Ինչպես
է հաջողվել «Եվրոպա» ՍՊԸ-ին ստանալ նման շինարարություն սկսելու թույլտվությունը
Նոր Նորքի 7-րդ զանգվածի 28, 29, 30 շենքերի հարեւանությամբ մինչեւ վերջերս
գտնվում էին թիվ 28 երթուղային տաքսու վերջնականգառը եւ դիսպետչերական կետը: Մի քանի
օր առաջ դիսպետչերանոցը (վագոն-տնակի տեսքով) տեղահանվեց, իսկ հիշյալ երթուղու վերջին
կանգառն էլ տեղափոխվեց Նոր Նորքի 9-րդ զանգված: Սակայն, ինչպես պարզվեց, երթուղայինների
կայանը չարյաց փոքրագույնն է հիշյալ շենքերի բնակիչների եւ հատկապես նրանց երեխաների
համար: Հենց նույն կետում, համապատասխան փաստաթղթերով, բենզալցակայան կառուցելու
թույլտվություն ունի «Եվրոպա» ՍՊԸ-ն: Բենզալցման կայան կառուցելու ցանկության մասին
հայտնի է դառնում հենց թիվ 28 երթուղին տեղահանելու ժամանակ: Բնականաբար, ՍՊԸ-ի ներկայացուցիչները
պնդում են, որ առկա են բենզալցակայան կառուցելու քաղաքապետարանի համապատասխան որոշում
եւ թույլատրված նախագիծ: Սակայն 7-րդ զանգվածի հիշյալ շենքերի բնակիչները կտրականապես
դեմ են իրենց բնակարաններից ընդամենը 300-400 մետր տարածության վրա պայթուցիկ «օբյեկտ»
ունենալուն: Անցյալ ուրբաթ հերթական անգամ «Եվրոպա» ՍՊԸ-ն երկու «Նիվայով»
եւ մեկ էքսկավատորով փորձեց սկսել շինարարությունը, բայց բնակիչները դարձյալ ընդվզեցին
եւ հետաձգեցին լցակայանի հիմնարկեքը: Այդ օրը «դեպքի վայրում» էին նաեւ իրավապահ
մարմինների ներկայացուցիչները՝ հասարակական կարգը պահպանելու նպատակով, թեեւ հասարակական
կարգի միակ խանգարիչը առայժմ չկառուցված բենզալցակայանն է: Մայորի ուսադիրներով ոստիկան
Մանուկյանը «խաթր արեց» եւ մեկ օրով հնարավորություն տվեց բնակիչներին՝ գնալ եւ դատարանից
շինարարությունը կասեցնելու որոշում բերել, այլապես ինքը ստիպված է իր պարտականությունները
կատարել՝ ի պաշտպանություն շինարարություն կատարողների: Մայորը, թերեւս, վստահ է,
որ դատարանը մեկ օրում, այն էլ՝ նման հարցում, չի կարողանա կողմնորոշվել: Իսկ
բնակիչներն էլ, մայորի ցույց տված ճանապարհից «շեղվելով», դիմել էին Ավան եւ Նոր
Նորքի համայնքների դատախազություն՝ խնդրելով կասեցնել շինարարության որոշումը, որովհետեւ
այն պոտենցիալ վտանգ է մարդկանց համար, մանավանդ որ վերջիններս հենց կառուցվելիք
բենզալցակայանի հարեւանությամբ հիմնել են Եղեռնի 90-ամյակին նվիրված պուրակ, իսկ
ապագայում մտադիր են նաեւ խաղահրապարակ ստեղծել: Բենզալցակայանի շինարարությունը
առայժմ չի սկսվել, բայց… Ե՛վ դատախազությանը, ե՛ւ նախագահի վերահսկողական ծառայությանը,
ե՛ւ հենց քաղաքապետարանին անհրաժեշտ է պարզել, թե ի՞նչ տրամաբանությամբ, զորությամբ
եւ միջոցներով է հաջողվել «Եվրոպա» ՍՊԸ-ին ստանալ Նոր Նորքի 7-րդ զանգվածի 28, 29,
30 շենքերի քթի տակ բենզալցակայան կառուցելու թույլտվություն, Երեւանի քաղաքապետի
որոշում եւ հաստատված նախագիծ: Մի՞թե այդ տարածված բիզնեսը հնարավոր է իրականացնել
միայն բնակչության առողջության եւ անվտանգության հաշվին: ՀԱՐՈՒԹՅՈՒՆ
ԹԱՐՎԵՐԴՅԱՆՆորքի 7-րդ զանգվածի բնակիչ
