ԵՐԻՏԱՍԱՐԴ ՀԱՅՐԵՆԱՍԵՐՆԵՐԻ ԿՅԱՆՔԻՑ Օրեր առաջ կազմակերպած «ԱրմենՏել»-յան շոուից հետո, երեկ Հայաստանի առաջադիմական կուսակցության նախագահ Տիգրան Ուրիխանյանը մեղայականով հանդես եկավ: Հրավիրած մամուլի ասուլիսում նա հերքեց «այն հրապարակումները, որոնք խոսում են պատգամավոր Սադոյանին թակարդը գցելու մասին»: Ի հատուցումն մեղայականի՝ պատգամավորին նոր մեղադրանք ներկայացրեց. «Երբ երկրի ընդդիմությունը սպառված է, երբ դաշինքի գործելակերպը գնալով ավելի է քննադատվում եւ արժանանում բացասական գնահատականների՝ կորցնելով էլեկտորատը, Սադոյանի պես փորձառու գործիչը կարիք է ունենում կտրուկ քայլեր ձեռնարկելու: Գտնում է առիթ, ընդգծված առանձնանում ու սկսում հերթական անգամ միավորներ վաստակելու փորձեր անել, սակայն՝ վտանգելով երկրի, Արցախի եւ ամբողջ հայության շահերը»,- ոգեւորիչ հայրենասիրությամբ խոսեց երիտասարդը: Ասվածին ապացույց, անգամ ի ցույց դնելով իր տեղեկացվածությունը, մեջբերեց Ադրբեջանի կապի նախարարության ղեկավարներից մեկի՝ «Էխո» թերթին տված հարցազրույցից մի հատված: Դրանում, մասնավորապես, ադրբեջանցի պաշտոնյան խոսում է այն մասին, որ պետք է բողոքի նոտա հղել Էլեկտրակապի միջազգային միություն այն մասին, որ Հայաստանն իր շուկա է թողել մի կազմակերպության, որը գրանցված է եւ գործում է «օկուպացված տարածքում»: Խոսքը, բնականաբար, «Ղարաբաղ Տելեկոմի» մասին է: Ադրբեջանցի պաշտոնյան կարծում է, որ այդ իսկ պատճառով աշխարհի երկրները պետք է խզեն Հայաստանի հետ հեռահաղորդակցային կապը: Տ. Ուրիխանյանի համոզմամբ, «ապօրինի մրցույթի» մասին մեր հարեւանները տեղեկացել են «ժողովրդի ընտրյալ Արշակ Սադոյանի» հարցազրույցներից: Լրագրողների՝ «Հանուն ստրատեգիական շահի պետք է աչք փակե՞լ անօրինականությունների դեմ» հարցն այդպես էլ անպատասխան մնաց: Մինչդեռ ՀԱԿ-ը շարունակում է նշված ժամկետում, ապացույցներ չներկայացնելու դեպքում, Սադոյանին սպառնալ դատախազությամբ՝ պետությանը վնաս հասցնելու մեղադրանքով: Իսկ Սադոյանը այդ ամենը որակում է պատվերով համերգ. «Ընդ որում, պատվեր կատարողն էլ չգիտի, թե ինչի մասին է խոսում: «Ղ-Տելեկոմին» ես ոչինչ չեմ ասում: Իսկ գիշերային մրցույթին ուղղված իմ քննադատությունը եւ առաջարկը՝ OTE-ից միջազգային ելքի կապուղին վերցնելը, նույնիսկ նպաստում է «Ղ-Տելեկոմի» հետագա գործունեությանը»,- ասում է Սադոյանը: Առաջադեմ երիտասարդը ուլտիմատում ներկայացրեց նաեւ արդարադատության նախարարին. «Ի՞նչ են նշանակում Դ. Հարությունյանի հայտարարությունները, թե այս հարցի շուրջ բաներ կան, որոնք դեռ չեն հրապարակվում: Ես պահանջում եմ, որ նա շուտափույթ տա մեր երկրի հասարակությանը բոլոր բացատրությունները, որ անմիջապես ներկայացնի բոլոր մութ եւ չհրապարակված կողմերը»: Թե ի՞նչ «մութ» կողմերի մասին է խոսքը՝ «Ես կարող եմ միայն ենթադրել, չեմ կարող ասել… մտավախություն ունեմ, միգուցե կան հանգամանքներ, որոնք կարող են վնասակար լինել ՀՀ-ի համար»,- ասաց Ուրիխանյանը: Վերոբերյալ պահանջին ի պատասխան՝ ՀՀ արդարադատության նախարարի մամուլի խոսնակ Արա Սաղաթելյանն «Առավոտին» փոխանցեց. «Հաշվի առնելով վերջին զարգացումները (նկատի ունի ԱԺ-ում տեղի ունեցած պարզաբանում-երկխոսությունները)՝ համարում եմ, որ «մութ» կողմերի մասին թեման սպառված է: Իսկ ինչ վերաբերում է բանակցությունների արդյունքներին՝ ինչպես եւ ծրագրված է, ԱրմենՏել-OTE-ՀՀ կառավարություն բանակցող թիմը հասարակությանը կներկայացնի փոփոխված լիցենզիայի մանրամասները՝ միայն բանակցությունների արդյունքներն ամրագրող փաստաթղթի երկկողմանի հաստատումից հետո»: ՆԵԼԼԻ ԳՐԻԳՈՐՅԱՆ
