Երեւանի
«Այրարատ» տոնավաճառի ետնամասով՝ Ագաթանգեղոսի փողոցով քայլելիս գրեթե բոլոր երիտասարդ
աղջիկներն էլ արդեն գիտեն, որ մայթի երկայնքով «սփռված» (մինչեւ կրկես) տղամարդկանց
հայացքները, ցինիկ ռեպլիկները պետք է հանգիստ ընդունեն կամ էլ չլսելու տան: Դրանցից
խուսափել, մայթի որեւէ հատվածում, հնարավոր չէ: Խորենացու խաչմերուկից մինչեւ կրկես
անանցանելի է «ֆայլաբազարի» պատճառով: «Առավոտը» բազմիցս անդրադարձել է այս խնդրին,
սակայն ոչինչ չփոխվեց՝ վարձու աշխատողներին Երեւանի քաղաքապետարանը նոր տեղ չառաջարկեց:
«Ֆայլաբազարի» նախկին տարածքում այժմ կանգնում են բեռնատար մեքենաներ, հավանաբար
դրանք հատուկ շուք են հաղորդում քաղաքի կենտրոնում, գլխավոր հրապարակից ոչ այնքան
հեռու գտնվող այս տարածքին: Անցյալ տարվանից այստեղ հիմնադրվել է «մինի» ավտոկայան,
որտեղից երթուղային տաքսիներով մարդիկ մեկնում են մարզեր: Նախկինում «ստարտը» Շահումյանի
անվան հրապարակից էր: «Գազելները» կայանվում են հենց մայթին, ինչը առաջացնում է խցանումներ
եւ անհարմարություն՝ մարդկանց անցուդարձի համար: Այդտեղով անցնելիս պետք է հագնել
երկաթե կոշիկներ, իսկ ձեռքին ունենալ նախնադարից ժառանգած վահան, որպեսզի պաշտպանվել
շրջապատողների թքից ու խորխից: Իսկ ականջներն անհրաժեշտ է խցանել բամբակով, որովհետեւ
ինչ- որ վարորդ կարող է ականջիդ տակ գոռալ՝ «Գյումրի եկող, քուրո, արի Գյումրի տանենք»,
ինչն ուղեկցվում է մյուսների ցինիկ ծիծաղով: Պետք չէ սխալվել ու այս տարածքում ժամադրվել.
մի քանի րոպե այդտեղ կանգնած կինը վարորդներին մարմնավաճառ է թվում, քանզի մի քանի
քայլ հեռու, մութն ընկնելուց հետո, հավաքվում են «գիշերային թիթեռնիկները»: Կապի
եւ տրանսպորտի նախարարությունից մեզ տեղեկացրին, որ երբ հայտարարվում է երթուղու
մրցույթ, որոշվում է երթուղու սկզբնակետն ու վերջնակետը: Եթե երթուղու սկզբնակետը
կամ վերջնակետը նախատեսվում է Երեւանում, հավաքակայանի տեղն առաջարկում է Երեւանի
քաղաքապետարանը: Վարորդները երբեք ինքնակամ չեն կարող իրենց համար հավաքատեղի ընտրել:
Կապի եւ տրանսպորտի նախարարությունում եւս համաձայն են, որ Գյումրիի երթուղայիններն
անհարմար տեղում են կայանվում, սակայն ոչինչ փոխել չեն կարող մինչեւ հաջորդ մրցույթը:
Ժամկետը դեռ նախանշված չէ, բայց նախարարությունը խոստացավ, որ հատուկ ուշադրություն
կդարձնի նաեւ երթուղու սկզբնակետ եւ վերջնակետ ընտրված տեղերին: ՀՐԱՉՈՒՀԻ
ԵՐԱՆՈՍՅԱՆ
