ՕՄԲՈՒԴՍՄԵՆԸ
ԽԱԽՏՈՒՄ Է ՕՐԵՆՔԸ Հայաստանի մարդու իրավունքների պաշտպանի գրասենյակի
հաղորդագրությունները լրատվամիջոցներին են տարածվում միայն ռուսերեն, ինչը «Լեզվի
մասին» օրենքի խախտում է: Թերեւս պատճառն այն է, որ գրասենյակի լրատվության պատասխանատու
Մարինա Գրիգորյանը ռուսագիր լրագրող է, աշխատակցում է «Գոլոս Արմենիի» թերթին: Այսուհանդերձ,
երեկ հերթական անգամ ստանալով Մարդու իրավունքների գրասենյակի ոչ պետական լեզվով
հաղորդագրությունը՝ «Առավոտը» պատասխան ռեպլիկ ուղարկեց. «Նույն հաջողությամբ ձեր
տեղեկատվությունը կարող էիք ուղարկել նաեւ թուրքերեն կամ չինարեն: Որքան հիշում ենք՝
ռուսերենը Հայաստանում դեռեւս պետական լեզու չէ (եւ փառք Աստծո)»: Մարինա
Գրիգորյանը շատ արագ արձագանքեց. «Ինչքան մենք տեղյակ ենք՝ Հայաստանում դեռ թուրքերեն
թերթ չի հրատարակվում (եւ փառք Աստծո), իսկ ռուսերեն՝ կան, որոնց համար էլ ուղարկում
ենք ռուսերեն տարբերակը»: Ընդամենը վրիպում եւ ոչ թե վերաբերմունքի արտահայտություն
համարենք այն, որ օմբուդսմենի խոսնակի հաղորդագրության մեջ «Հայաստանը» գրվել է փոքրատառով,
իսկ «ռուսերեն» եւ «թուրքերեն» բառերը՝ մեծատառով: Այնուամենայնիվ, թերեւս
կա որոշակի վերաբերմունք, այլապես ռուսական 3 թերթերի պատճառով մնացած բոլոր լրատվամիջոցներին
հաղորդագրությունները չէին ուղարկվի օրենքի ոտնահարմամբ: Ի վերջո, խոսքը Հայաստանի
եւ ոչ թե Ռուսաստանի մարդու իրավունքների պաշտպանի գործունեության մասին է: Հուսով
ենք, որ այս թերությունը շուտափույթ կշտկվի, եւ այլոց իրավունքների պաշտպանությանը
կոչված մարմինը չի ոտնահարի մեր պետական լեզվի իրավունքները: ԱՌԱՎՈՏ
