Կարծում
է ԱԺ պատգամավոր Ռուբեն Հովսեփյանը Սեւանում Արամ Կարապետյանի եւ ժողովրդի
հանդիպման ժամանակ տեղի ունեցած միջադեպից հետո նույնիսկ իշխանական քաղաքական ուժերը
համախմբվեցին ընդդիմադիր ուժերի հետ եւ հանդես եկան խաղաղ ցույցերն ու հավաքները
խանգարող դեպքերը դատապարտող հայտարարությամբ: Նախագահ Ռոբերտ Քոչարյանն անմիջապես
վերջիններիս դիտողություն արեց, որը հնչեց մոտավորապես այսպես. էլ բանուգործ չունեք՝
հայտարարություն եք անում: Այդ նույն ընթացքում մեր թերթին տրված հարցազրույցում
ՀՅԴ բյուրոյի ներկայացուցիչ, ԱԺ փոխնախագահ Վահան Հովհաննիսյանը, զուգահեռ անցկացնելով,
նկատեց, որ միտինգ անելն էլ արվեստ է, եւ եթե մեկը չի կարողանում միտինգ կազմակերպել,
ուրեմն թող չանի: Եվ իբրեւ լավ միտինգ կազմակերպողի օրինակ ներկայացրեց Ստեփան Դեմիրճյանի
հանդիպումները բնակչության հետ՝ ասելով. «Ինչո՞ւ Ստեփան Դեմիրճյանի հանդիպումներում
այդպիսի բաներ չեն լինում, որովհետեւ չեն լինում նաեւ մարդկանց միտինգից դուրս հանելու
դեպքեր»: Այն ժամանակ պարոն Հովհաննիսյանին զգուշացրինք, որ հիմա ինքն աչքով է տալու:
Պարզվեց, այնքան էլ չէինք սխալվել: Սակայն այս դեպքում միջադեպերը ոչ թե միտինգի
ժամանակ են լինում, այլ՝ դրանք դեռ չսկսված, եւ հրահրողներն էլ ոչ թե «քրեական տարրերն»
են, այլ՝ տեղական ոստիկանության ներկայացուցիչները, ովքեր փորձում են «Հռոմի պապից
ավելի կաթոլիկ երեւալ»: Այս ամսվա ընթացքում արդեն երկու անգամ՝ Իջեւանում եւ Գողթն
գյուղում ոստիկանները փորձել են խանգարել ԱԺ «Արդարություն» խմբակցության ղեկավարի
հանդիպումները մարդկանց հետ: Մենք փորձեցինք ճշտել՝ արդյո՞ք կոալիցիոն քաղաքական
ուժերը չեն պատրաստվում հանդես գալ հերթական հայտարարությամբ, որն արդեն կլինի այն
մասին, թե «քրեական տարրերից» բացի, նաեւ իրավապահները իրավունք չունեն խանգարել
պատգամավորների, քաղաքական ուժերի եւ հասարակության հանդիպումները, եւ որ նրանք պարզապես
պարտավոր են պահպանել հասարակական կարգը, ոչ թե խանգարել այն: ՀՅԴ խմբակցության
անդամ Ռուբեն Հովսեփյանը մեր հարցին ի պատասխան, բավականին անկեղծորեն ասաց. «Ոչ,
առհասարակ նման հայտարարությունների կողմնակից չեմ, եթե այդ հայտարարությունները
չեն բերում իրենց հետ հավելյալ մեխանիզմ այս կամ այն երեւույթը կանխելու համար: Որովհետեւ
այն, ինչ ձեր կարծիքով պիտի ասվի հայտարարությամբ, վաղուց ասված է: Ասված է թե՛ Սահմանադրությամբ,
թե՛ օրենքներով: Քաղաքական ուժերը հավաքվում են ի՞նչ ասեն, եթե պետք է կրկնեն այն,
ինչ մենք ունենք Սահմանադրությամբ եւ օրենքներով, ինձ համար ընդունելի չէ: Դա կլինի
աշխատանք անելու իմիտացիա, եւ ոչ ավելին: Դա նույն բանն է, երբ ժամանակին պատերին
գրում էին. «Հատակին չթքել»: Գիտենք, որ հատակին չի կարելի թքել, եւ երբ շատ էին
թքում, ստիպված էին նման հայտարարություն գրել: Բայց դա անհեթեթություն է»: Ուրեմն,
ընդունո՞ւմ է, որ իրավապահները խանգարելով հանդիպումները՝ խախտում են Սահմանադրությունը:
Ռուբեն Հովսեփյանի կարծիքով, դա պետք է ընկալել այնպես, որ ոստիկանների մեջ էլ կան
մարդիկ, ովքեր «մորթապաշտ են, աշխատելու ձեւերը չգիտեն, որպեսզի վաղը-մյուս օրն իրենց
վրա խոսակցություն չլինի, խնդիր չառաջանա, նրանք, իրենց կարծիքով, կանխարգելիչ քայլեր
են կատարում: Ինչ-որ տեղ նրանք իրավունք ունեն այդպես մտածելու, որովհետեւ էդ միտինգներն
