ՈՒՐԻԽԱՆՅԱՆՆ
ԸՆԴԴԵՄ ԿՈՆԴՈԼԻԶԱ ՌԱՅՍԻ Հայաստանի առաջադիմական կուսակցության
նախագահ Տիգրան Ուրիխանյանը գտնում է, որ Ուկրաինայից հետո՝ հաջորդ հեղափոխությունը
լինելու է Հայաստանում: Սա զուտ ենթադրություն չէ, այլ վերլուծության արդյունք: Մասնավորապես,
ուսումնասիրելով լատինամերիկյան, աֆրիկյան, այնուհետեւ վրացական եւ այժմ ուկրաինական
հեղափոխությունների փորձը, առաջադեմ երիտասարդը հանգել է նրան, որ դրանք բոլորն էլ
նույն ուղղությունն ունեն. «Հեղափոխություն վերապրած բոլոր երկրներում բացարձակ հաղթանակ
տարան մինչեւ 30 հազար մարդիկ՝ ժողովրդավարական ալիքը»: Սույն փոխկապակցվածությունը
առաջադեմների առաջնորդին ստիպում է մեկ այլ ենթադրություն անել. այստեղ արհեստականություն
կա, որը Տ. Ուրիխանյանի համոզմամբ, թելադրանքի արդյունք է. «Եթե դա կապենք հեղափոխությունների
աշխարհաքաղաքական երթուղու հետ՝ ապա երկրագնդի գերհզոր մարդկանց շահերն ենք բացահայտում:
Նույն Կոնդոլիզա Ռայսը (ԱՄՆ արտաքին գերատեսչության նորանշանակ ղեկավարը) շահեր ունի
«Բրիթիշ պետրոյլի» (այդպիսի անվանում է օգտագործում պրն Ուրիխանյանը- Ն. Գ.) ընկերությունում
եւ այլ կազմակերպություններում, որոնք աֆրիկյան եւ լատինամերիկյան երկրներից տարածվելով
հասնում են մինչեւ Կասպից ծով»: Վերլուծությունների հետագա ընթացքն այսպիսին է. «Եթե
Ուկրաինայում հաղթԵն պրոռուսական ուժերը՝ հայկական հեղափոխությունը կլինի մեղմ, հակառակ
պարագայում՝ քայլերն ավելի կտրուկ կլինեն»: Այդ պարագայում մեր զրուցակցի մտահոգությունը
հասնում է մինչեւ քաղաքացիական պատերազմի, ինչը կանխելու նպատակով էլ վերջին շրջանում
ՀԱԿ-ն անընդհատ համաժողովրդական կոնսոլիդացիայի կոչեր է անում: Տիկին Ռայսի
գայլային ախորժակի դեմ պայքարը հայ առաջադեմ երիտասարդները պատկերացնում են տիկին
Բուշի միջոցով: Քայլերը, որոնք այժմ կուսակցությունում մշակվում են, պետք է խանդ
ծնեն Լորա Բուշի ուղեղում եւ սրտում, ինչի արդյունքում Ռայսին չի հաջողվի ավարտին
հասցնել իր ծրագիրը: ՆԵԼԼԻ ԳՐԻԳՈՐՅԱՆ
