«ՔԱՂԱՔԱԿԱՆ ՀԵՏԱՊՆԴՈՒՄ ՉԿԱ, ԿԱ ԱՆՁՆԱԿԱՆ ՇԱՀԱԳՐԳՌՈՒԹՅՈՒՆ» Անդրադառնալով Արմեն Ավետիսյանի դեմ հարուցված քրգործին՝ համոզմունք հայտնեց իրավապաշտպան Վարդան Հարությունյանը։ Անցած շաբաթ ով չալարեց՝ հանդես եկավ քաղաքական հայտարարությամբ՝ ազգամիջյան թշնամանք սերմանող հայտարարություններ անելու մեղադրանքով «Հայ արիների միաբանության» առաջնորդ Արմեն Ավետիսյանի կալանավորման փաստի առնչությամբ՝ համարելով նրան քաղկալանավոր: Բայց իրավապաշտպան Վարդան Հարությունյանը, որ երբեք չի զլացել հանդես գալ քաղկալանավորների պաշտպանությամբ, համաձայն չէր այդօրինակ հայտարարությունների հետ: Պրն Հարությունյանն այդ առնչությամբ «Առավոտին» ասաց. «Քաղկալանավորը ոչ ժողովրդավարական ուժերի կողմից քաղաքական գործունեության կամ քաղաքական համոզմունքների համար հետապնդվող մարդն է: Բայց նա, ով տարածում է մարդատյաց գաղափարներ, ինչպիսին ֆաշիզմն է, հակասեմիտիզմը կամ ցանկացած ազգային խտրականության գաղափարներ, չի կարող քաղկալանավոր լինել: Այլ խնդիր է, որ կոնկրետ Ա. Ավետիսյանի դեպքում, իմ կարծիքով, կալանքը որպես խափանման միջոց ընտրելը սխալ էր եւ պատվիրված: Թե ի՞նչ ուժերի կողմից էր պատվիրված՝ ես չգիտեմ. երեւի թե նրա այլ թեմայով արած հայտարարությունների համար: Ես չեմ կարծում, որ այսօր մեր հանրապետությունում կան մարդկանց հոծ զանգվածներ, ովքեր պատրաստ են այդ կարգի կարգախոսների տակ անդամագրվել կամ դուրս գալ փողոցներ, հալածել այլազգի ներկայացուցիչների, ուստի այս իմաստով կարծում եմ, որ կալանքը խիստ միջոց էր, եւ կարելի էր ընտրել այլ խափանման միջոց՝ ստորագրություն չբացակայելու մասին: Իսկ որ այդ կարգի հայտարարությունների համար պետք է քրգործ հարուցվեր՝ չեմ կասկածում: Անկախ նրանից՝ նման հայտարարություն արած մարդիկ կդատապարտվեն ազատազրկման, թե ոչ, բայց հասարակությունը պետք է իմանա, որ դա անթույլատրելի է»,- կարծիք հայտնեց իրավապաշտպանը: Նա հակասեմիտիզմը նույնքան անթույլատրելի համարեց, «որքան մեր հարեւան մեկ այլ ժողովրդի, օրինակ՝ թուրքերի նկատմամբ արված հակաթուրքական հայտարարությունները»։ «Արդեն մոտ հազար տարի մեր տարածաշրջանում համատեղ ապրող ժողովրդի նկատմամբ ասում են, որ մենք գենետիկորեն անհամատեղելի ենք: Դրանից ավելի մեծ ազգային խտրականություն քարոզող հայտարարություն երեւի թե չի կարող լինել»: Քրգործի հարուցումը տեղի ունեցավ ԱՄՆ պետդեպարտամենտի արած հայտարարության ֆոնի վրա: Արդյոք դա ցուցադրական քայլ չէ՞ր՝ համոզելու միջազգային հանրությանը, որ ՀՀ-ում էլ հակասեմիտիզմը դատապարտելի է: «Չեմ կարծում: Կարծում եմ՝ այդ առիթն ուղղակի օգտագործվեց անձնական հարցեր լուծելու համար: Բայց դա չի նշանակում, որ մեր հասարակությունը պետք է կուլ տա հակասեմիտական կամ մեկ այլ ժողովրդի դեմ ուղղված հայտարարությունները»: ԱԼՄ հոլդինգի նախագահ Տիգրան Կարապետյանն էլ, որ ձեռնպահ չէր մնացել համանման հայտարարություններից, կարծիք էր հայտնել, թե օրենքը հավասարապես չի կիրառվում, որ, ասենք՝ թուրքերի կամ ադրբեջանցիների դեմ նման արտահայտություն անողները չեն պատժվում, իսկ հրեաների դեպքում՝ պատժվում են: Համամի՞տ եք այդ դիտարկմանը: Մեր այս հարցին ի պատասխան՝ Վ. Հարությունյանն ասաց. «Օրենքը չի կիրառվում մի շարք պատճառներով: Նախ, մեր հանրապետությունում հակաթուրքությունն ընդունվում է որպես հայկական բնավորության գիծ եւ որպես հանցագործություն չի ընկալվում: Իսկ օրենքն այլ դեպքերում չի կիրառվում, որովհետեւ, ինչպես ասացի, այս մարդուն ձերբակալեցին իր այլ կարգի հայտարարությունների համար, ոչ հակասեմիտական: Ես չեմ ուզում, որ խաբկանք ստեղծվի, թե Հայաստանում պայքարում են հակասեմիտիզմի կամ հակաթուրքիզմի դեմ: Ոչ: Տվյալ դեպքում կոնկրետ հարց են լուծում»: Այնուամենայնիվ, եթե մարդուն կալանավորում են մի բանի համար եւ մեղադրում մեկ այլ հանցագործության մեջ, ինքնաբերաբար ընկալվում է որպես քաղաքական հետապնդում, որովհետեւ մինչ այս, բոլոր հետապնդվողների համար էլ իշխանությունները մի-մի մեղադրանք պատրաստել էին՝ զրպարտություն, սահմանադրական կարգը բռնությամբ տապալելու կոչեր եւ այլն: «Ա. Ավետիսյանի արած եւ իմ մատնանշած այլ հայտարարությունները եւս քաղաքական չէին: Դրանք մարդկանց անձնական կյանքին միջամտության դրսեւորումներ էին: Քաղաքական հետապնդում չկա, կա անձնական շահագրգռություն»,- կարծիք հայտնեց իրավապաշտպանը: ՆԱԻՐԱ ՄԱՄԻԿՈՆՅԱՆ
