«Աշխատեք աչքի չընկնել» Հորդորում է գլխավոր դատախազ Աղվան Հովսեփյանը Երեկ գլխավոր դատախազությունում ամփոփվեցին 2004-ին դատախազության մարմինների աշխատանքների արդյունքները: Զեկուցումներով հանդես եկան դատախազի տեղակալներ Մնացական Սարգսյանը, Գեւորգ Դանիելյանը, Արմեն Խաչատուրյանը, Գագիկ Ջհանգիրյանը եւ քննչական վարչության պետ Անդրանիկ Միրզոյանը: Անցյալ տարի հանրապետությունում գրանցվել էր 10083 հանցագործություն, որը նախորդ տարվա համեմատ 990-ով պակաս է: Նվազել էին անձի, սեռական անձեռնմխելիության դեմ ուղղված հանցագործությունները: Ըստ ՀՀ գլխավոր դատախազի տեղակալ Մ. Սարգսյանի, առավել տարածված հանցատեսակը քաղաքացիների եւ պետական գույքի հափշտակություններն էին՝ 39%: Ուշադրության է թերեւս արժանի այն, որ գրանցված հանցագործությունների 20%-ը պարտադիր զինվորական ծառայության զորակոչից խուսափելու գործերն էին: Կոլեգիայի նիստի ժամանակ բերվեց հետեւյալ վիճակագրությունը՝ կապված հանցագործությունների բացահայտման հետ: Չէին բացահայտվել 12 սպանության, ինչպես նաեւ՝ 6 սպանության փորձի, 41 ավազակության, կողոպուտի 20 դեպքեր: Ըստ զեկուցողի, թերություններն առկա են եղել նախաքննական մարմնի վարույթներում, նրանց պատրաստած գործերում: Գլխավոր դատախազ Աղվան Հովսեփյանը խոստովանեց, որ դատախազությունում կան հետաքննիչներ, որոնք իրավաբանական կրթություն չունեն՝ արդյունքում կազմվում են անորակ գործեր: Գլխավոր դատախազը նաեւ ցուցում տվեց գործ չհարուցել աննշան գործերի (օրինակ՝ հարեւանների վեճերի) դեպքերում: Առանձին խոսակցության թեմա դարձավ դատարաններում մեղադրանքի պաշտպանության արդյունավետության հարցը: Նշվեց, որ 2004-ին առաջին ատյանի դատարանները դատավճռի կայացմամբ քննել են 3330 քրեական գործ՝ 4256 անձի նկատմամբ: Դատապարտյալներից 47,2%-ի նկատմամբ կիրառվել է ազատազրկում: Ուշադրության արժանի էր այն, որ 181 քրեական գործով դատապարտվել է 246 անչափահաս, իսկ 202 քրեական գործով՝ 237 կին: Միայն անցյալ տարի քրեակատարողական հիմնարկներում գրանցվել էր 12 փախուստի դեպք, 2՝ դիտավորյալ մարմնական վնասվածքի, մեկ՝ օրինական պահանջներին չենթարկվելու, երկու դեպք՝ կապված թմրանյութ պահելու հետ: Գլխավոր դատախազը հանձնարարական էր տվել առավելագույնս կրճատել նախաքննության ժամկետը: Նա երեկ դիմելով դատախազության աշխատակիցներին, հորդորեց. «Աշխատեք աչքի չընկնել» եւ ուշադրություն հրավիրեց այն հանգամանքին, որ կալանավորների հետ ամիսներով քննչական գործողություններ չեն կատարվել: Որպես ժամկետների ձգձգման օրինակ բերվեց մի գործ Ավան եւ Նոր Նորքի դատարանում, երբ 4,5 տարի ձգձգվել էր քրեական գործի դատաքննությունը: Երեկ գլխավոր դատախազությունը մի նոր խստությամբ հանդես եկավ՝ «Փառք պիտի տաք, եթե բավարարվեք կարգապահական տույժով, քրեական գործ կհարուցեմ ցանկացած նման գործի համար»,- զգուշացրեց պրն Հովսեփյանը: ՌՈՒԶԱՆ ՄԻՆԱՍՅԱՆ
