Շաբաթ օրը մայրաքաղաքի
«Կիլիկիա» մարզադահլիճում մեկնարկեց մինի ֆուտբոլի սիրողական թիմերի Հայաստանի գավաթի
երկրորդ խաղարկությունը: Այն հանրապետության ֆուտբոլի ֆեդերացիայի մրցավարական
անձնակազմի աջակցությամբ կազմակերպել է «Տիգրանպրես» ՍՊԸ-ն: Հանդիպումներն անցկացվում
են միայն հանգստյան օրերին, որին մասնակցում են ութ թիմեր: Դրանք բաժանվել են երկու
խմբի: Երկուական հաղթողները պայքարը կշարունակեն կիսաեզրափակիչ փուլում, իսկ եզրափակիչը
կկայանա մարտի 27-ին, որից հետո՝ նաեւ պարգեւատրման արարողությունը: Մրցաշարի
նպատակը հիմնարկների եւ ձեռնարկությունների աշխատողների շրջանում առողջ ապրելակերպ
տարածելն է, նրանց մասսայական սպորտին հաղորդակից դարձնելը: Առաջին տուրում
«A» խմբում Երեւանի գարեջրի գործարանը համառ պայքարում 3:2 հաշվով առավելության հասավ
Աբովյանի «Նախշ» (նախկին «Շողակն») թիմի նկատմամբ, իսկ «Զիգզագ» ընկերության թիմը
12:1 հաշվով ջախջախեց արդշինինվեստբանկցիներին: Երկրորդ՝ «B» խմբում, «Կենտրոն»
եւ «Թալգրիգ» թիմերի մրցակցությունն ավարտվեց ոչ-ոքի՝ 4:4 հաշվով: Հարկ է նշել, որ
«Թալգրիգ» ՍՊԸ-ն հովանավորում է ոչ միայն համանուն պրոֆեսիոնալ թիմը, որը ներկայումս
մինի ֆուտբոլի Հայաստանի առաջնության առաջատարն է, այլեւ ունի սիրողական թիմ, որի
կազմում այս մրցաշարում իր աշխատակիցների հետ միասին հանդես է գալիս ընկերության
տնօրեն, ֆուտբոլի մեծ սիրահար Թովմաս Գրիգորյանը: Խմբի մյուս զույգի՝ «Ավերս Վեստ»
եւ «Իմպուլս» հանդիպումն ավարտվեց առաջինի հաղթանակով՝ 6:3: Պետք է ասել,
որ սիրողական ֆուտբոլը մեծապես խթանում է պրոֆեսիոնալ ֆուտբոլի զարգացումը հանրապետությունում:
Բավական է հիշել, որ ժամանակին սիրողական մրցաշարերում հանդես եկող երկու թիմեր՝
«Թալգրիգն» ու «Սպիտակ տնակը» հետագայում տեղափոխվեցին մինի ֆուտբոլի Հայաստանի պրոֆեսիոնալ
առաջնություն: Տեղեկացնենք նաեւ, որ սիրողական մինի ֆուտբոլի Հայաստանի գավաթի
անդրանիկ խաղարկությունը եղել է 2003 թվականին: Այն ժամանակ պատվավոր մրցանակը նվաճել
է «Պենտա» թիմը: ՏԻԳՐԱՆ ՀՈՎՀԱՆՆԻՍՅԱՆ «Տիգրանպրես» ՍՊԸ-ի
տնօրեն, մրցաշարի կազմկոմիտեի նախագահ
