Երկու բուժքույր, երկուսն էլ մի օրի Արագածավանի առողջության կենտրոնի տնօրենն անօրեն կերպով կրճատել է վաստակաշատ, բայց ոչ թոշակային տարիքի բուժքույրերի: Առաջինը՝ Ռուզաննա Ավետիսյանը, ունի 3 անչափահաս երեխա. «Մինչեւ 2004-ի վերջը աշխատում էի ամբուլատորիայում՝ որպես մանկական պատվաստումների կաբինետի բուժքույր: Այս տարվա հունվարից տնօրեն Գոռ Հովհաննիսյանը, առանց պայմանագրի եւ երկկողմ համաձայնության, ինձ երկու ամսով ուղարկել է պաշտոնապես չգրանցված հիվանդանոցային բաժանմունք՝ հերթապահ բուժքույր աշխատելու: Հունվար-փետրվար ամիսները մի կերպ կիսասառած անցկացնելուց հետո, տնօրենը հայտարարեց, որ հիվանդ չունենալու պատճառով բաժանմունքը փակվում է եւ պետք է կրճատումներ լինեն: Մի քանի օր հետո էլ փակ քվեարկությամբ կրճատեց ինձ»: Երկրորդ բողոքարկուն՝ Մարիետա Ալեքսանյանը, 28 տարի աշխատել է որպես մանկաբարձ. «Տնօրեն Հովհաննիսյանը, առանց իմ համաձայնության, մարտի 1-ից ինձ տեղափոխել է հիվանդանոցային բաժանմունք՝ հերթապահության: Հիվանդության պատճառով խնդրել եմ գործընկերներիս՝ փոխարինել ինձ: Դրա համար տնօրենի հրամանով ստացա խիստ նկատողություն՝ վերջին զգուշացումով: Մարտի վերջին նրա որոշմամբ հիվանդանոցը փակվեց, իսկ ինձ էլ կրճատեցին: Ժողովի արձանագրության մեջ նշված է, որ շատերը դեմ են եղել կրճատումներին, բայց հաշվի չի առնվել»: Շարունակությունը երկու բուժքույրերի համար ընթացել է նույն սցենարով. աշխատանքի վերականգնվելու համար նրանք դիմել են Արագածավանի համայնքապետ Ա. Պապիկյանին, մարզպետարանի առողջապահության վարչության պետ Ա. Վերանյանին, մարզպետ Գ. Գյոզալյանին, առողջապահության նախարարություն, նախագահի վերահսկողական ծառայություն: Վերջինս խնդրի լուծումը հանձնարարել է մարզպետին ու «միսիան» ավարտել: Նախարարությունից եկածները կենտրոնում ժողով են արել, բանավոր կարգադրել տնօրենին՝ վերականգնել կրճատվածներին, որովհետեւ նրա հրամանները խախտել են Աշխատանքային օրենսգիրքը: Կարգադրությունները գրավոր տեսք չեն ստացել: Իսկ Գ. Հովհաննիսյանը, ինչպես նամակագիրներից մեկն է գրել, «նրանց տարավ ռեստորան՝ ճաշկերույթի», ու դրանով էլ, գոնե թե առայսօր, խնդիրը սահմանափակվել է: Նախարարությունից կրկին հանձնաժողով հրավիրելու՝ արդեն նախկին աշխատակիցների խնդրանքը դեռեւս անարձագանք է մնացել: Կրճատվածներին մնում է դիմել աշխատանքի եւ սոցիալական հարցերի նախարարության՝ Աշխատանքի պետական տեսչության օգնությանը: Ռ. ԱՐՇԱԿՅԱՆ
