ԿՄԱՍՆԱԿՑԻ՞ ՀՐՄՇՏՈՑԻՆ ՄԱԱ-ում լրագրողների հետ պաշտպանության նախարարի հանդիպման ժամանակ ամենաշատ արծարծված հարցերից մեկը Սերժ Սարգսյանի հնարավոր մասնակցությունն էր ապագա նախագահական ընտրություններին: Եվ այս տեսանկյունից էին դիտարկվում Ղարաբաղի խնդրի լուծման համար փոխզիջումների անհրաժեշտության վերաբերյալ նրա հայտարարությունները: Ինչին ի պատասխան նախարարը հայտարարեց, թե ամենամեծ պաշտոնի համար անգամ չի գնա «ԼՂ խնդրի ավելի լուծումների, քան պահանջում է իրավիճակը եւ քան ես համոզված եմ: Ես այդ հրմշտոցին չե՛մ մասնակցում: Հանրապետությունում մեծ հրմշտոց կա՝ յուրաքանչյուրը փորձում է իրեն ներկայացնել որպես արեւմտամետ եւ առաջադեմ գաղափարների ջատագով: Չե՛մ մասնակցել եւ երբե՛ք էլ չեմ մասնակցելու այդ հրմշտոցին, շատ պարզ պատճառով՝ մարդու մասին դատում են ոչ թե նրա խոսքերից, այլ գործերից: Եվ որեւէ տեղ չկան նստած միամիտ մարդիկ, որ 10-15 տարի դու դավանես մի գաղափար, հետո ինչ-ինչ բաներից ելնելով 2 նախադասություն ասես ու քեզ ընդունեն որպես արեւմտամետի»: Նշենք սակայն, որ այս ամենից հետո պրն Սարգսյանը սկսեց խոսել այն մասին, թե ապրիլի վերջին պատրաստ կլինի ՆԱՏՕ-ի հետ անհատական համագործակցության ծրագիրը եւ այլն: Իր թեկնածության առաջադրման մասին ավելի վաղ տրված հարցերին Սերժ Սարգսյանը միշտ պատասխանել էր, թե դեռ վերջնականապես չի որոշել իր համար այդ հարցը, շուտ է եւ այլն: Երեկ էլ տվեց նույն պատասխանը, թե տեղին չէ այդ թեման արծարծելը՝ դեռ 3 տարի կա: Նաեւ նշեց, թե ովքեր ցանկանում են՝ կարող են մասնակցել այդ ընտրություններին, «առանց ջղաձգվելու, առանց սեփականացնելու նախագահի ինստիտուտը եւ ասելու, որ թողնելու եմ կամ չեմ թողնելու»: Վերջին ակնարկի հասցեատերն ակնհայտորեն «Հանրապետություն» կուսակցության քաղխորհրդի նախագահ Արամ Սարգսյանն էր, որը համագումարում հայտարարել էր. «Ռոբերտ Քոչարյանը հեռանալու է եւ նրան չի հաջողվելու իր թափուր թողած աթոռին նստեցնել ո՛չ Սերժ Սարգսյանին, ո՛չ էլ որեւէ ուրիշին»: Ա. Ի.
