Անխոնջ կաշառատուները Երեկ Աջափնյակ եւ Դավիթաշեն համայնքների առաջին ատյանի դատարանում շարունակվեց դատավոր Համլետ Մաթեւոսյանի եւ զինվորական դատախազության Գուգարքի կայազորի դատախազի օգնական Գառնիկ Չախմախչյանի նկատմամբ հարուցված քրեական գործի դատաքննությունը: Դատարան էր ներկայացել Նոյեմբերյանի Կողբ գյուղի բնակիչ, նախկին ուսուցիչ Աշոտ Սիմոնյանը: Վերջինս ցուցմունք տվեց, որ գործով վկա Համլետ Ղարախանյանից տեղեկություն է ստացել իրենց գործով (զենք-զինամթերքի գողություն) «ես ու Համլետը միասին մոտենանք դատավոր Մաթեւոսյանին, առանց միջնորդի»: Նա նկարագրեց, որ օգոստոսի 18-ին երկուսով գնացել են Դիլիջանի առաջին ատյանի դատարան, դատավորի հետ հանդիպել առանձին-առանձին: Վկան պատմեց, թե ինչպես է ինքը սակարկել դատավորի հետ՝ 500 ԱՄՆ դոլար տալու-չտալու շուրջ. «Ես առարկեցի, որ գումարի չափը մեծ է, Մաթեւոսյանը մնաց անդրդվելի»: Օգոստոսի 26-ին 400 ԱՄՆ դոլարով մտնում է դատավորի մոտ, հանձնում նրան: Վկան նաեւ ասաց, որ սեպտեմբերի 7-ին դատարանում տեսնում է, թե ինչպես Համլետ Ղարախանյանը մտել-դուրս է եկել դատավորի սենյակ եւ այնտեղ լսվել է դատախազի օգնական Չախմախչյանի ձայնը՝ «այ տղա, ի՞նչ է»: Դատարանի շենքից դուրս գալիս նա նկատում է 10-12 «անհայտ» մարդկանց, որոնք ներս են խուժել շենք: Հետագայում իմանում է, որ ազգային անվտանգության աշխատակիցներ են: Նախորդ վկան՝ Համլետ Ղարախանյանը, դատարանին հայտնեց, որ սկզբում տվել է ԱԱ մարմիններին հայտարարություն, ապա կաշառք՝ դատավորին: Այս վկան էլ հայտարարեց, որ տվել է կաշառքը դատավորին, ապա կամավոր հայտարարություն՝ ազգային անվտանգության մարմնին: Սակայն չպատասխանեց այն հարցին, թե ինչո՞ւ նա կամավոր հայտարարությունը տվել է ոչ թե օգոստոսի 26-ին, այլ սեպտեմբերի 7-ին: Վկան նաեւ հայտնեց, որ դատավորը հաշվել էր 4 հատ 100 դոլարանոցը եւ դրել սպիտակ վերնաշապիկի գրպանը: Թեեւ դատարանում ռեպլիկ հնչեց, որ դատավորն այդ օրը եղել է մուգ կապույտ վերնաշապիկով: Այս վկան էլ այնքան խճճվեց գումարի մեջ, որ պարզ չէր՝ 400 դոլա՞ր է տվել, «որո՞շ գումար», «մոտավորապես 7 հարյո՞ւր»: Նախկին դատավոր Համլետ Մաթեւոսյանի պաշտպան Ռաֆիկ Սաֆարյանը ռեպլիկի կարգով նկատեց, որ մեղադրող Ավագ Ավագյանը մեղադրանքից հրաժարվելու մասին հայտարարությամբ պիտի հանդես գա: Մեղադրող Ա. Ավագյանը բնականաբար այդ քայլին չգնաց: Դատարան չէր ներկայացել հաջորդ վկան՝ Արթուր Ղարախանյանը, որը եղբոր միջոցով տեղեկացրել էր դատարանին, թե «գործուղման մեջ է»: ՌՈՒԶԱՆ ՄԻՆԱՍՅԱՆ
