ԳԵՆԵՐԱԼԸ, ԴԱՏԱԽԱԶԸ ԵՎ ՈՍՏԻԿԱՆԱՊԵՏԸ ԶԲԱՂՎՈՒՄ ԵՆ ՌԵԿԵՏՈ՞Վ Հետախուզման մեջ գտնվող Վահան Հարությունյանը «հանձնվելուց» առաջ գրում է «Առավոտին» Անցյալ տարի գարնան ամիսներին Վարդենիսում աշխատանք էի ճարել: Իմ ղեկավարած ձեռնարկությունը ապամոնտաժում էր մի խողովակագիծ, որը գտնվում էր տեղի անտառում: Հազիվ էի սկսել աշխատանքը, երբ ինձ իր մոտ կանչեց Գեղարքունիքի մարզի դատախազի օգնական Վարդան Հարությունյանը (այսուհետեւ՝ դատախազ): Իմ գործողությունները օրինական էին, բայց նրա ուզած խողովակների քանակն այնքան էր, որ «ընկերաբար» չէի կարող նրան «նվիրել»: Հրաժարվեցի, իսկ օրեր հետո խողովակագիծը վաճառող ձեռնարկության տնօրեն Թաթուլ Կարապետյանը ինձ ասաց, որ պետք է դատախազին տա 100 տոննա խողովակ: «Թե չէ,- ասաց նա,- նրանից պրծում չկա»: Դատախազը ինձ վճարեց ապամոնտաժման համար պահանջվող ծախսի կեսը՝ $700, ես իմ գործն արեցի, բայց նա տարավ ապամոնտաժված խողովակների միայն մի մասը՝ հանդիպելով գնող կազմակերպության դիմադրությանը: Գործս հարամ եղավ, այն կիսատ թողեցի ու հեռացա: Դատախազը զանգեց. «Ապեր, մենք ենք մարդ ման գալիս, որ քցենք, դու մե՞զ ես քցում»: Նա ինձնից պահանջեց իր տված $700-ը: Ես հրաժարվեցի, ասելով, որ կատարել եմ իմ գործը, իսկ ինքը չի կարողացել տեղափոխել ապամոնտաժված խողովակները: Օրեր անց դատախազը նորից զանգեց եւ ասաց, որ «Սեւան» ազգային պարկի աշխատակիցը ակտ է գրել՝ անտառին վնաս հասցնելու համար: Այդ ժամանակ ես Կոտայքի մարզի Նոր Արտամետ գյուղում ճանապարհաշինարարական աշխատանքներ էի կատարում: Այդ աշխատանքների դիմաց ստացված գումարներից $ 700 տվեցի դատախազին: Մի քանի օր անց դատախազը նորից զանգեց. «Բա էդ ա՞կտը… Լա՜վ, արի՛, մեր ախպորը կօգնենք, ակտի մասին կմոռացվի»: Պարզվեց, որ «ախպերը» ՀՀ պաշտպանության ԶՈՒ երկրորդ կորպուսի հրամանատար, գեներալ Հայկազ Բաղմանյանն է, այսուհետեւ՝ «գեներալ»: Գեներալի տված չնչին գումարներով պետք է ապամոնտաժեի տեղի չգործող գազատարը: Ինձ գեներալի մոտ տարավ Վարդենիսի ոստիկանության բաժանմունքի պետ Վիտյա Հակոբյանը: Գեներալի տված $8000 գումարից Վիտյան, այսուհետեւ՝ «ոստիկանապետ», ու դատախազը վերցրին $1000-ական, որից հետո անցա աշխատանքի: Հրաժարվելը արդեն «բազար» կլիներ: Գեներալի գործը չտուժեց: Նոր Արտամետի գործի դիմաց եւ վարդենիսցի մի քանի գործարարներից վերցրած միջոցները փոխհատուցեցին ֆինանսային պակասորդը, իսկ Կոտայքի մարզում մնացին չվճարված պարտքեր: