Մի քանի ամիս առաջ 12 պետական բուհերի 500 ուսանողների շրջանում Հայաստանի ուսանողական ջոկատների հանրապետական շտաբի կողմից իրականացված հարցումներից պարզվել է, որ նրանք առավել կոռումպացված են համարում ԵՊՀ-ն, Գյուղակադեմիան եւ Երեւանի բժշկական համալսարանը:
Ուսանողները, իբրեւ կանոն, իրենց բուհերը չեն համարել առավել կոռումպացված, միայն ԵՊՀ-ն է, որ իր ուսանողների կողմից համարվել է երրորդ առավել կոռումպացվածը:
Իբրեւ բարձրագույն կրթության ամենակոռումպացված փուլ, ուսանողների մեծամասնությունը նշել է ընդունելության քննությունները՝ «իբրեւ կոռուպցիայի գլխավոր աղբյուր»: Կաշառքի չափերի մասին հարցին պատասխանելիս ուսանողների մեծ մասը նշում է մինչեւ 100 ԱՄՆ դոլարը:
Հետաքրքիրն այն է, որ հարցվածների մոտ երեք-չորրորդը, կախված իրավիճակից, պատրաստ է դիմելու կոռուպցիոն եղանակներին, քանի որ բուհից վտարվելու վտանգն ու քննություններին պատրաստվելու համար ժամանակի սղությունը կոռուպցիայի առավել մեծ ռիսկեր պարունակող իրավիճակներ են ստեղծում: Ուսանողների միայն 35,8 տոկոսը կոռուպցիան ընդունելի չի համարում, իսկ ավելի քան երկու-երրորդն այն ընդունելի է համարում՝ կախված իրավիճակից:
Հարցման արդյունքում հաստատվել է այն մտայնությունը, թե կոռուպցիան ազդում է ուսման որակի վրա: Միեւնույն ժամանակ, պարզվել է, որ ուսանողների գերակշիռ մասը երբեք չի փորձել պաշտպանել իր իրավունքները կամ ինչ-որ ձեւով պայքար սկսել այդ երեւույթի դեմ:
Բարեկամական կապերի օգտագործումը գրեթե բոլոր բուհերում համարվել է կոռուպցիայի ամենավտանգավոր տեսակը: Այդ առումով բացառություն է կազմում միայն Երեւանի թատրոնի եւ կինոյի ինստիտուտը: «Բարեկամական կապերի օգտագործման» նկատմամբ ամենահանդուրժող կեցվածք են ընդունել Երեւանի գեղարվեստի պետական ակադեմիայի ուսանողները: Իսկ ֆիզիկական կուլտուրայի ինստիտուտի ուսանողները, ի տարբերություն մյուս բուհերի, առավել հանդուրժող են կաշառակերության հանդեպ:
Ընդհանուր առմամբ, ուսանողների գերակշիռ մասի՝ մոտ 77 տոկոսի կարծիքով, կոռուպցիան Հայաստանում կենսաձեւ է: Այս առումով ազգի հանդեպ լավատես են Երեւանի թատրոնի եւ կինոյի ինստիտուտի ուսանողները:
Հ. Բ.
