«Չենջմենները» բողոքում են Երեկ մայրաքաղաքի մի շարք փոխանակման կետեր, մասնավորապես Տիգրան Մեծի պողոտայի շուրջ 20 փոխանակողներ ժամը 13-14-ը համերաշխության գործադուլ էին հայտարարել: Դրանով նրանք իրենց զայրույթն էին արտահայտում Կենտրոնական բանկի նախագահի կայացրած որոշման վերաբերյալ, առ այն, որ թվով 17 փոխանակման կետեր թույլ տված խախտումների համար փակվել են ու եւս մի քանիսը ստուգվում է: Բողոքավորներն անգամ հայտարարված գործադուլի մասին նախօրոք պաշտոնապես հայտնել էին ԿԲ նախագահ Տիգրան Սարգսյանին: Ըստ փոխանակման կետերի ներկայացուցիչների, գործադուլից մի քանի օր առաջ Տիգրան Մեծի պողոտայի բոլոր փոխանակման կետերում խոշոր ստուգումներ են իրականացվել, որի արդյունքում մեկի դրամարկղում 5 դրամ է պակաս եղել, մյուսի մոտ՝ 6 դրամ ավել, մեկի անվտանգության համակարգը չի աշխատել, մեկ ուրիշն էլ 15 րոպե շուտ է ընդմիջում արել: «Ասենք, ես վատ եմ զգում, ուզում եմ գնալ զուգարան, չե՞մ կարող մեկ-երկու րոպեով դուրս գալ: Հա, օրվա աշխատանքային ռեժիմը մենք ենք ներկայացրել, իրենք հաստատել են, բայց հո գերի չե՞նք ընկել: Մենք ռոբոտ չենք, մարդ ենք, կարող ա եւ սխալվենք»,- բացատրում էին բողոքավորները: Նրանց կարծիքով, ստուգողները պարզապես պատճառ են փնտրել, որ իրենց զրկեն լիցենզիայից. «Մենք օրական նվազագույնը 25 մլն դրամի շրջանառություն ենք անում, էդ 6 դրամն ի՞նչ է, որի համար փակում են կետը, մենք դրանո՞վ պիտի հարստանայինք: Անգամ երբ հաշիվները ցույց են տալիս, որ աշխատողն է տուժել, թիվն ավել է գրանցել, դա էլ են խախտում համարում»: Փոխանակման կետերի աշխատողներն ընդունում են, որ դեկտեմբերին իրականացված ստուգումներն ու կետերի փակումը ինչ-որ տեղ հիմնավոր է եղել, քանի որ իրենք իսկապես լուրջ խախտումներ են ունեցել, իսկ հիմա ծիծաղելի պատճառներով են փակում: «Դրանից հետո մեզ գցեցին ծախսերի տակ՝ պահանջելով ունենալ համակարգիչներ, պրինտերներ, հաճախորդի եւ աշխատողի միջեւ պահպանել 50 մետր շառավիղ, մենք էդ բոլոր պայմաններն արեցինք, ընկանք եկամտահարկի տակ: Դա էլ ոչինչ, ասեցին՝ 500 հազար դրամից ավելի գործարքը գրանցեք, դա էլ ենք անում, եթե պետք է, բոլոր գործարքներն էլ կգրանցենք, թող ամեն ինչ մաքուր լինի, հետո չասեն՝ որեւէ օրենքի չենք ենթարկվում»,- պատմում էին բողոքի մասնակիցները: Նրանք նաեւ պնդում էին, որ դոլարի կուրսի տատանումների հեղինակը հենց ԿԲ նախագահն է: «Տիգրան Սարգսյանը իրեն թույլ է տալիս հեռուստատեսությամբ հայտարարել, թե դոլարի գինը բարձրացնում եւ իջեցնում են փոխանակման կետերը: Դա ծիծաղելի է: Մենք հասկանում ենք, որ ԿԲ-ն էժան գներով դոլար է առել՝ մի 40-50 մլն դոլար, որը պիտի բարձր գներով վաճառի, ու հիմա էլ մեզ է դարձնում քավության նոխազ, ժողովրդին էլ ապակողմնորոշում»: Փոխանակման կետերի տերերը դժգոհում էին նաեւ, որ հայտնաբերված խախտումի համար ոչ թե տուգանք են նշանակում, ինչպես, օրինակ, խանութների դեպքում է լինում, այլ միանգամից փակում են կետը: Այս խառնաշփոթի մեջ բողոքում էին նաեւ դոլար մանրել ցանկացող քաղաքացիները, որոնք 5 դոլար մանրելու համար ժամերով հերթ էին կանգնում. լիցենզիան պահպանած միակ փոխանակման կետը՝ այն է «Պրոմեթեյ» բանկը, չէր հասցնում սպասարկել բոլորին: Երեկ երեկոյան ժամը 20-ին Արժութային դիլլերների խորհրդի եւ ԿԲ-ի խորհրդի միջեւ պետք է պաշտոնական հանդիպում լիներ՝ ճշտելու, թե այս ի՞նչ ակցիա է կիրառվում փոխանակման կետերի դեմ: Մեր տեղեկություններով, ԿԲ խորհրդի նախագահն ասել է, որ գործադուլը օրենքի խախտումով է եղել, ուստի հնարավոր է, որ համապատասխան պատժամիջոցներ կիրառվեն՝ աշխատանքային ռեժիմը խախտելու համար: ՀՌԻՓՍԻՄԵ ՋԵԲԵՋՅԱՆՈրպես անվերապահ ճշմարտություն չընդունելով «չենջերի» բողոքները՝ պատրաստակամ ենք ներկայացնել նաեւ ԿԲ-ի տեսակետը:
