ՎՈՒՈՒԱՄ-ը գրոհում է «Մենք հաղթել ենք մեր հակառակորդներին Վրաստանում, Ուկրաինայում եւ Ղրղըզստանում: Սակայն մեր ցուցակում կա եւս մի երկիր, որի անունն այժմ ես չեմ տա: Այդ մասին կխոսեմ միայն ՎՈւՈւԱՄ-ի՝ Քիշնեւում կայանալիք գագաթաժողովին»,- օրեր առաջ հայտարարել էր Վրաստանի նախագահ Մ. Սահակաշվիլին: ՎՈւՈւԱՄ-ի գագաթաժողովը, որին մասնակցում են Վրաստանի, Ադրբեջանի եւ Մոլդովայի նախագահները (բացակայում է միայն Ուզբեկստանի նախագահը), երեկ մեկնարկել է: Տակավին հայտնի չէ, թե իր խոստման համաձայն հատկապես որ երկրի անունն է հնչեցրել Սահակաշվիլին, թեեւ շատերի կարծիքով դա Բելառուսն է, բայց մի բան ակնհայտ է. ՎՈւՈւԱՄ-ի ընթացիկ գագաթաժողովը թե կազմակերպական, թե ներկայացուցչական, թե քննարկվելիք հարցերի ընդգրկման առումով աննախադեպ է եւ ունի ընդգծված հակառուսական ուղղվածություն: Ըստ որոշ կարծիքների, հավանաբար հենց այդ հանգամանքն էլ Քարիմովին ետ է պահել մասնակցությունից: ՎՈւՈւԱՄ մնացյալ անդամները, որոնք արդեն, պատկերավոր ասած, այրել են դեպի ռուսական ազդեցություն տանող բոլոր կամուրջները, առավել վստահ են իրենց գործողություններում: Անգամ կարծիքներ կան, որ Քիշնեւում ընթացող այս միջոցառումը շրջադարձային դեր կունենա ԱՊՀ կազմալուծման եւ հետխորհրդային տարածքում նոր քաղաքական «աշխարհագրության» ձեւավորման հարցում: Հարկ է նկատել, որ Քիշնեւում սպասվող բարձրաստիճան հյուրերի ցանկը բավական տպավորիչ է: Դրանում նշված են Ռումինիայի, Բուլղարիայի, Լիտվայի, Հունգարիայի եւ Լեհաստանի նախագահների անունները: Պատվիրակներ են սպասվում նաեւ ԵՄ-ից եւ ԱՄՆ Պետդեպից: Ակնհայտ է, որ հյուրերի վերը բերված կազմի ընտրությունն իսկ Ռուսաստանի համար ոչ մի լավ բան չի խոստանում: Մինչդեռ, ընդհանուր գծերով հայտնի է նաեւ հարցերի բավականաչափ պերճախոս շրջանակը, որը դառնալու է ՎՈւՈւԱՄ գագաթաժողովի քննարկման առարկա: Թերեւս արձանագրենք միայն, որ ի թիվս աշխարհաքաղաքական համագործակցությանն առնչվող հիմնախնդիրների՝ մասնակիցները մտադիր են քննության առնել նաեւ ԱՊՀ տարածքում առկա, այդ թվում՝ Մերձդնեստրի, աբխազական, հարավօսական եւ ԼՂ հակամարտությունները: Նկատենք, որ սրանք հենց այն հարցերն են, որոնց լուծման հնարավորությունը, ոչ առանց հիմքի, ավանդաբար կապվում է Կրեմլի քաղաքական կամքի հետ: Ու եթե այդ հակամարտությունները քննարկվում են բոլորովին նոր ֆորմատով, այսինքն՝ Ռուսաստանի բացակայությամբ, դա, փաստորեն, Մոսկվային հասցեագրված շատ թափանցիկ ակնարկ է՝ վերջինիս անցանկալի դերակատարության մասին: ՏԻԳՐԱՆ ԱՎԵՏԻՍՅԱՆ
