ԴԱՏԱՎՈՐՆԵՐԸ՝
ԴԱՏԱԽԱԶՈՒԹՅԱՆ ԴԵՄ Երեկ ՀՀ դատավորների միության խորհուրդը
հանդես է եկել հայտարարությամբ՝ կապված վերջին ժամանակներս նկատվող «դատական իշխանության
անկախությունը վտանգող երեւույթների հետ»: Անդրադառնալով նոյեմբերի
1-ի ՀՀ գլխավոր դատախազության օպերատիվ խորհրդակցությանը, որտեղ քննարկվել է «2003թ.
եւ 2004թ. անցած ժամանակահատվածում անշարժ գույքի իրացման եւ օտարման վերաբերյալ
Հայաստանի Հանրապետության դատարանների կայացրած վճիռների օրինականությունն ու հիմնավորվածությունը»,
ԴՄԽ-ն նկատում է. «Փաստաթղթի հեղինակներն իրենց իրավունք են վերապահել ստուգելու
դատարանների վճիռների օրինականությունն ու հիմնավորվածությունը, առանձին գործերով
կայացված դատական ակտերը որակել են որպես անօրինական կամ ապօրինի: Ընդ որում, նշված
եզրահանգումները կատարելիս «փաստաթղթի» հեղինակները չեն նշել, թե Սահմանադրության
կամ օրենքի ո՛ր նորմով է սահմանված նման ուսումնասիրություններ կատարելու եւ նման
հրապարակային եզրահանգումներ անելու իրենց իրավունքը»: Դատավորների միության խորհուրդը
հիշեցնում է, որ դատավորի կողմից արդարադատություն իրականացնելիս օրենքի խախտման
փաստի առկայությունը կարող է արձանագրել միայն այդ դատավորի կայացրած դատական ակտը
վերանայող վերադաս դատական ատյանը, իսկ դատական ակտի բեկանումը՝ վերադաս դատական
ատյանը»: Իսկ դատարանի վճիռների «ապօրինության» կամ «անօրինականության» վերաբերյալ
որեւէ պետական մարմնի, այդ թվում՝ դատախազության կողմից արված հայտարարությունը խորհուրդը
դիտում է նրա բնականոն գործունեությանն ուղղված սպառնալիք եւ հեղինակազրկում:
