Հայկական գենոֆո՞նդ, թե՞ ստերեոտիպ Դեղեր ներմուծողները դիմել էին Տնտեսական մրցակցության պաշտպանության պետական հանձնաժողովին՝ առողջապահության նախարարության օղակների հարուցած խոչընդոտների վերացման խնդրանքով: Հանձնաժողովի երեկվա նիստում դեղեր ներմուծողների տվյալներից, փաստորեն, պարզ դարձավ, որ առանց հստակ չափորոշիչներով առաջնորդվելու առողջապահության նախարարության դեղգործակալությունը երբեմն տնտեսվարողներին տալիս է որոշակի դեղեր ներմուծելու հավաստագիր, երբեմն՝ ոչ: Եթե սա ավելի ենք հստակեցնում, այս «փոքրիկ քմահաճույքը» վերածվում է մի մեծ խնդրի ու շահումների բախման: Ըստ այդմ, Հայաստան դեղեր ներմուծելու եւ իրացնելու հավաստագիր (թույլտվություն) տալիս է առողջապահության նախարարությունը՝ իր ենթակայության ներքո գտնվող դեղգործակալության («Դեղերի եւ բժշկական տեխնոլոգիաների փորձագիտական կենտրոնի») հիմնականում դրական եզրակացության դեպքում: Սակայն երբեմն թույլտվություն տալիս է առանց դրական եզրակացության: Իսկ «որոշ դեղեր» հասկացությունը գործնականում նշանակում է լայն սպառման տասնյակ դեղեր՝ միլիոնավոր դրամների շրջանառությամբ: Հանձնաժողովին դիմած «Վագա ֆարմ» ընկերության ղեկավար Վահե Վարսանյանը այս առումով նիստում ուշագրավ տեղեկություններ հայտնեց. ընկերությունը բազմիցս ներկրել է միեւնույն դեղերը առանց նմանատիպ խնդիրների, «հետո դեղգործակալությունից մեզ զգուշացրին (բանավոր), որ «Գեդեոն Ռիխտերի» դեղերը չներմուծենք: Դրանից հետո բացասական պատասխան ստացանք փորձաքննությունից»: Իսկ որ ավելի հետաքրքիր է՝ «դրանից հետո նույն դեղերը բացառիկության իրավունքով ներմուծող ընկերությունը՝ «Լամբրոնը», միանգամից 10 տոկոսով շուկայում բարձրացրեց այդ դեղերի գինը»: Պարոն Վարսանյանի դիտարկումներով, այնուհետեւ շուկայում նկատվել են նաեւ անօրինական ճանապարհով ներթափանցած դեղեր: Ըստ չճշտված տեղեկությունների, դեղգործակալության պաշտոնյաներից մեկը «Լամբրոնի» բաժնետերերից մեկն է: Դեղգործակալության ներկայացուցիչներն ըստ էության չհերքեցին պարոն Վարսանյանի տվյալները: Նրանք ոչ էլ հանձնաժողովի անդամների հարցերին տրամաբանական պատասխան տվեցին, թե ինչ սկզբունքով են միեւնույն պայմանների դեպքում մեկ մերժում, մեկ թույլատրում տվյալ դեղերի ներմուծումը: Դեղգործակալության ներկայացուցիչները վկայակոչում էին «Դեղերի մասին» օրենքը, որին ի պատասխան՝ հանձնաժողովի նախագահ Աշոտ Շահնազարյանը նկատեց. «Որպեսզի «Դեղերի մասին» օրենքի անունն անընդհատ չտաք, հայտնեմ, որ այդ օրենքում 4 չափանիշ կա, որոնք չբավարարելու դեպքում միայն կարող եք մերժել: Մինչդեռ դուք առաջնորդվել եք նաեւ այլ, չսահմանված չափանիշներով»: Ի դեպ, «չափանիշներից» մեկն էլ, որով դեղգործակալությունն առաջնորդվել է՝ «գենոֆոնդի յուրահատկություններն» են. «Նույն դեղը հայկական գենոֆոնդի վրա մի ազդեցություն է թողնում, ռուսական գենոֆոնդի վրա՝ մեկ այլ»: Ուստի բիզնեսը գենոֆոնդերի «յուրահատկություններից» ու պետական պաշտոնյաների քմահաճույքներից զերծ պահելու համար հանձնաժողովը առողջապահության նախարարությանը կարգադրեց հստակեցնել դեղերի ներմուծման համար առաջադրվող պահանջները՝ այդ մասին տեղյակ պահելով հանձնաժողովին: Այլ կերպ ասած, նախարարությունը պետք է այսուհետեւ տնտեսվարողների առջեւ հարուցվող նմանատիպ վարչական խոչընդոտները բացառի: Սեփ. լր.
