ՀՀԿ
խմբակցության պատգամավոր Համլետ Հարությունյանն ամենաակտիվն էր ԱԺ նախագահի հաղորդման
քննարկման ժամանակ եւ հանդես եկավ ամենաշատ հարցադրումներով: – Ավելի վաղ
մամուլում հայտարարել էիք, թե ԱԺ-ում այնպիսի մթնոլորտ է ստեղծվել, որ քաղաքական
հարցադրումներ կատարողները հետապնդվում են «37 թվի մակարդակով»: Սակայն երբ պաշտոնական
հաղորդման ընթացքում բավական սուր հարցադրումներ էիք ներկայացնում՝ չէի՞ք զգուշանում,
որ կարող եք դառնալ հետապնդումների թիրախ: – Իմ նկատմամբ դժվար թե կարողանան
հետապնդումներ իրագործել՝ հասկանալի պատճառներով. ես վաղուցվա մարտիկ եմ եւ թրծված
եմ նման հարցերում: Եթե հետապնդումներ լինեն՝ կտամ համարժեք պատասխան, բայց ոչ իրենց
մեթոդներով, այլ քաղաքակրթության սահմաններում: – Դուք քննադատեցիք Արթուր
Բաղդասարյանի հաղորդման այն հատվածը, թե «անընդունելի է, երբ սեփականաշնորհման անվան
տակ պետական ունեցվածքի ջրի գնով վաճառք է տեղի ունենում, դա ոչ այլ ինչ է, քան կողոպուտ
պետության գրպանից», նաեւ, որ շուկայական տնտեսության գաղափարախոսության տեսանկյունից
անընդունելի էր «ԱրմենՏելի» հետ կապված մրցույթը մեկ գիշերում անցկացնելը: Դե՞մ եք
նրան, որ անգամ երկրի բարձրագույն իշխանության ներկայացուցիչները կարող են հանդես
գալ քննադատությամբ արատավոր երեւույթների վերաբերյալ: – Դեմ չեմ, որ արատավոր
երեւույթների շուրջ ելույթներ ունենան, քննարկումներ անեն, բայց թող չհասցնեն պոպուլիզմի
աստիճանի: Նման հայտարարություն, որ արեց Արթուր Բաղդասարյանը՝ կա՛մ չեն անում,
կա՛մ այդպես չի լինում ձեւակերպումը: Քննադատության մեջ կան շա՜տ մեծ տարբերություններ:
Իսկ եթե նման ձեւակերպմամբ է արվում հայտարարությունը՝ աշխարհի ո՛չ մի երկրում այդ
հայտարարությունն անողը, եթե մաս է կազմում իշխանությանը, չի մնում իր պաշտոնին եւ
հրաժարական է տալիս: Սա քաղաքացիական հերոսության դրսեւորումներից մեկն է, որն ավելի
մեծ արձագանք ու հետեւանք կունենար, քան լոկ հաղորդումը: Նշում է, թե անընդունելի
է համարում, որ մրցույթն անցկացվել է «բացարձակ գաղտնի պայմաններում»: Ես ո՛չ Արթուր
Բաղդասարյանի դեմ եմ տրամադրված, ո՛չ էլ ունեմ կորպորատիվ կամ սեփականատիրական շահեր:
Քավ լիցի, ես նրան չեմ առաջարկում հրաժարական տալ: Բայց մանավանդ այն պայմաններում,
երբ ՕԵԿ-ի նախարարները մասնակցել են կառավարության այդ նիստին, քվեարկել «կողմ»՝
դրանից հետո նման հայտարարություննե՞ր… Ի վերջո, միայն մամուլն է հրապարակել, թե
այդ մրցույթն անցկացվել է գիշերը, եւ ոչ ոք չի ստուգել այդ տեղեկությունը: Փաստացի
