Մայիսի 7-ին Մալաթիա-Սեբաստիա համայնքի
բնակիչների նախաձեռնող խումբը ծանոթացրեց բնակիչներին թաղապետի թեկնածու Սամվել
Հովսեփյանի հետ: Միջոցառումը կազմակերպվել էր թեկնածուին ներկայացնելու նպատակով,
նաեւ՝ որ Սամվել Հովսեփյանը առավել հստակ պատկերացում կազմի համայնքի խնդիրների մասին:
Նախաձեռնող խմբի անդամ Աղավնի Աղաբեկյանը լեփ-լեցուն դահլիճին ներկայացրեց Սամվել
Հովսեփյանի կենսագրության հիմնական էջերը: Նա ծնվել է 1959 թվականին, համեստ աշխատավորի
ընտանիքում: Միջնակարգ դպրոցն ավարտելուց հետո աշխատել է, հետո կրթությունը շարունակել
Ռոստովի ժողտնտեսության ինստիտուտներից մեկում: Աշխատանքային կենսագրությունն սկսվում
է ֆաբրիկայի բանվորից, այնուհետեւ եղել է խանութի վարիչ: Արցախյան շարժման առաջին
իսկ օրերից նա կամավոր անդամագրվել է եւ մեկնել պատերազմ: Եղել է Արծիվ-24 գումարտակի
հրամանատարը: Երեք անգամ վիրավորվել է, բուժվել եւ կրկին մեկնել պատերազմ՝ մինչեւ
զինադադարը: 1995-2000 թթ. պաշտպանության նախարարության տարբեր զորամասերի հրամանատար
է: Այնուհետեւ ղեկավարել եւ այժմ էլ ղեկավարում է Երկրապահ-կամավորների միության
տարբեր հանձնաժողովներ, այժմ՝ սոցիալական: Մարտական սխրանքների համար արժանացել է
ՀՀ եւ ԼՂՀ բազմաթիվ շքանշանների: Ունի 3 երեխա: Համայնքի բնակիչները ծանոթ
էին իրենց համայնքում ծնված-մեծացած Սամվել Հովսեփյանին, եւ ավելի վստահորեն ներկայացրին
իրենց հուզող խնդիրները: Դրանք բազմազան են, հիմնականում՝ սոցիալական, թեպետ բնակիչներին
մեծապես անհանգստացնում էին նաեւ կրթական, մշակութային եւ աճող սերնդի առողջության
պահպանման խնդիրները. Մալաթիա-Սեբաստիայում վատթար վիճակում են շենքերը՝ գազիֆիկացումը
դանդաղ է ընթանում, վերելակները չեն աշխատում, բազմացել են առնետները: Ձմռան ընթացքում
վատ են մաքրվում համայնքի փողոցները՝ սառցակալած վիճակում դրանք դառնում են անանցանելի:
Չափազանց քիչ են կազմակերպվում մշակութային եւ սպորտային միջոցառումներ: Թոշակառու
բնակիչները դժգոհ էին իրենց խնդիրների հանդեպ անտարբերությունից: «Ես դեռ խոստում
չեմ տալիս, իսկ եթե ընտրվեցի՝ համայնքին կներկայացնեմ իմ ծրագրերը: Իմ կատարած սոցհարցումների
արդյունքով, բնակիչներին ամենաշատն անհանգստացնում է իրենց հանդեպ կատարվող անարդարութունները:
Ցանկանում եմ նշել, որ մարդիկ պետք է ապրեն Մալաթիա-Սեբաստիա համայնքում ու բարեկեցիկ,
ոչ թե Բանգլադեշում, որի նույնանուն երկրի վիճակին արդեն նմանվում ենք: Սակայն այսօրվանից
հայտնում եմ, որ պետք է ընթանան արդար ընտրություններ, ոչ թե կռիվներով, կրակոցներով
ու ազդեցություններով»,- Սամվել Հովսեփյանի այս կարճ ելույթն ընդունվեց ներկաների
ծափահարությամբ: R