էլ միտինգներ չեն: Երկուսն էլ կարծես իրար արժեն»: Իսկ իրավապահների նման պահվածքը,
ըստ Ռուբեն Հովսեփյանի, գալիս է վախից. «Պատասխանատուների վախից, որոնք չեն կարողանալու
միտինգից հետո պատասխան տալ, թե ինչո՞ւ այդպես եղավ»: Իսկ ումի՞ց են վախենում: «Իրենք
իրենցից,- եղավ պատասխանը,- իշխանությունը բուրգ է, ամեն իշխանություն ինքն իրենով
չի վերջանում: Հիմա իրենք այդ վախից, մորթապաշտությունից կարող են եւ սխալներ անել,
եւ անում են»: Կոալիցիայի մյուս երկու ուժերը՝ ՀՀԿ-ն եւ ՕԵԿ-ը մեր հարցին
պատասխանելիս ընկան սարուձոր եւ ասացին, որ այս օրերին խորհրդարանում կքննարկվի «Ժողովներ,
հանրահավաքներ, երթեր եւ ցույցեր անցկացնելու մասին» օրենքում փոփոխություններ եւ
լրացումներ կատարելու մասին օրինագիծը եւ դրանից հետո միայն հնարավոր կլինի կատարվածին
գնահատական տալ: ՀՀԿ խմբակցության ղեկավար Գալուստ Սահակյանը վստահ է, որ օրենքի
փոփոխությունից հետո ամեն ինչ շատ ավելի «օ-քեյ» կլինի: Սակայն չէ՞ որ երկրի գլխավոր
օրենքում արդեն արձանագրված է, որ մարդիկ իրավունք ունեն խաղաղ ցույցերի, երթերի
եւ հանրահավաքների: Գալուստ Սահակյանը այս հարցերը հնարավոր չի համարում քննարկել.
«մթնոլորտից դուրս». «Մթնոլորտից դուրս հնարավոր չի քննարկել, խնդիրն այն է, որ ներկայացված
փոփոխություններում այդ բոլոր հարցերի պատասխանները կան, կան նաեւ պատասխանատուները:
Եվ մեր օրենքը եվրոպական չափորոշիչներին համապատասխան է: Այ, դուք այսօր ասում եք,
որ ոստիկանությունը չի թողել եւ այլն, փաստորեն, հակառակ կողմը (նկատի ունի ոստիկաններին-
Մ.Ե.) որոշակի սցենար չունի, ո՞ւմ բողոքի, ինչպե՞ս բողոքի: Օրենքը այդ բոլոր հարցերին
պատասխանում է: Այսինքն՝ քաղաքական ուժերը իրենց վրա պատասխանատվություն չեն վերցնելու,
նրանք կարող են օրենսդրորեն ազդեցություն ունենալ, որը եւ կանենք մենք»: Պարզապես
ստիպված էինք կրկին հարցնել՝ բայց ընդունո՞ւմ է, որ առանց այդ օրենքի փոփոխության
էլ, հենց միայն սահմանադրորեն, մարդիկ իրավունք ունեն խաղաղ ցույցերի եւ հանդիպումների:
«Ոչինչ չեմ ընդունում, որովհետեւ ես ինքս չեմ մասնակցել այդ միտինգներին: Մի առիթով
էլ եմ ասել, եթե այդ միտինգների ժամանակ կոնկրետ իմ մասին վատ բաներ են ասում, իսկ
ես ունեմ իմ ընտրազանգվածը, որին դա դուր չի գալիս եւ լարվածություն է առաջացնում:
Դրա համար բաներ կան, որ օրենքով չեն լուծվում»: Ափսոս, պարոն Սահակյանը չմանրամասնեց,
թե օրենքից բացի ուրիշ ի՞նչ կերպ են լուծվում հարցերը: ՕԵԿ անդամ, ԱԺ պետաիրավական
հարցերի մշտական հանձնաժողովի փոխնախագահ Հովհաննես Մարգարյանն ասաց, որ հետագայում
էլ բոլոր քաղաքական ուժերը պետք է երաշխավորեն, որ «քաղաքական նպատակներով կազմակերպված
զանգվածային միջոցառումներում քրեական տարրերը ոտնձգություններ չկատարեն»: Նկատեցինք,
որ այս դեպքում խոսքը ոչ թե այդ տարրերի, այլ ոստիկանության մասին է: Հովհաննես Մարգարյանի
բնորոշմամբ, այսօր «Սահմանադրությամբ եւ օրենքներով ուժային կառույցները իրավունք
չունեն միջամտել, այդ թվում նաեւ նախընտրական, ընտրական գործընթացներին եւ այլն,
բոլորս քաջ գիտենք: Մենք ունենք համապատասխան օրենք, եւ ոչ մի ուժային կառույց միջամտելու
իրավունք չունի»: Իսկ այս պահին հայտարարություն անելու անհրաժեշտություն ՕԵԿ անդամը
եւս չի տեսնում: ՄԱՐԳԱՐԻՏ ԵՍԱՅԱՆ