Հույս կար փառքով դուրս գալ ստեղծված իրավիճակից, եթե գեներալը վճարեր կատարված աշխատանքի դիմաց՝ գոնե համեստ հաշվարկներով: Բայց գեներալի միտքն էլ էր ծուռ: Գեներալն ինձ փակեց զորամասում ու պահանջեց իմ կյանքի դիմաց իրեն տալ իր տված ամբողջ գումարը՝ գումարած $7000 տուգանք: Ես խնդրեցի գեներալի օգնական, կապիտան Արկադիկ Եսիմինչյանին՝ ինձ տանել դատախազի մոտ, որ նրա միջոցով իբր հաղորդեմ հարազատներիս, որ փող ճարեն: Դատախազը առանձին զրուցեց ինձ հետ ու տվեց $1000, ասելով, որ ինքը դրանով ձեռքերը լվանում է այդ գործից: Նրա մտածած սցենարով ես, իր վարորդը եւ իր տանը այդ պահին գտնվող Գեղաքար գյուղի գյուղապետը գնացինք «փող ճարելու»: Որոշ ժամանակ հետո վերադարձանք եւ ես ասացի, որ ծանոթներիցս մի կերպ $1000 գումար եմ ճարել: Հաջորդ օրը իմ խնդրանքով Արկադիկը ինձ տարավ ոստիկանապետի մոտ: Վերջինս մեզ ընդունեց դժկամությամբ, զանգեց գեներալին, հետո մեկնաբանեց հեռախոսազրույցը, ըստ որի, ես պետք է ազատ արձակվեի եւ 10 օրում կատարեի գեներալի պահանջը, այլապես ոստիկանապետը պետք է իմ նկատմամբ գործ հարուցեր եւ ձերբակալման պահին ինձ պետք է սպանեին՝ ձեւակերպելով որպես իմ կողմից փախուստի փորձ, իսկ իրենց կողմից՝ անհրաժեշտ գործողություն: Ես խոնարհաբար համաձայնեցի ու հեռացա: «Գեներալ Հայկազի ձեռքն եմ ընկել» իմ հրապարակումից հետո Զինդատախազությունում քրգործ հարուցվեց: Հետո պարզվեց, որ Վարդենիսում ոստիկանապետը արդեն, ինձ երկար սպասելուց հետո, նախապատրաստել էր նյութեր՝ իմ դեմ քրգործ հարուցելու համար: Դատախազը իր վարորդի ու Գեղաքարի գյուղապետի հետ ինձ այցելեց ու խնդրեց, որ իր մասին եւ ընդհանրապես մեր մութ հարաբերությունների մասին «կոլխոզում ոչ մի խոսք»: Անցել է արդեն 3-4 ամիս: Նրանց նախաձեռնությամբ (դրանում ես համոզված եմ) Կոտայքի մարզի դատախազությունում իմ դեմ քրգործ է հարուցվել: Ուզում եմ դիմել ՀՀ նախագահ Ռոբերտ Քոչարյանին եւ ասել՝ մեր հայրենիքի պաշտպան գեներալը, կարգուկանոնի պաշտպան ոստիկանապետը, օրենքի պաշտպան դատախազը եթե սրանք են, բա այսքան տարի նա այս երկրում ի՞նչ է անում: Մտադիր եմ դուրս գալ թաքստոցից, ներկայանալ քննչական մարմիններին, եթե ՀՀ նախագահն անձամբ հետեւի ԶԴ-ում եւ Կոտայքի մարզի դատախազությունում առկա գործի ընթացքին, տան ինձ անձնական անվտանգության երաշխիքներ: ՎԱՀԱՆ ՀԱՐՈՒԹՅՈՒՆՅԱՆՊատրաստակամ ենք ներկայացնել այդ մթին պատմության մեջ ներգրավված հակառակ կողմի (կողմերի) տեսակետը:
