Հայհոյանքներով՝ գրերի գյուտին ընդառաջ Հերթական ասուլիսը Պարույր Հայրիկյանի կարծիքով, հավանաբար, ազնիվ մղումներով էր հրավիրված, սակայն այս անգամ էլ ստացվեց՝ ինչպես միշտ: «Ես կփորձեմ լինել բարեկիրթ, բայց նյութն այնպիսին է, որ ժամանակի ընթացքում գնահատականներ տալիս բարեկրթությամբ չեմ սահմանափակվի, որովհետեւ ստոր արարքները երբեք չի կարելի բարեկրթորեն գնահատել»,- նախապես զգուշացրեց նա: ԱԻՄ նախագահը հայոց այբուբենի ստեղծման 1600-ամյակի ու «պատասխանատվության զգացումով տոգորված քաղաքացիների համար ընդհանրական կյանքի բարելավման նպատակով սահմանադրական բարեփոխումների ենթակա հասունացած հարցերի» փունջը ներկայացնելիս, իրենից անկախ, հայհոյանքների տարափ տեղաց «տգետ հայ ազգի» հասցեին: Նրա համոզմամբ, «բոլշեւիկյան թափթփուկները երեկվա պարտորգ կամ խամաճիկ լեզվաբանների աջակցությամբ առայսօր շարունակում են պղծել մեր լեզուն», համարելով, որ դասական ուղղագրությունը հնացած է: Հակառակն ապացուցելու համար Հայրիկյանը ի ցույց դրեց իր լեզվամանկավարժական բոլոր ընդունակությունները: Ստիպված եղավ լրագրողներիս բացատրել «այնպիսի բաներ, որ դպրոցներում չեն սովորեցնում»: Նույնիսկ բանավոր օրինակներ բերեց, որ կաթի «սերն» ու «սէրը», կամ «գետն» ու «գէտը» (գիտուն), միատեսակ արտասանվում, սակայն ազգային ուղղագրությամբ տարբեր կերպ են գրվում: «Տեղեկացանք» նաեւ, որ մեր ազգանունները տվյալ բառի սեռական հոլովն են եւ այլն: Հայրիկյանը սեփական փորձով համոզվել է, որ 3-4 դասաժամը բավական է, որպեսզի դասական ուղղագրության մասին նվազագույն պատկերացումները ապահովված լինեն: «Էդ ուղղագրության մասին ասում են մեռած է… փչացած է, վատն է: Էդպես ասողները հենց իրենք են փչացած»,- ամոթանք տվեց Հայրիկյանը «մեծն Մաշտոցի նկատմամբ փոքրիշատե հարգանք չունեցող» հայերին: «Հայաստանի ազգային ակադեմիան այս տարի պետք է հանդես գա ազգային մեսրոպյան ուղղագրության վերականգնման նախաձեռնությամբ: Դա կլինի մեծագույն հարգանքի տուրքը 1600-ամյակին, մնացածը բաշիբոզուկություն է»,- հայտարարեց ԱԻՄ նախագահը: Նա կոչ արեց ճիգ գործադրել իր նման՝ իսկական հայ դառնալու համար. «1600-ամյակը մեծագույն առիթն է հայախոս բոլշեւիկյան թափթփուկ լինելուց ձերբազատվելու համար… 6 ամսվա ընթացքում ադրբեջանցիներն իրենց ամբողջ այբուբենը փոխեցին, իսկ մեզ պետք է ընդամենը մի քանի կանոններ փոխել»: Հայրիկյանը խոսեց նաեւ սահմանադրական բարեփոխումներից: Նրա համոզմամբ, ազգովին գնում ենք այդ բարեփոխումների ձախողման. «Հասունացել են բազմաթիվ հարցեր, որոնք պահանջում են սահմանադրական բարեփոխումներ, սակայն այդ ամենին խոչընդոտում է մի կողմից իշխանությունների պնդաճակատությունը եւ սահմանադրական գործընթաց իրականացնելու անհաղորդ վարվելակերպը, մյուս կողմից ընդդիմության ոչ խորը պատասխանատվության զգացումը»: Ըստ Հայրիկյանի, Սահմանադրական հանրաքվեն կտապալվի, բայց չի կեղծվի, քանի որ «այն, իշխանություններին, մասնավորապես՝ Ռոբերտ Քոչարյանին պետք չի… Քոչարյանը արցախակենտրոն քաղաքական գործիչ է՝ զուրկ ազգային մտածելակերպից»: Մինչդեռ, ըստ ԱԻՄ առաջնորդի. «Արցախը չէ հայ ժողովրդի գոյատեւման խնդիրը, այլ ազգային մտածողությունը»: ԳՈՀԱՐ ՀԱԿՈԲՅԱՆ
