ՀԺԿ
պատվիրակությունը երեկ Ալավերդիում էր Երեկ Հայաստանի ժողովրդական կուսակցության
նախագահ Ստեփան Դեմիրճյանը Ալավերդիում մասնակցեց կանանց կենտրոնի բացմանը: Բանն
այն է, որ ՀԺԿ-ն շվեդական պառլամենտական ձախ կուսակցության հետ համատեղ Հայաստանում
ձեռնարկել է կանանց իրավունքների պաշտպանության ծրագրերի իրականացում: Առաջին ծրագիրն
իրագործվում է Ալավերդի քաղաքում, ինչի համար էլ հիմնադրվել է կանանց աջակցության
կենտրոնը: Կենտրոնի ղեկավարն է ՀԺԿ Թումանյանի տարածքային կազմակերպության նախագահ
Լարիսա Փարեմուզյանը: Մինչ կենտրոն այցելելը՝ Ստեփան Դեմիրճյանն իր ելույթով եզրափակեց
նախորդ օրը մեկնարկած սեմինարը, որի ընթացքում գենդերային հարցերին զուգահեռ քննարկվել
էին նաեւ տարածաշրջանային էկոլոգիական հարցեր: Ի պատասխան արծարծված մտահոգությունների՝
ՀԺԿ ղեկավարն իր ելույթում նկատեց. «Ընդհանրապես, մեր երկրում օդը պետք է մաքրվի՝
բոլոր առումներով: Պետք է արմատախիլ արվի ամենաթողությունը եւ կարվի»: Բնականաբար,
եղան նաեւ քաղաքական բնույթի հարցադրումներ: ««Արդարությունը» հռչակելու կուրս չունի:
Վաղուց ամեն ինչ հռչակված է: Անում ենք առանց ամպագոռգոռ հայտարարությունների, առանց
ժամկետներ նշելու: Մենք մեր գործն անում ենք կոնկրետ եւ հասնելու ենք երկրում սահմանադրական
կարգի վերականգնմանը»,- Արամ Կարապետյանի բոստանը քար շպրտեց նա: Ինչ վերաբերում
է ՀԺԿ-«Հանրապետություն» հարաբերություններին՝ «Դաշինքում ամեն ինչ նորմալ է: Բոլոր
խոսակցությունները տարածվում են վարկաբեկելու համար: Դաշինքում նորմալ է՝ երկրում
նորմալ չի. ոնց որ էս երկրի պրոբլեմը դաշինքն է»,- նեղսրտեց Ստ. Դեմիրճյանը: Իսկ
պարոն Դեմիրճյանին ընդառաջ եկած ալավերդցիներից Վանիկ Գրիգորյանը անկեղծ պոռթկաց.
«Էս ընդդիմությունները վերջերս գործ չեն անում: Ճի՞շտ եմ հարցը տալիս»: «Դե, եթե
գոհ չեք, ուրեմն պետք է ավելի շատ անենք: Քանի դեռ մեր հռչակած նպատակներին չենք
հասել… ուրեմն լավ չենք աշխատում»,- եղավ Դեմիրճյանի պատասխանը: «Էդ խաբեբայություններին
վե՞րջ կլինի, թե՞ չէ: Էս երկու օրը հայտարարեցին, որ բյուջեն գերակատարել են, բայց
թոշակը, նպաստը ժողովրդին չեն տվել. ինչի՞ են խաբում, խաբելու համար էդ ղեկավարները
աշխատավարձ են ստանում»,- շարունակեց Վ. Գրիգորյանը: «Բա մենք էլ ենք ասում՝ էս երկիրը
դարձել է ստի, կեղծիքի երկիր: Իշխանությունն իրա համար է, ժողովուրդն իրա՝ ոչ մի
կապ չկա: Քանի ժողովրդի քվեն կեղծում են, արհամարհում են՝ էս վիճակն է լինելու: Դրա
համար էլ մենք ասում ենք՝ նախապայմանը էս իշխանության հեռացումը եւ օրինական իշխանության
ձեւավորումն է»,- հավելեց ՀԺԿ առաջնորդը: «Մինչեւ ընդդիմությունները չհամախմբվեն,
ոչնչի էլ չեն հասնի: Ձեր անհամաձայնությունն աշխատում է նախագահի օգտին»,- իր կարծիքը
բարձրաձայնեց Վրեժ Մայիլյանը: Իսկ «առաջիկա գարնանը Երեւանում միտինգներ սպասվո՞ւմ
են»: «Կոնկրետ միտինգի օր չեմ կարող ասել, բայց անհրաժեշտության դեպքում կլինեն:
Հուսահատվել պետք չի, մենք ձեզ հետ միասին երկիրն այս վիճակից դուրս ենք բերելու»,-
հույս տվեց ՀԺԿ ղեկավարը: Օրվա վերջում Ալավերդու մշակույթի պալատում ՀԺԿ-ական
պատվիրակությունը մասնակցեց կանանց աջակցության նորաբաց կենտրոնի կազմակերպած բազմազավակ
մայրերի մեծարման երեկոյին: ՆԵԼԼԻ ԳՐԻԳՈՐՅԱՆ
