնութագրվել է զրույցով, որից
հետեւություններ է արել, փոխել է վարքագիծը, ենթարկվել է սահմանված կարգ ու կանոնին,
աշխատանքի է ներգրավվել տարածքի մաքրման եւ բարեկարգման բրիգադում, տրված հանձնարարությունները
կատարել է ժամանակին, խորապես զղջացել է կատարած արարքի համար, ապացուցել է իր ուղղված
լինելը, հաստատապես կանգնած է ուղղման ճանապարհին, դատարանը գտավ, որ միջնորդությունը
ենթակա է բավարարման: Վերոգրյալի հիման վրա եւ ղեկավարվելով ՀՀ քրդատօրի 434, 438
հոդվածներով՝ դատարանը որոշեց. միջնորդությունը բավարարել: Մարիետա Մուսայելյանին
պայմանական վաղաժամկետ ազատել պատժի մնացած մասը՝ 11 ամիս 10 օրը կրելուց»,- գրված
է դատավճռում: Ո՞ւմ հրահանգով է գործը շուտափույթ մտել դատարան, եւ նույնիսկ
պատժի կեսը չկրած կավատն ազատ է արձակել, պետք է պարզեն իրավապահները, եթե, իհարկե,
նման ցանկություն ունեն: Դատարանի այս որոշման դեմ կարող էր վերաքննիչ բողոք բերել
դատախազությունը, ինչը, սակայն, չի արել: ԷԴԻԿ ԲԱՂԴԱՍԱՐՅԱՆ
www.hetq.am
