«Ա1+»-ԻՆ
ՈՒԶՈՒՄ ԵՆ ՎՏԱՐԵԼ Տնտեսական դատարանի դատավոր Անատոլի Մաթեւոսյանը
մարտի 9-ին տեղեկացրել է, որ ապրիլի 5-ին ժամը 10-ին քննության է առնելու Գիտությունների
ազգային ակադեմիայի հայցը «Մելտեքս» ընկերությանը Լուսավորչի-15-ում իր վարձակալած
տարածքից վտարելու պահանջով: «Ինձ ուղղակի շատ է զարմացնում, թե ինչու միայն տարածքից՝
թող երկրի՛ց վտարեն»,- հեգնեց «Մելտեքս» ընկերության եւ «Ա1+»-ի նախագահ Մեսրոպ Մովսեսյանը:
Ակադեմիան իր հայցադիմումում մասնավորապես նշել է, թե «Մելտեքս»-ին մինչեւ 2005-ի
հունվարի 15-ը ժամկետ էր տրվել տարածքները կամովին ազատելու համար. «Սակայն չի ազատել
եւ որեւէ գրավոր պատասխան չի տվել»: Մեսրոպ Մովսեսյանը պնդեց, թե այս փաստարկն ուղղակի
սուտ է. «Ես պատասխան տվել եմ՝ ուղարկել եմ իրենց տեղակալ Բադեյանի ստորագրությամբ
եւ մակագրությամբ վավերացված փոխադարձ ակտ-հաշիվը մեր կատարած ծախսերի վերաբերյալ:
Նա ընդունել է, որ մենք 32 հազար դոլարի չափով գումար ենք ծախսել, որը պիտի հանվեր
մեր վարձակալության վճարից, սակայն մենք այն մուծել էինք մինչեւ իրենց նախազգուշացում-նամակները
ստանալը: Հիմա նրանք պնդում են, թե մենք դեռ պարտքեր էլ ենք կուտակել, չնայած իրենք
են այդ գումարը պարտք մեզ: Ո՞վ պետք է հատուցի այն, նաեւ դեմոնտաժային եւ տեղափոխման
ծախսերը»: Մեր հարցին, թե այդ դեպքում գուցե անհրաժեշտ էր, որ «Մելտեքսը» հակընդդեմ
հայցով դիմի տնտեսական դատարան, որ պարտավորեցնի ակադեմիային հատուցել պատճառված
վնասը՝ պրն Մովսեսյանը պատասխանեց. «Անպայման այդպես էլ կանենք»: Իր մրցութային
տարբեր առաջարկներում «Ա1+»-ը միշտ նշել է, թե նախնական պայմանավորվածություն ունեն
3 տարածքների վերաբերյալ՝ կապուղի ստանալու դեպքում այնտեղ տեղափոխվելու վերաբերյալ:
Մեր հարցին, թե ինչո՞ւ այժմ չի տեղափոխվում այդ տարածքներից որեւէ մեկը՝ «Ա1+»-ի
նախագահը պատասխանեց. «Տարածքներից մեկն արդեն հանձնվել է ուրիշին: Իսկ մյուս տարածքները
պահանջում են մեծ ներդրումներ՝ նորոգման ծախսեր եւ այլն: Թող փոխհատուցեն մեր ծախսած
գումարները՝ կտեղափոխվենք»: Ի դեպ՝ նաեւ խտրական վերաբերմունք է ցուցաբերվել եւ վտարելու
պահանջ չի առաջադրվել պետռեգիստրին եւ «Գարուն» ամսագրին: «Երբ արդարադատության նախարարությունն
էլ ազատի տարածքը՝ մենք սուսուփուս կհեռանանք»,- խոստացավ «Ա1+»-ի նախագահը: Ա.
Ի.