ապացուցե՛ք՝ հետո հանդես եկեք հայտարարություններով: Այլապես սա պոպուլիզմ է: Նման
ձեւակերպումները շատ հարիր են ընդդիմությանը, քանի որ սա նրանց գործն է՝ ոչ Ազգային
ժողովի ու կառավարող կուսակցության առաջնորդի: – Դուք եւ մի քանի այլ պատգամավորներ
պահանջում էիք, որ ԱԺ նախագահը ներկայացնի նաեւ ֆինանսական հաշվետվություն: Ինչո՞ւ
եք կարեւորում նման հաշվետվության անհրաժեշտությունը: – Բայց սա ի՞նչ մի արտառոց
պահանջ է: Ուղղակի ինչպես ելույթումս էլ ասացի, ԱԺ կանոնակարգի դրակոնյան դրույթները
(թեեւ ոմանք մինչեւ հիմա էլ չեն կարողացել պարզել՝ Դրակոնը մա՞րդ էր, թե՞ հրեշ) թույլ
չեն տալիս պահանջել նման հաշվետվություն: Եվ երբ Ազգային ժողովի նախագահն էլ խորհրդարանը
համեմատում է կառավարության եւ նախագահի աշխատակազմի հետ (Արթուր Բաղդասարյանը նշեց,
թե նրանք էլ հաշվետվություն չեն ներկայացնում.- Ա. Ի.), խորը մոլորության մեջ է:
ԱԺ-ն իր ինստիտուտցիոնալ կարգով բոլորովին այլ հիմնարկ է եւ եզրեր էլ անգամ չկան
նմանության: – Այո՛, ԱԺ-ն գործում է ավելի թափանցիկ ու հրապարակային: –
Դեմ չեմ: Բայց խորհրդարանը բոլորովին այլ է՝ մերը քաղաքական ակումբ է, իսկ նրանք`
վարչական մարմիններ: Մե՛նք ենք ներկայացնում ժողովրդական իշխանությունը: Իհարկե,
հո նախագահը ֆինանսական հաշվետվություն չի՞ ներկայացնելու՝ աշխարհի որեւէ նախագահ
հանդես չի գալիս հաղորդմամբ: – Հիմնավորեք ավելի վաղ Ձեր արած պնդումները,
թե պատգամավորներն ԱԺ-ում հարմար չեն զգում իրենց, քանի որ «ԱԺ-ի ղեկավարության (բեմի)
եւ դահլիճի միջեւ փոխըմբռնումն իսպառ բացակայում է», ԱԺ-ում չկան ընկերական հարաբերություններ,
եւ դա ղեկավարության թերությունն է: – Խոսքը նաեւ քաղաքական կուլտուրայի մասին
է՝ խորհրդարանը մեր ժողովրդական տունն է, այնտեղ չպետք է լինեն արտոնյալ կամ իրավունքները
ոտնահարված պատգամավորներ: Ես հաղորդման քննարկման ժամանակ անդրադարձա, օրինակ, պատվիրակությունների
կազմերին: ԱԺ-ն տուրիստական բյուրո է դարձել, եւ ես սա ցավով եմ ասում: –
Քանի որ ՀՀԿ խմբակցության անդամ եք, մտավախություն չունե՞ք, որ Ձեր այս քննադատությունը
ՕԵԿ-ի ղեկավարի հասցեին կդիտվի իբրեւ ներկոալիցիոն տարաձայնությունների վկայություն:
– Ես չեմ մտածում, թե սրա հետեւանքներն ինչ կլինեն: Ես ազգային գործիչ եմ:
Ինձ չեն հետաքրքրում կուսակցությունները եւ թե դրանց վերնախավի շահերն ինչ են պահանջում,
որ ասեմ ես: Ասում եմ այն, ինչ կարող եմ ապացուցել ցանկացա՛ծ ատյանում եւ, ինչ ասում
է ամբողջ ժողովուրդը: Հարցազրույցը վարեց ԱՆՆԱ ԻՍՐԱՅԵԼՅԱՆԸ
