ՖՈՒՏԲՈԼԱՅԻՆ
ՏԱՐԵՎԵՐՋՅԱՆ ԻՐԱԴԱՐՁՈՒԹՅՈՒՆՆԵՐ Վերջապես՝ վերելք 
Ավանդույթի
համաձայն, ամեն տարվա վերջին յուրաքանչյուր մարզաձեւ ամփոփում է անցնող մրցաշրջանը,
որոշում լավագույններին: Այս առումով, թերեւս, ամենահետաքրքիրն ու նշանակալիցը Ֆուտբոլային
ասոցիացիաների միջազգային միության՝ ՖԻՖԱ-ի հրապարակած արդյունքներն են լինում: Դեկտեմբերի
20-ին այս խոշորագույն մարզական կազմակերպությունը հրապարակեց 2004 թվականի ազգային
հավաքականների վարկանիշային դասակարգման եզրափակիչ ցուցակը: Ամբողջ տարի այն գլխավորեց
աշխարհի հնգակի չեմպիոն Բրազիլիան՝ 843 միավոր: Նոյեմբեր ամսվա հետ համեմատած տեղաշարժ
չի գրանցվել երկրորդ եւ երրորդ հորիզոնականներում: 792 միավորով Ֆրանսիան տարին եզրափակեց
2-րդ տեղում, իսկ Արգենտինան վերջինին զիջեց ընդամենը 7 միավորով ու եզրափակեց լավագույն
եռյակը: Մեկ քայլ վեր է բարձրացել աշխարհի 2006թ. առաջնության 1-ին ընտրական խմբում
Հայաստանի մրցակիցներից Չեխիան՝ 777 միավոր, որը հանգրվանել է 4-րդ հորիզոնականում:
Այնուհետեւ առաջին տասնյակում, ըստ հերթականության, գալիս են. 5. Իսպանիա՝ 765, 6.
Հոլանդիա՝ 758 (այս երկիրը նույնպես մեր ընտրանու հետ ընդգրկված է նույն խմբում),
7. Մեքսիկա՝ 753, 8. Անգլիա՝ 752, 9. Պորտուգալիա՝ 747, 10. Իտալիա՝ 738: Բարեբախտաբար,
Հայաստանի ազգային հավաքականը տարեվերջին վերելք է արձանագրել այդ ցուցակում: Բարձրանալով
միանգամից չորս աստիճան՝ մեր ընտրանին զբաղեցրել է 119-րդ հորիզոնականը: Աշխարհի
առաջնության ընտրական մրցաշարի մեր խմբի մյուս թիմերից Ռումինիան նահանջել է մեկ
քայլ եւ 29-րդն է, Ֆինլանդիան մնացել է նույն՝ 43-րդ տեղում, մեկ քայլ տեղը զիջել
է նաեւ Մակեդոնիան, իսկ ահա Անդորրան արդեն 138-րդն է՝ բարձրանալով հինգ աստիճան:
Ռոնալդինյոն՝ տարվա լավագույն ֆուտբոլիստն Բրազիլիայի հավաքականի եւ
Իսպանիայի «Բարսելոն» ակումբի կիսապաշտպան Ռոնալդինյոն ՖԻՖԱ-ի անցկացրած ամենամյա
հարցման արդյունքով ճանաչվել է աշխարհի 2004 թվականի լավագույն ֆուտբոլիստ: Հարցմանը
մասնակցած ազգային հավաքականների գլխավոր մարզիչների եւ թիմերի ավագների ձայների
ամփոփումից հետո 24-ամյա ֆուտբոլիստը վաստակեց 620 միավոր: Երկրորդ տեղում հայտնված
ֆրանսիացի Տիերրի Անրիի, որ հանդես է գալիս «Արսենալի» կազմում, անվան դիմաց գրանցվեց
552, իսկ «Միլանի» եւ Ուկրաինայի հարձակվող Անդրեյ Շեւչենկոն 253 միավորով եզրափակեց
եռյակը: Հիշեցնենք, որ անցած տարի աշխարհի լավագույն ֆուտբոլիստ դարձել էր
«Ռեալի» կիսապաշտպան Զինեդին Զիդանը: Հետաքրքիր է, որ 160 երկրներից միայն Ռուսաստանը
չի մասնակցել այդ հարցմանը: Այդ երկրի հավաքականի ավագ Ալեքսեյ Սմերտինը ԶԼՄ-ներին
հայտարարել է, թե իրեն նման առաջարկ չի եղել ոչ Ռուսաստանից, ոչ էլ արտասահմանից:
Ա.ՀԱԿՈԲՅԱՆ
