Երեկ
շախմատի աշխարհի պատանիների եւ աղջիկների առաջնության մասնակիցները Հունաստանի Իրակլիոն
քաղաքում անցկացրին 9-րդ տուրի հանդիպումները: Բոլոր տարիքային խմբերում էլ
պայքարն ընթանում է բավականին լարված ու հետաքրքիր: Դա է վկայում մրցաշարային աղյուսակների
հատկապես վերին հորիզոնականներում տիրող «նեղվածքը»: Յուրաքանչյուր կես միավորը պատանի
շախմատիստին կամ շախմատիստուհուն կարող է աղյուսակում վեր բարձրացնել մինչեւ 10-15
աստիճան եւ հակառակը: Այնպես որ, մրցաշարի ավարտին ամեն մի տուրի արդյունքը վճռորոշ
դեր կարող է կատարել ինչպես ամփոփիչ աղյուսակում առաջատարների շարքում հայտնվելու
համար, այնպես էլ հակառակը. ամեն մի կորուստ կարող է ի չիք դարձնել մինչ այդ գործադրած
ջանքերը: Աղջիկների առաջնությունում ութ տուրից հետո լավագույն ցուցանիշ ունեն
14 տարեկանների խմբում հանդես եկող Նունե Դարբինյանը, որը 5,5 միավորով 13-րդ տեղում
է, եւ Սիրանուշ Անդրիասյանը: Նա վաստակել է 5 միավոր եւ նույնպես 13-րդն է: Մեր մյուս
աղջիկները հիմնականում զբաղեցնում են միջին եւ մի փոքր ավելի բարձր դիրքեր: Այսպես,
ամենակրտսերների խմբում՝ 10 տարեկաններ, որտեղ հանդես է գալիս 84 հոգի, Մարիա Գեւորգյանը
5 միավորով 19-րդն է, իսկ Արփի Ազիզբեկյանը 3 միավորով՝ 66-րդը: Շուշաննա Սարգսյանը
(12 տարեկաններ) վաստակել է 4,5 միավոր եւ 35-րդն է: 14-ամյա մեր մյուս աղջնակներից
Վարդուհի Քալաշյանը ունի 4 միավոր եւ 43-րդ տեղում է, իսկ Արմինե Բաբայանը 3,5 միավորով՝
67-րդում: Այստեղ առավել հաջող է հանդես գալիս Ուզբեկստանը ներկայացնող Իրինա Գեւորգյանը՝
14-րդ հորիզոնական՝ 5,5 միավորով: 16 տարեկանների մեջ Հայաստանը ներկայացնող Լիա
Մարտիրոսյանը 4 միավորով 38-րդն է, Տաթեւ Աբրահամյանը ԱՄՆ-ից՝ 5,5 միավորով՝ 10-րդը,
իսկ Բիայնա Գերագուսյանը (Նիդեռլանդներ) 61-րդը՝ 3 միավոր: Տղաների մրցապայքարում
մերոնց վիճակն այսպիսին է. 10 տարեկաններ. 13. Դավիթ Շահինյան՝ 5,5, 16. Տիգրան
Պետրոսյան՝ 5,5, 17. Խաչատուր Երանյան՝ 5,5, 11. Դավիթ Խաչիկյան (Բելառուս)՝ 6: 12
տարեկաններ. 12. Հայկ Վարդանյան՝ 5,5, 16. Սամվել Տեր-Սահակյան՝ 5,5, 42. Հայկ Թամազյան՝
4,5: 14 տարեկաններ. 12. Հրայր Սիմոնյան՝ 5,5, 15. Հովիկ Հայրապետյան՝ 5,5:
16 տարեկաններ. 14. Ավետիք Գրիգորյան՝ 5,5, 24. Գարուշ Մանուկյան՝ 5, 34.
Հրանտ Մելքումյան՝ 4,5: 18 տարեկաններ. 20. Արման Փաշիկյան՝ 5, 64. Գրիգոր-Սեւակ
Մխիթարյան (Բրազիլիա) 3: ԱՇՈՏ ՀԱԿՈԲՅԱՆ
