«Ա1+»-Ը ՇԱՐՈՒՆԱԿՈՒՄ Է ՊԱՅՔԱՐԸ Երիտասարդական եւ հասարակական կազմակերպությունների նախաձեռնությամբ ապրիլի 12-ին, ժամը 18.00-ին, նախատեսվում է ընդլայնված հանրահավաք, որտեղ կընթերցվի կառավարությանն ուղղված մի նամակ հետեւյալ պահանջով՝ հրապարակել ազատ հաճախությունների ցանկը: Երեկ հրավիրված ասուլիսում այդ մասին հայտնեց «Ա1+» հեռուստաընկերության նախագահ Մեսրոպ Մովսեսյանը: «Մենք պատասխան ենք ակնկալում մինչեւ մայիսի 3-ը»,- ասաց պրն Մովսեսյանը: Ըստ նրա՝ ապրիլի 12-ից հետո կդադարեցվեն Երեւանի պետական կոնսերվատորիայի մոտ անցկացվող ամենօրյա հավաքները: Սակայն, ինչպես նշեց նա, եթե մինչ նշանակված օրը կառավարությունը չփոխի իր դիրքորոշումը եւ չհրապարակի ցանկը՝ կազմակերպությունները կվերսկսեն ազատ խոսքի պաշտպանությանը եւ «Ա1+»-ին նվիրված բողոքի գործողությունները: Ի դեպ, Մեսրոպ Մովսեսյանը նաեւ տեղեկացրեց, որ կառավարությունը դեռեւս չի արձագանքել ազատ հաճախությունների հրապարակման պահանջին: «Կառավարությունը համառորեն լռում է, մենք էլ համառորեն սպասում ենք»,- ասաց նա: «Փակված լինելու 3 տարիների ընթացքում մեզնից ի՞նչ էիք ակնկալում եւ ի՞նչ չստացաք»,- Մեսրոպ Մովսեսյանին հարց ուղղեց «Հանրային ռադիոյի» թղթակիցը: «Ես ակնկալում էի, որ մեր օրինակը, այս աղմուկը կաշխատեր մամուլի, հեռուստաընկերությունների համախմբման օգտին: Բայց նրանք ընտրեցին ուրիշ ուղի: Հեռուստատեսությունը բիզնես է, բայց նաեւ՝ գաղափարախոսական զենք: Իսկ թե ով է ղեկավարում այդ զենքը՝ արդեն ուրիշ հարց է»,- պատասխանեց «Ա1+» հեռուստաընկերության նախագահը: Մեսրոպ Մովսեսյանը, սակայն, հայտնեց, որ «Ա1+»-ի կոլեկտիվի հետ համագործակցող հասարակական կազմակերպությունների թիվը հասել է 12-ի: Մինչդեռ հեռուստաալիքի գործունեության շրջանում դրանց թիվը չէր անցնում 7-ից: Հեռուստաընկերության նախագահը նաեւ տեղեկացրեց, որ Մարդու իրավունքների եվրոպական դատարանը «Ա1+»-ի հարցը կլսի հավանաբար ապրիլի վերջին կամ մայիսի սկզբին: Սեփ. լր.
