ԻՆՉՈ՞Ւ
ԳԵՂԱՄՅԱՆԸ ՉԳՆԱՑ ԲՐՅՈՒՍԵԼ Բրյուսելում կայացած ԼՂ հարցով ԵԱՀԿ
զեկուցող Գորան Լենմարկերի զեկույցի նախագծի քննարկմանը ԵԱՀԿ հայաստանյան պատվիրակության
երեք անդամից մասնակցում էր երկուսը՝ պատվիրակության ղեկավար Վահան Հովհաննիսյանը
եւ Սամվել Նիկոյանը: Մյուս անդամը՝ «Ազգային միաբանություն» կուսակցության
ղեկավար Արտաշես Գեղամյանը ներկա չէր: Պատվիրակության ղեկավար Վահան Հովհաննիսյանից
հետաքրքրվեցինք, թե ի՞նչն էր պատճառը. գուցե ինչ-որ մեկը վախեցե՞լ է նրա բոցաշունչ
ելույթներից: Վ. Հովհաննիսյանը պարզաբանեց. «Նախ, վերջին նստաշրջանների ընթացքում
պարոն Գեղամյանը ընդհանրապես ելույթներ չի ունենում, ոչ բոցաշունչ, ոչ՝ սառնասիրտ:
Մեկ անգամ է նա բոցաշունչ ելույթ ունեցել, որը կապված էր Հայաստանի ընտրությունների
վերաբերյալ իր դժգոհությանը, եւ դա տեղի է ունեցել մոտավորապես մեկ տարի առաջ: Վերջին
անգամ Վիեննայում նա ընդհանրապես որեւէ ելույթ չի ունեցել: Ինչ վերաբերում է` ինչո՞ւ
նրան չեն տարել, գիտե՞ք, դա տուրիստական ճամփորդություն չի, որ ինչ-որ մեկին հետդ
տանես: Սկզբում մեզ առաջարկվել էր յուրաքանչյուր պատվիրակությունից ընդամենը մեկական
մարդ՝ առաջարկվել էր միայն պատվիրակությունների ղեկավարներին, սակայն ադրբեջանցիները
պահանջեցին, որ լինեն երկուսը: Եթե դուք ծանոթանաք նրանց պատվիրակության ղեկավարին,
հասկանալի կլինի՝ ինչո՞ւ: Բնական է, որ առաջացավ նաեւ մեր կողմից երկուսով գնալու
անհրաժեշտություն, եւ ես, որպես պատվիրակության ղեկավար, որոշեցի, որ այդ երկրորդը
պետք է լինի Սամվել Նիկոյանը: Այնպես չի, որ հրավիրել էին ամբողջ պատվիրակությանը,
իսկ մենք որոշել ենք, թե ով չգնա: Ընդհակառակը, ես որոշել եմ՝ ով գնա, եւ կարծում
եմ, ճիշտ եմ որոշել»: Մ. Ե.
