ՀՅԴ-ԻՆ
ՈՒԺՈՎ ՉԵՆ ՊԱՀՈՒՄ ԿՈԱԼԻՑԻԱՅՈՒՄ ՀՅԴ Հայաստանի կազմակերպության
գերագույն ժողովից հետո հրապարակվեց Դաշնակցության պաշտոնական դիրքորոշումը, թե «կոալիցիայի
հուշագրում նախանշված առաջնահերթությունների զգալի մասը դեռեւս չի հաջողվել իրականացնել»:
Մեր հարցին՝ համաձա՞յն է այս գնահատականին, ՀՀԿ փոխնախագահ Տիգրան Թորոսյանը պատասխանեց.
«Նման գնահատականի, բնականաբար, հնարավոր չէ համաձայնել: Այն պարզ պատճառով, որ կարելի
է համաձայնել կամ չհամաձայնել մի բանի, որը որոշակիորեն ձեւակերպված է: Իսկ «զգալի»,
«շատ», «քիչ» եւ այլն՝ ուղղակի հուզական ձեւակերպումներ են»: Այսինքն՝ անհրաժեշտ
է համարում, որ որոշակիացվի՞, թե հատկապես ո՛ր առաջնահերթությունները չեն իրականացվել:
«Իհարկե՛,- համաձայնեց պրն Թորոսյանը:- Եթե նշում են ինչ-ինչ խնդիրների մասին՝ միշտ
պետք է որոշակի խոսել, որ հնարավոր լինի նաեւ անդրադառնալ, թե գնահատականը լիարժե՞ք
է, համապատասխանո՞ւմ է իրականությանը կամ ոչ»: ՀՅԴ Հայաստանի Գերագույն մարմնի
ներկայացուցիչ Արմեն Ռուստամյանն այս ժողովից հետո նաեւ հայտարարեց. «Դաշնակցությունն
իրեն իրավունք է վերապահելու կոալիցիայի ձեւավորման նպատակների, հուշագրի պայմանների
խախտման դեպքում վերանայել իր մասնակցությունը կոալիցիոն կառավարության մեջ»: Փոքր-ինչ
սպառնալից այս հայտարարությանն ի պատասխան՝ ՀՀԿ փոխնախագահն ասաց. «Կարծում եմ` նման
պարբերական հայտարարություններն ուղղակի զարմանալի են, քանի որ ամեն կուսակցություն
կարող է ցանկացած ժամանակ դուրս գալ կոալիցիայից եւ հայտարարել, թե ինչու է դուրս
գալիս: Այնպես որ՝ որեւէ մեկը որեւէ մեկին ուժով չի պահում ու չի կաշկանդում: Եվ
անընդհատ ասելը, թե կարող ենք դո՜ւրս գալ, կարող ենք դո՜ւրս գալ՝ իսկապես զարմանալի
է»: Ա. Ի.
