Ի՞ՆՉ
ԵՔ ԱԿՆԿԱԼՈՒՄ ԱՊԱԳԱ ԻՇԽԱՆՈՒԹՅՈՒՆԻՑ Այս հարցի պատասխանն էր
ակնկալում ստանալ «Նոր ժամանակներ» կուսակցության նախագահ Արամ Կարապետյանը արվեստագետներից։
Երեկ նա հանդիպեց ազգի սերուցքին` Ջիվան Գասպարյան, Ռուբեն Գեւորգյանց, Վիգեն Չալդրանյան,
Լեւոն Չաուշյան, Արա Սաթյան, Հրաչյա Աշուղյան, Թերեզա Միրզոյան եւ այլք։ Վիգեն Չալդրանյանը
Արամ Կարապետյանի «ի՞նչ անել» հարցին պատասխանեց չեխովաբար. «Պետք է գործ անել, պարոնա՛յք»:
Պրն Չալդրանյանը խոսեց մեզանում արժեքային համակարգերի կորստի մասին` իր խոսքը համեմելով
համաշխարհային դասականների ասույթներով։ Այնուհետեւ պատմեց, որ չնայած իր ընտանիքը
գտնվում է ԱՄՆ-ում՝ ինքը բոլոր ցուրտ ձմեռներն այստեղ է անցկացրել։ Իբրեւ եզրահանգում
պրն Չալդրանյանը նախորդներին, ներկաներին, ապագաներին հորդորեց՝ «օգնեք տաղանդավորներին,
միջակությունները իրենք իրենց ճանապարհը կհարթեն (միտքը պատկանում է սովետական կինոռեժիսոր
Միխայիլ Ռոմին)։ Թե չէ` թառամած մեխակները կպած ուզում են ինչ-որ մեկին նվիրել. սա
է մեր մշակույթի դեւիզը»: Ռուբեն Գեւորգյանցը գործնական առաջարկ արեց. «Պետությունը
պետք է հսկի ազգային, ազգայնական գաղափարախոսությունը։ Մենք իրավունք չունենք մեր
փողոցներում թուրքական երաժշտություն լսել։ Մենք երազում ենք, որ պետությունը մեզ
պատվեր տա, նախկինում այդպես էր։ Չեմ ասում կոմունիզմը լավն էր, բայց պետք է հսկողություն
լինի: Թե չէ, ի դեմս մշակույթի, ազգի դեմքն ենք կորցրել»։ Այս կոնտեքստում Լեւոն
Չաուշյանը նկատեց, որ ՍՍՀՄ օրոք ազգային մտածելակերպը շատ ավելի մեծ էր, քան այսօր։
Ն. Գ.
