Ձերբակալել են թաղմանը մասնակցելո՞ւ համար Թե՞ հանրահավաքներից հետո՝ այժմ էլ «ՏԷՑ-ի կռուգի» փոխհրաձգությունից հետո մարդիկ հանկարծ սկսեցին զազրախոսել: Երեկ մեր խմբագրությանը դիմեց Գետափի գյուղապետ Հակոբ Դալլաքյանը, որը պատմեց հետեւյալը. «Երկու օր առաջ մեր տուն են եկել Մասիսի եւ Չարբախի շուրջ 15 ոստիկաններ: Հյուրերի ներկայությամբ խուզարկություն են անցկացրել սենյակներում, ամեն ինչ խառնել իրար: Տանը տղաներս են եղել, կինս հեռախոսը վերցրել է, որ զանգահարի ինձ՝ լսափողը խլել են ձեռքից, շպրտել: Տղաներիս՝ Անուշավանին ու Աշոտին, տարել են նախ Շենգավիթի հենակետ, հետո տեղափոխել քաղմաս: Մեկ օր պահելուց հետո, երբ ցուցմունքներ են տվել, արձանագրություն կազմել՝ բերել են Չարբախի հենակետ: Դրանից հետո գործն ուղարկեցին Շենգավիթի դատարան: Դատավորը որոշեց նրանց 3 հազար դրամի վարչական տույժի ենթարկել՝ իբր զազրախոսելու համար: Բայց դատավարությունը հազիվ ավարտված՝ դատարանում հայտնվեց Շենգավիթի ոստիկանության պետի տեղակալ Հովիկ Սողոմոնյանը եւ իմանալով դատավճռի մասին, որից ակնհայտորեն դժգոհ էր՝ տղաներիս նորից մտցրեց մեքենա ու տարավ քաղմաս՝ թե 6-րդ վարչությունից են եկել, պետք է նորից ստուգեն եւ այլն»: Հակոբ Դալլաքյանը պարզաբանեց նաեւ, թե որն է այս ամենի պատճառը. նա որդիների հետ ներկա է եղել «ՏԷՑ-ի կռուգի» փոխհրաձգության ժամանակ սպանված Մհեր Տեր-Հարությունյանի թաղմանը. «Ես նրա ազգանունը չգիտեմ, ուղղակի թեթեւակի ծանոթ ենք եղել: Ջահել էր՝ գնացել ենք ցավակցելու: Այդ կապակցությամբ են տարել»: Փաստորեն՝ ոստիկանությունը նկարահանել է բոլոր նրանց, ովքեր մասնակցել են այս թաղմանը՝ եւ վարչական կալանք կիրառելով՝ փորձել ժամանակ շահել կատարված «ռազբորկային» հնարավոր առնչակցությունը պարզելու համար. «Երկու օր ապօրինի պահեցին: Բայց երբ տեսան, որ նրանք ոչ մի կապ չունեն՝ տղաներիս վրա ոստիկանի հետ զազրախոսելու հոդվածը դրեցին ու դատեցին: Իսկ թե հիմա նրանց ուզածն ի՞նչ է՝ չգիտեմ»: Սա թերեւս աննախադեպ դեպք է, որ անգամ դատարանի դահլիճից դուրս գալուց հետո էլ, երբ արդեն իսկ կայացվել է վճիռ՝ նորից ձերբակալեն: Կատարվածի առնչությամբ Հակոբ Դալլաքյանը դիմել է Հայաստանի մարդու իրավունքների պաշտպանի աշխատակազմին: «Առավոտն» իր ընթերցողներին տեղյակ կպահի այս միջադեպի հետագա զարգացումների մասին: Ա. Ի.
