Ամենաթափանցիկ կառույցը երկրի ընդերքո՞ւմ է Կամ՝ ինչպե՞ս է մեկին հաջողվում երկու անգամ բուժվել պետպատվերով, մյուսին՝ չի հաջողվում ընդհանրապես: Բրոնխիալ ասթմայով հիվանդ Արմենուհի Մելքոնյանը 2004թ. հուլիսին առողջապահության նախարարությունից պետպատվերով բուժվելու ուղեգիր է ստացել՝ Աղի հանքի հանրապետական անձավաբուժարանում բուժվելու համար: Դա բուժում է մի քանի տասնյակ մետր խորության վրա գտնվող անձավում: Բուժման արժեքը $310: Սակայն տիկնոջից պահանջել են հավելյալ 13 հազար դրամ. 3000-ը՝ գրանցման համար, 10 հազարը՝ համավճար՝ անձավաբուժարանի օդափոխությունն ապահովելու, վերելակից օգտվելու եւ այլ ծախսերի համար: Կինը պնդում է, որ մուծման դիմաց ոչ մի կտրոն չի տրամադրվել իրեն: Ուշագրավ է, որ, ըստ պետական առողջապահական գործակալության պարզաբանման, պետպատվերի մեջ ներառված են հիվանդի ընդունման եւ դուրսգրման հետ կապված փաստաթղթային ձեւակերպումները, բուժական մանիպուլյացիաները, լաբորատոր ստուգումները եւ այլն: Մինչդեռ, Ա. Մելքոնյանի դեպքը միակը չէ, որ պետպատվերի առկայությամբ էլ, այսպես կոչված, ծառայության ծախսեր են գանձվում հիվանդներից: Ընդհանրապես, պետպատվերի դեպքում սա գրեթե բոլոր բուժհիմնարկներում էլ ընդունված է: Առավել հետաքրքիր է այն, որ մի քանի ամիս անց, պետպատվերով բուժում ստացած Արմենուհի Մելքոնյանը կրկին պետպատվերը ձեռքին դիմել է Հանրապետական անձավաբուժական կենտրոնի տնօրեն Անդրանիկ Ոսկանյանին՝ նույն բուժումը ստանալու համար։ Բժշկի պատմելով, նա հիվանդին բացատրել է, որ ժամանակից շուտ բուժումը կրկնելը հակացուցված է: Սակայն երբ կինը համառել է, բժիշկն ասել է՝ «Եթե ուզում ես բուժվել՝ վճարիր եւ բուժվիր: Յուրաքանչյուր մուտքն անձավաբուժարան արժե 8 հազար դրամ»: Ուրեմն այն, ինչ հակացուցված է պետպատվերով, թույլատրելի է վճարովիի՞ դեպքում: Մեր այս հարցին, բժիշկը խուսանավող պատասխան տվեց: Մյուս ուշագրավ հանգամանքը՝ բժիշկների հավաստմամբ, կինն իրականում պետպատվերի երկրորդ ուղեգիր չի ստացել: Ենթադրում են, որ հիվանդը նույն ուղեգրով է ներկայացել բուժման, այն հանելով իր հիվանդության պատմության փաթեթից, որն, ի դեպ, գտնվում է անձավաբուժարանում: Բժշկական օգնության կազմակերպման վարչությունից եւս հաստատեցին, որ 2004-ի հոկտեմբեր, նոյեմբեր եւ դեկտեմբեր ամիսներին Ա. Մելքոնյանին պետպատվեր չի տրամադրվել: Ստացվում է, որ անձավաբուժարանն այս երկրի «ամենաթափանցիկ» կառույցն է, եւ ով ուզի, երբ ուզի, ինչ փաստաթուղթ ուզի՝ կարող է վերցնել, անգամ տեղյակ չպահելով բուժհիմնարկի աշխատակիցներին: ԼՈՒՍԻՆԵ ԲՈՒԴԱՂՅԱՆ
