ԱՅՆՈՒԱՄԵՆԱՅՆԻՎ ԳԱՂՏՆԻ՞ ԵՆ Անցյալ ուրբաթ օրը Երեւանի քաղաքապետարանում ՀՀ նախագահը հերթական խորհրդակցության ժամանակ անդրադառնալով քաղաքապետարանի գործունեության թափանցիկությանը՝ դիտողություն արեց, թե բողոքներ կան, որ քաղաքապետարանը հրաժարվում է իր որոշումների պատճենները տրամադրել հետաքրքրվող անձանց: «Քաղաքապետարանը գաղտնի գործառույթներ չունի, ո՞րն է խնդիրը, որ ձեր որոշումները չի կարող քաղաքացին կամ հասարակական կազմակերպությունը ունենալ: Նախատեսեք, որ 2005-ին ներդրվի հասարակության համար քաղաքապետարանի որոշումների հասանելիությունը ապահովող համակարգ: Կարելի է որոշումները տեղադրել ձեր ինտերնետային էջում, հրապարակել նաեւ ձեր տարեկան ծրագիրը»,- առաջարկել էր Ռ. Քոչարյանը, որին, ի դեպ, հենց այս հարցով դեռ անցյալ տարվա ամռանը դիմել էր Հետաքննող լրագրողների ընկերակցությունը: Տպավորություն կար, թե ՀՀ նախագահը տվյալ դեպքում նկատի ուներ հենց այս կազմակերպությանը: Հիշեցնենք, որ Օպերայի շրջակայքում հողհատկացումների մասին քաղաքապետարանի որոշումները այս կազմակերպությանը մինչ օրս էլ չի հաջողվել ստանալ Երեւանի քաղաքապետարանից, թեեւ այդ առնչությամբ կա անգամ վճռաբեկ դատարանի որոշում: Կազմակերպության նախագահ Էդիկ Բաղդասարյանը կարծիք հայտնեց, որ Ռ. Քոչարյանի հիշյալ նկատողությունը իրականում ՀՀ նախագահին ուղղած իրենց նամակ-բողոքների անուղղակի պատասխանն էր: Նախագահի այդ հանդիպումից եւ հանձնարարականից անցել է արդեն 3 օր: Փորձելո՞ւ է արդյոք պրն Բաղդասարյանը նույն պահանջով դիմել քաղաքապետարան: «Եթե դիմենք՝ կդիմենք Եվրադատարան: Դա սկզբունքի հարց է, եւ քաղաքապետարանը պարտավոր է ինքը ներկայացնել մեր պահանջած փաստաթղթերը»,- նկատեց պրն Բաղդասարյանը՝ միաժամանակ հավելելով, թե մինչեւ դատական ավելի բարձր ատյաններին դիմելը կազմակերպությունը մտադիր է, թերեւս, հաջորդ շաբաթ դիմել դատական ակտերի հարկադիր կատարածուներին՝ վճռաբեկ դատարանի որոշումը ի կատար ածելու եւ քաղաքապետարանից ակնկալվող փաստաթղթերը ստանալու համար: Ն. Մ.
