Երեկ կառավարության շենքի առջեւ, ի թիվս արդեն «դասական ցուցարարներ» դարձած Դալմայի հողագործների եւ Հյուսիսային պողոտայի նախկին բնակիչների, հավաքվել էր ցուցարարների նոր խումբ՝ պատգամավոր Արշակ Սադոյանի գլխավորությամբ:
Բողոքի թեման «ԱրմենՏելի» հետ կապված կառավարության վերջին որոշումն էր: «Շուրջ մեկ տարի ուսումնասիրելով «ԱրմենՏելի» գործերը, կառավարությունն ամրագրեց, որ ընկերությունը չի կատարել ներդրումներ՝ Հայաստանին հասցնելով 170 մլն դոլարի վնաս եւ այս վնասը հիմա հենց այսպես դուրս գրե՞լ: Սրանից մեծ ազգային դավաճանություն հնարավոր չէ պատկերացնել»,- նախորդ օրը կառավարությունում հնչեցրած իր դժգոհությունը կրկնեց Ա. Սադոյանը: Իսկ IP ինտերնետային կապի պրովայդերների ստեղծած կազմկոմիտեի անդամ Մուշեղ Միլիտոնյանը խորհուրդ տվեց չհավատալ նախարար Դավիթ Հարությունյանի ասածին, թե բնակչությունը չի տուժի ինտերնետով հեռախոսային կապի մենաշնորհից. «Եթե մեկ րոպեն միջին հաշվարկով կդառնա 350-400 դրամ՝ այսօրվա 60-80 դրամի փոխարեն, էլ ինչպե՞ս չենք տուժի»: Բացի պրն Սադոյանից, «ԱրմենՏելի» որոշումից դժգոհ այլ քաղաքական գործիչ ցույցին չէր մասնակցում:
Ռ. Ա.
