Համոզված
է թաղապետ Լեւոն Հարությունյանը Մարտի 12-ին Փարիզի Սպորտային պալատում արդեն
58-րդ անգամ կայացավ «Միսս Եվրոպա» գեղեցկության ու նրբագեղության մրցույթը: Այս
տարի 36 երկրների գեղեցկուհիների թվում Հայաստանը ներկայացրեց «Միսս Հայաստան-2003»
մրցույթի տիտղոսակիր Լուսինե Թովմասյանը: Նա 18 տարեկան է, հասակը՝ 179 սմ, քաշը՝
53 կգ: Լուսինեի ցանկությունն էր՝ հայտնվել գոնե լավագույն հնգյակում: Սակայն նա
գերազանցեց բոլորի սպասելիքները՝ արժանանալով «Վիցե միսս» կոչմանը: Հայ գեղեցկուհի
Լուսինե Թովմասյանին հաղթանակի առիթով առաջինը Արաբկիր համայնքի թաղապետ Լեւոն Հարությունյանը
շնորհավորեց: Երեկ պարոն Հարությունյանը թաղապետարանում ընդունելություն էր կազմակերպել,
որի ընթացքում հաճելի անակնկալ մատուցեց՝ հպարտանալով, որ գեղեցկուհին իրենց համայնքից
է: Կարեւորելով միջազգային մրցույթում Հայաստանի մասնակցությունը, Լ. Հարությունյանը
հայ գեղեցկուհու հաղթանակը մեր երկրի համար մեծ ձեռքբերում համարեց եւ «Վիցե միսս
Եվրոպա» տիտղոսին արժանանալու համար հայ գեղեցկուհուն $1500 նվիրեց. «Ձեր հաղթանակը
մեր ազգի հաղթանակն էր: Ձեր համարձակ քայլով աշխարհին ցույց տվեցիք, թե ով է հայ
կինը»: Հիշեցնենք, որ Լուսինե Թովմասյանը շահելով «Վիցե միսս Եվրոպա» տիտղոսը, ոչ
մի դրամական մրցանակ չի ստացել: Թաղապետի կարծիքով, չնայած ժյուրիի ընտրությանը,
«Միսս Եվրոպայի» տիտղոսին արժանի էր հենց մեր հայ գեղեցկուհին՝ Լուսինեն: Լ. Հարությունյանը
գեղեցկուհու հետ հանդիպման ժամանակ հպարտացավ, որ Արաբկիր համայնքը երեք «Միսս Հայաստան»
է տվել. «Միսս Հայաստան 98-ը», 2001-ը եւ 2003-ը մեր համայնքից են, նշանակում է՝
մեր համայնքը ամենագեղեցիկների համայնքն է»: Հանդիպման ընթացքում թաղապետը Լուսինեից
հետաքրքրվեց, թե հուզվո՞ւմ էր արդյոք մրցույթի ժամանակ կամ ի՞նչ զգացողություններ
ուներ, երբ հաղթողների թվում իր անունը հնչեց: Թաղապետից ստացած գումարը Լուսինեն
պատրաստվում է իր կարիքների համար ծախսել: Իսկ համայնքի եւ ապագա բոլոր գեղեցկուհիներին
Լուսինեն կոչ է անում վստահել սեփական ուժերին եւ «անպայման կհաղթեն»: 2005-ը Արաբկիր
համայնքի համար հոբելյանական է, քանի որ այս տարի լրանում է համայնքի 80-ամյակը:
Այդ կապակցությամբ, թաղապետի խոսքերով, համայնքում տեղի ունեցող բոլոր միջոցառումները
հանդիսավոր են տոնվելու: R
