ՏԱՐԱԾՈՒՄ
ԵՆ ՆԱԵՎ ՀԱՅԵՐԵՆ «Առավոտ» թերթի ս.թ. նոյեմբերի 13-ի համարում
«Օմբուդսմենը խախտում է օրենքը» վերտառությամբ հրապարակման մեջ նշվում էր, որ Մարդու
իրավունքների պաշտպանի անձնակազմի տեղեկատվության եւ հասարակայնության հետ կապերի
բաժինը խախտում է ՀՀ պետական լեզվի մասին օրենքը՝ տեղեկատվություն տարածելով միայն
ռուսերեն լեզվով: Նշված էր նաեւ խախտման պատճառը. տեղեկատվության բաժնի ղեկավարը
ռուսալեզու լրագրող է: Տեղեկացնում ենք, որ ՀՀ մարդու իրավունքների պաշտպանի
եւ նրա անձնակազմի գործունեության մասին տեղեկատվությունը տարածվում է երկու լեզվով՝
հայերեն եւ ռուսերեն: Այն էլեկտրոնային փոստով ուղարկվում է 25 հասցեով՝ Հայաստանի
եւ արտերկրի տարբեր ԶԼՄ-ների: Բացառություն չէր նաեւ նոյեմբերի 12-ի տեղեկատվությունը
եւ որեւէ դժգոհություն, թե նշված ԶԼՄ-ներից որեւէ մեկն այդ տեղեկատվությունը ստացել
է միայն ռուսերենով, չենք ստացել: Նոյեմբերի 12-ի տեղեկատվությունը երկու լեզվով
ուղարկելու փաստը ֆիքսվել է նաեւ մեր էլեկտրոնային փոստարկղում: Տեղեկացնում
ենք, որ տեղեկատվության տարածման շրջանակները ընդլայնելու նպատակով մենք առաջիկայում
պատրաստվում ենք տեղեկատվություն տարածել նաեւ անգլերենով: ՀՀ մարդու իրավունքների
պաշտպանի աշխատակազմի տեղեկատվության եւ հասարակայնության հետ կապերի բաժին Մեզ
թույլ ենք տալիս պնդել, որ կոնկրետ նոյեմբերի 12-ին Մարդու իրավունքների պաշտպանի
գրասենյակից «Առավոտին» ուղարկած տեղեկատվությունը միայն ռուսերեն էր:
