Երեւանի կենտրոնից տեղահանվող մարդկանց 45քմ-ի
համար առաջարկում են $4000 Այս բակում ապրում է երեք ընտանիք: Երեկ հարկադիր
կատարման ծառայության աշխատակիցները առավոտից կատարողական թերթիկներով ներկայացել
էին՝ մարդկանց վտարելու: Այս անգամ մարդ չծեծեցին, քաշքշուկ չեղավ, նույնիսկ լրագրողներին
տեղեկատվական բնույթի փաստաթղթեր բաժանվեցին: Գեւորգյանների ընտանիքին 45 քմ տարածքի
դիմաց «Գլենդել Հիլզ» ընկերությունը առաջարկել է 4000 դոլար: Կատարողական թերթիկում
հստակ ձեւակերպված էր, որ օգտագործման իրավունքի դիմաց գումարը սեփականատերերին տալուց
հետո պետք է վտարել: Երեկ այդ մարդիկ վտարվեցին առանց այդ գումարը ստանալու, քանի
որ իրենց գործը դեռ դատարանում էր եւ իրենց վտարելու մասին լուրն իմացել էին երկու
օր առաջ, շատ պատահականորեն: Հայկ Պապյանի ընտանիքը բաղկացած է յոթ անձից,
այդտեղ ապրում են շուրջ 80 տարի: 200 քմ տարածքի դիմաց առաջարկել են 14 հազար դոլար:
«Ես նկարչուհի եմ, դուրս չեմ գալու այստեղից, եւ գիշերելու եմ հենց այստեղ: Ո՞ւր
գնամ, կարո՞ղ եք ասել»,- ասաց Սաթենիկ Պապյանը, որը ոչ մի տեղ չէր պատրաստվում տեղափոխել
իր նկարները: Միսակ Դանիելյանի երկհարկանի առանձնատան դիմաց, որն, ի դեպ,
համեմատաբար բարեկարգ վիճակում էր, առաջարկել են 82 հազար դոլար: Բուզանդի 11 հասցեից
վտարվողներին երեկ աջակցելու էին եկել Հյուսիսային պողոտայից վտարվածները: Ավելի
ուշ բնակիչներին միացավ նաեւ Ազգային ժողովի պատգամավոր Հմայակ Հովհաննիսյանը. «Ղալաթ
են անում, որ քանդում են: Սա մարդու իրավունքների խախտում է, դեպորտացիա է: Չենք
թողի, որ մարդկանց տեղահանեն: Հանում են, թող նույն տեղում էլ տուն տան, դժվար ա՞»:
Ավետիս Երանոսյանը, որը երկրորդ կարգի հաշմանդամ է, 70 օր շարունակ այս ամսին
նամակներ է ուղարկում տարբեր ատյաններ: Միեւնույն ժամանակ կառավարության շենքի առջեւ
ցույց էին անում Դավիթ Բեկի 7 հասցեի բնակիչները եւ պահանջում էին օրինականացնել
իրենց անօրինական կառույցները: Նույն տեղում Դալմայի այգիների վարձակալները պահանջում
էին իրենց մշակած հողը՝ առաջարկվող փողի փոխարեն: ՀՐԱՉՈՒՀԻ
ԵՐԱՆՈՍՅԱՆ
